Ia Mafuta Atu i le Atua

Pe a Faamagalo e le Atua, pe e Na te Faagalo?

O LE tali iai, o le ioe. Na folafola atu e Ieova iā i latou o ē e finagalo malie i ai e faapea: “Ou te faamagaloina a latou mea sesē, ma ou te lē toe manatuaina a latou agasala.” (Ieremia 31:34) Na faamautinoa mai e Ieova, a ia faamagalo agasala a tagata ua salamō moni, e na te lē toe manatua lava. Po o lona uiga la, e lē mafai e Lē na foafoaina le vateatea ona toe manatua agasala ua ia faamagaloina? E fesoasoani upu a Esekielu ina ia malamalama ai pe faapefea ona faamagalo ma faagalo e le Atua.—Faitau le Esekielu 18:19-22.

Na faaaogā e Ieova le perofeta o Esekielu, e faailoa atu sala faafaamasinoga i tagata lē faamaoni o Iuta ma Ierusalema. Na lafoaʻia e le nuu atoa le tapuaʻiga iā Ieova, ma faatumu le nuu i faiga sauā. Na valoʻia e Ieova o le a faaumatia Ierusalema e ʻautau a Papelonia. E ui i nei feʻau faafaamasinoga, ae na avatu ai foʻi e Ieova se feʻau o le faamoemoe. E tofu lava le tagata ma lana filifiliga; ma e paʻū i ona lava luga le iʻuga o ana gaoioiga.—Fuaiupu e 19, 20.

Ae faapefea pe a suia le olaga o se tasi mai i le leaga i le lelei? Na faapea mai Ieova: “O se tagata e amioleaga, afai foʻi ua liliuese mai i ana agasala uma na faia, ma ia tausia aʻu tulafono uma ma faia le mea tonu ma le amiotonu, e ola pea lava o ia. E lē oti lava.” (Fuaiupu e 21) Ioe, ua “nofosauni [Ieova] e faamagalo” tagata agasala ua fulitua i o latou ala sesē, ma ua salamō moni.—Salamo 86:5.

Ae faapefea agasala na faia e le tagata? Na fetalai Ieova e faapea: “O solitulafono uma na ia faia e lē toe lāgā mai e faasaga iā te ia.” (Fuaiupu e 22) Ia mātau, o le agasala a le tagata ua salamō moni, “e lē toe lāgā mai e faasaga iā te ia.” Aiseā e mataʻina ai lenei mea?

I le Tusi Paia, o le upu Eperu ua faaliliuina i le “manatua,” e sili atu lona uiga nai lo o le tau ina manatua o mea ua tuanaʻi. Ua taʻua i se tasi o lomifefiloi e faatatau i lenei upu e faapea: “E masani ona uiga i se gaoioiga, po o le tuufaatasi ma isi upu galue.” O lea la, o le faaupuga “ia manatua,” e mafai ona uiga atu “ia gaoioi.” O lea, pe a fetalai Ieova e uiga i le tagata ua salamō, “e lē toe lāgā mai [ana agasala] e faasaga iā te ia,” o lona uiga, e lē toe gaoioi mulimuli ane o Ia e faasaga i tagata taʻitoʻatasi ona o na agasala, e ala i le tuuaʻia po o le faasalaina foʻi o i latou. *

E faaalia i upu o loo i le Esekielu 18:21, 22, le matuā atoatoa o le auala e faamagalo ai Ieova, ma e matuā pāʻia ai o tatou loto. Pe a faamagalo e Ieova a tatou agasala, e lē taitai ona ia taofia pe manatua na agasala, ina ia toe faasagatau mai ai iā i tatou i le lumanaʻi. Peitaʻi, o le a ia lafoaʻi i ona tua agasala a le tagata ua salamō moni. (Isaia 38:17) E peiseaʻī ua ia soloiesea faamaumauga o na agasala.—Galuega 3:19.

Talu ai e tatou te lē lelei atoatoa, o lea e manaʻomia ai le alofa mutimutivale o le Atua, auā e tatou te agasala i le tele o taimi. (Roma 3:23) E finagalo Ieova ia tatou iloa, afai e tatou te salamō moni, ua nofosauni o ia e faamagalo ma faagalo. O le a lē taitai ona ia tuuʻaia pe faasala i tatou, ona o agasala ua uma ona faamagalo. Maʻeu se manatu faamāfanafana loto! Pe e lē uunaʻia ea oe e le alofa mutimutivale o le Atua, ia mafuta vavalalata atu ai iā te ia?

Faitauga Tusi Paia mo Iulai:

▪ Esekielu 6-20

[Faaopoopoga i lalo]