Aiseā e Fia Iloa ai e Uiga i Vavega?

“E feteenaʻi vavega ma aʻoaʻoga faasaienisi.”—RICHARD DAWKINS, O SĒ NA AVEA MA POLOFESA I LE OXFORD UNIVERSITY I EGELANI.

“E matuā talafeagai ona talitonu i vavega. E lē feteenaʻi vavega ma faiga faalotu, ae ua faailoa mai ai le alofa o le Atua ma le iai pea o sona sao i le foafoaga.”—ROBERT A. LARMER, POLOFESA O FILOSOFIA.

“E TE talitonu i vavega?” E pei ona taʻua i luga, e matuā eseese lava manatu o tagata. Ae o le ā sau oe lava tali?

Atonu e te faatalatū e tali mai, “Ioe,” ina neʻi faaalia ai e te talitonu i faiga faataulāitu, pe e leʻi aʻoaʻoina foʻi oe. E toʻatele e manatu faapena.

I le isi itu, atonu e te talitonu e tutupu moni vavega, e pei o le vaeluaina e Mose o le Sami Ulaula. E te ono talitonu foʻi e tutupu vavega i aso nei, auā ua faaalia i se lipoti talu ai nei, “e toʻatele tagata i atunuu i Sisifo o loo talitonu pea i vavega, e pei o le tolu kuata o tagata i Amerika, ma le 38 pasene o tagata Peretania.” (The Cambridge Companion to Miracles, toe teuteuina e Graham H. Twelftree) E lē gata i lea, e lē na o Kerisiano e talitonu i vavega. E tusa ai ma le tusi o le Britannica Encyclopedia of World Religions, “e toetoe o lotu uma” e talitonu i vavega.

Pe e te tali mai foʻi e pei o isi: “Ou te lē iloa, ma ou te lē popole i ai! E lē tutupu ni vavega i loʻu olaga!” O lea la, aiseā la e te fia iloa ai fua e uiga i vavega?

Mātau lenei mea: Seʻi faapea ua maua oe i se maʻi e lē mafai ona togafitia, ae na e faitau i se tusi faafomaʻi maufaatuatuaina  e uiga i se vailaau fou, e ono togafitia ai lou maʻi. Pe e lē tatau ea ona faaalu sina taimi ma le malosi e iloilo ai pe e moni na faamatalaga? Ua faapena foʻi ona folafola mai i le Tusi Paia e lē o toe umi ona faataunuuina lea o nisi o vavega mataʻina, ia o le a aafia ai tagata uma i le lalolagi. Pe e lē tatau ea la ona faaalu lou taimi ma le malosi e iloilo ai pe e maufaatuatuaina na folafolaga?

Peitaʻi, a o leʻi iloiloina po o ā na vavega ua folafola mai, seʻi o tatou taliina nisi o teteega masani e tolu e uiga i vavega.

[Pusa i le itulau 3]

O LE Ā LEA MEA O LE VAVEGA?

O se mea e lē mafai e le malosi o le tagata ma malosiaga faalenatura ona faia, ae e masani lava ona manatu e pogai mai i se malosiaga e sili atu.