O Ai le Faafofoga Tatalo?

PE AFAI e iai se Faafofoga tatalo, e talafeagai la le faapea atu o ia foʻi o Lē na foafoaina mea uma. O ai se isi e mafai ona iloa o tatou mafaufauga, nai lo o Lē na foafoaina le faiʻai o le tagata? O ai se isi e mafai ona tali mai i tatalo, ma fesoasoani mai i tagata? Ae e te ono manatu: ʻPe e tatau ona talitonu e iai Sē na foafoaina mea uma?’

E manatu le toʻatele, ina ia talitonu i Sē na foafoaina mea uma, e tatau ona e teena faamaoniga o le faasaienisi o loo iai nei. Peitaʻi, e sesē le manatu e faapea e feteenaʻi le talitonuga i le Atua, ma le faasaienisi. Seʻi mātau manatu o loo mulimuli mai.

▪ I se suʻesuʻega lata mai a polofesa o le faasaienisi e toʻa 1,646, i iunivesite e 21 e sili ona maualuluga i Amerika, na iloa ai e na o le tasi vaetolu na filifilia le faaupuga, “Ou te lē talitonu i le Atua,” e faamatala ai o latou manatu.

Ae o le mea moni, e toʻatele saienitisi e talitonu e iai le Atua.

Faamaoniga o le Iai o Lē na Foafoaina Mea Uma

Pe e tatau ona tatou talitonu o loo iai moni se Faafofoga tatalo e aunoa ma ni faamaoniga? E leai. E lē moni le manatu e faapea, o le faatuatua e uiga atu i le talitonu e aunoa ma ni faamaoniga. Ua faamatalaina i le Tusi Paia le faatuatua, o “le faamaoniga manino lea o mea moni e ui ina e lē o vaaia.” (Eperu 11:1) O se faaaʻoaʻoga, e lē mafai ona iloa atu peau o le ʻea, ae e te iloa o loo iai moni lava ona o loo e lagona atu le leo i luga o le leitiō. I se tulaga taitutusa, e ui e lē mafai ona tatou vāai i le Faafofoga tatalo, ae e mafai ona tatou iloilo faamaoniga e talitonu ai, e iai moni lava o ia.

O fea e tatou te maua ai faamaoniga o loo iai moni lava le Atua? Seʻi vaavaai i mea o loo  siʻomia ai i tatou. Ua faapea mai le Tusi Paia: “O le mea moni, e tofu lava le fale ma le tagata na ia faia, a o lē na faia mea uma o le Atua lea.” (Eperu 3:4) Pe e te ioe i lenā manatu? Pe a e manatunatu loloto i le faatulagaina o mea i le vateatea, le amataga o le ola, po o le foafoaga e sili ona ofoofogia i le lalolagi, o le faiʻai lea o le tagata, e te ono manatu la e iai moni lava se tasi e sili atu nai lo o tagata.

Ae e itiiti ni mea e tatou te aʻoaʻoina mai i le natura e uiga i le Atua. O le mātauina o faamaoniga o le iai moni o le Atua e ala i ana foafoaga, e tai pei o le faalogoina o le paʻōʻō mai o le savali a se tasi i tua o se faitotoʻa o loo tapuni. Ua e iloa o loo iai se tasi i tua o le faitotoʻa, ae o ai o ia? Ina ia iloa, e tatau ona e tatalaina le faitotoʻa. E faapena foʻi le mea e tatau ona tatou faia e iloa ai Lē na foafoaina mea uma.

O le Tusi Paia o se faitotoʻa e tau atu i le poto saʻo e uiga i le Atua. Pe a e tatala lenā faitotoʻa ma iloilo nisi o valoaga auʻiliʻili o loo iai ma lo latou faataunuuga, ona e maua ai lea o faamaoniga o le iai moni o le Atua. * Ae e sili atu i lenā, o faamaumauga o loo iai e uiga i le auala na feutagaʻi ai le Atua ma tagata, ua faaalia ai le ituaiga o Atua e iai le Faafofoga tatalo.

E Faapeʻī Uiga o le Faafofoga Tatalo?

Ua faailoa mai i le Tusi Paia, o le Faafofoga tatalo o se peresona agaga, e mafai ona e malamalama i ai. O le mea moni, afai e mafai ona faalogo ma malamalama se tagata, e sili atu la ona mafai e Ieova ona faia faapea, e pei ona  faamautinoa mai e le manatu lenei: “Le Faafofoga tatalo e, e ō atu iā te oe tagata uma lava.” (Salamo 65:2) E faafofoga o ia i ē e tatalo atu ma le faatuatua, ma e iai foʻi sona suafa. Ua taʻua i le Tusi Paia: “E mamao Ieova mai i ē e amioleaga, ae faafofoga o ia i le tatalo a ē e amiotonu.”—Faataoto 15:29.

E iai faalogona o Ieova. O ia “o le Atua o le alofa,” ma “o le Atua fiafia.” (2 Korinito 13:11; 1 Timoteo 1:11) I le taimi na faateteleina ai le amioleaga, ua faapea mai le Tusi Paia: “Ua tigā ai lona finagalo.” (Kenese 6:5, 6) E lē moni le manatu e faapea e faapogaia e le Atua mafatiaga ina ia tofotofo ai tagata. Ua taʻua i le Tusi Paia: “E mamao lava i le Atua moni ona faia o se mea leaga.” (Iopu 34:10) Peitaʻi, e te ono manatu, ʻPe afai o le Atua o Lē silisili ese na foafoaina mea uma, aiseā la ua ia lē taofia ai puapuaga?’

E iai se mea ua tatou iloa e faatatau iā Ieova ona ua ia tuu mai i tagata le saʻolotoga e filifili ai. Pe e tatou te lē fiafia i le saʻolotoga, e filifili ai i le auala e ola ai? Ae e faanoanoa lava, e toʻatele tagata ua faaaogā sesē le saʻolotoga, ma ua faapogaia ai puapuaga iā i latou lava faapea ma isi. O se fesili lenei e tatau ona manatunatu loloto iai: E faapefea ona aveesea atoatoa e le Atua puapuaga, e aunoa ma le aveesea o le saʻolotoga o le tagata e filifili ai? O le a tatou iloiloina lenei fesili i le mataupu o sosoo mai.

[Faaopoopoga i lalo]

[Pusa i le itulau 5]

Po o Lotu ua Māfua ai Ona E Lē Mautonu?

E faanoanoa lava, o lotu ua māfua ai ona lē mautonu tagata, pe e iai se Faafofoga tatalo e alofa. O le aafia o lotu i taua, faiga faatupu faalavelave, ma le manatu māmā i le sauāina ma le faileagaina o fanau, ua māfua ai ona faapea mai nisi o loo tatalo, “Ou te lē talitonu i le Atua.”

Aiseā e masani ai ona avea lotu ma taaʻiga leaga? Ina ia faafaigofie le manatu: Ua faia e tagata amioleaga mea leaga e faaaogā ai le igoa o lotu. Ua valoia i le Tusi Paia, e iai le taimi o le a tulaʻi mai ai ē e pulea le faa-Kerisiano, ma faaaogāina mo ni fuafuaga leaga. Na taʻu atu e le aposetolo o Paulo i ovasia Kerisiano: “E maua foʻi iā te outou ni tane latou te faauiga sesē mea, ina ia fetoso ese ai soo e mulimuli atu iā i latou.”—Galuega 20:29, 30.

E ʻinoʻino le Atua i lotu sesē. O le mea moni, ua tuuaʻia e le Tusi Paia lotu sesē i le “toto o . . . tagata uma ua fasiotia i le lalolagi.” (Faaaliga 18:24) I le silafaga a le Atua, ua nofosala i le toto lotu sesē, ona e latou te lē o aʻoaʻo tagata e faatatau i le Atua moni, o lona uiga autū o le alofa.—1 Ioane 4:8.

E manatu mamafa mai le Faafofoga tatalo i tagata ua mafatia ona o lotu. O le alofa o le Atua i tagata o le a uunaʻia ai o ia e gaoioi i se taimi lata mai, e faamasino lotu faafiaamiotonu uma e ala iā Iesu, o lē na faapea mai: “E toʻatele e fai mai iā te aʻu i lea aso, ʻLe Alii e, le Alii e, pe matou te leʻi faia ea ni valoaga . . . i lou suafa?’ Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.”—Mataio 7:22, 23.