Se Talanoaga Faale-Tusi Paia—Pe e Ō Tagata Lelei Uma i le Lagi?

E FIAFIA Molimau a Ieova e talanoa ma tagata i le Tusi Paia. Pe e iai se fesili faale-Tusi Paia o loo e mafaufau i ai? Po o e fia iloa talitonuga po o faiga faaletapuaʻiga a Molimau a Ieova? Pe afai o lea, talanoa atu i se Molimau a Ieova i se taimi e te toe feiloaʻi i ai. O le a fiafia o ia e te lua talanoa i lenā mataupu.

O le talanoaga o loo mulimuli mai, o se talanoaga e masani ona fai e se Molimau a Ieova ma se tagata i le talaʻiga. Seʻi faapea ua alu atu le Molimau e igoa iā Mareko i le fale o se tamāloa e igoa iā Ropati.

O ā Mea o le a Faia e i Latou e Ō i le Lagi?

Mareko: O le ā sou manatu, o le ā le ituaiga o lumanaʻi o loo faatalitalia e tagata lelei?

Ropati: Ou te iloa o le a faaleleia le tulaga o mea, ma ou te naunau i le taimi o le a ou alu ai i le lagi e faatasi ma le Alii.

Mareko: E manaia lou manatu. O loo taʻua i le Tusi Paia le tele o mea e uiga i le lagi ma le faaeaga o le alu atu i inā. Ae o le ā sou iloa, o ā mea o le a faia e i latou e ō i le lagi?

Ropati: O le a tatou faatasi ma le Atua ma viia o ia e faavavau.

Mareko: E toʻatele tagata e manatu faapena. Ae i le Tusi Paia, o loo taʻua ai le faaeaga o le a maua e i latou e ō i le lagi, ma le tāua o le tiute tauave o le a latou mauaina.

Ropati: O le ā lenā tiute tauave?

Mareko: O loo taʻua i le Faaaliga 5:10: “Ua e [Iesu] faia i latou ma malo ma ositaulaga i lo tatou Atua, e latou te pule mai foʻi o ni tupu i le lalolagi.” Pe na e mātau mai le tiute tauave a i latou e ō i le lagi?

Ropati: O loo faapea mai le mau, o le a pule i latou o ni tupu i le lalolagi.

Mareko: Ioe, o se manatu e ao ona tatou manatunatu i ai, a ea?

O Ai o le a Latou Pule Mai i Ai?

Mareko: Pe e te talitonu e tatau ona iai nisi e pule mai i ai i latou o le a avea ma tupu i le lagi? Auā o le ā le aogā o se pulega ae e leai ni tagatānuu?

Ropati: O lea ua ou tau malamalama atu.

Mareko: O lea, e talafeagai la ona fesili ifo, O ai o le a latou pule mai i ai?

Ropati: Ou te manatu o le a tatou pule mai i tagata e leʻi maliliu, ma e leʻi ō atu i le lagi.

Mareko: Atonu e saʻo lou manatu pe afai e ō tagata uma i le lagi. Ae e iai se isi itu e tatau ona mafaufau i ai. Pe faamata o le a iai nisi o tagata lelei e lē ō i le lagi?

 Ropati: Ailoga e iai se Kerisiano e talitonu i se mea faapena.

Mareko: Ua ou lāgā lenā fesili ona o upu o loo i le Salamo 37:29. Pe e mafai ona e faitauina mai le mau lenā faamolemole?

Ropati: Fai mai le mau: “E fai lava le lalolagi mo ē e amiotonu, e nonofo ai pea i latou e oo i le faavavau.”

Mareko: O e mātau mai le mea o le a ola ai le toʻatele o tagata lelei?

Ropati: Fai mai o le a latou nonofo i le lalolagi.

Mareko: Saʻo lelei, ma e lē mo na o sina taimi, auā o loo faapea mai le mau: “E nonofo ai pea i latou e oo i le faavavau.”

Ropati: Ae e lē o uiga atu le mau lenā i le iai pea o tagata lelei i le lalolagi? Pe a tatou feoti ma ō i le lagi, o le a suia i tatou e isi tagata lelei o le a fananau mai.

Mareko: O se manatu taatele lenā. Ae pe e mafai ona uiga atu lenā mau i se isi manatu e faapea, o le a ola e faavavau tagata lelei i le lalolagi?

Ropati: Ia taʻilo iai.

O se Parataiso i le Lalolagi i le Lumanaʻi

Mareko: Seʻi mātau se isi mau o loo talanoa e uiga i le olaga i le lalolagi i le lumanaʻi. Seʻi o ta faitau i le Faaaliga 21:4 e faatatau i tagata o le a ola i lenā taimi. Ua faapea mai le mau: “E na te [le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” E ese le manaia o lenā manatu, a ea?

Ropati: Ioe, ae ou te iloa o loo uiga atu i le olaga i le lagi.

Mareko: E saʻo oe o le a maua e i latou e ō i le lagi ni faamanuiaga faapena. Ae seʻi o ta toe tagaʻi i le mau. O le ā o loo taʻua ai e uiga i le oti?

Ropati: O loo faapea mai “e lē toe iai se oti.”

Mareko: Ioe, o lenā. E te ioe ma aʻu, pe afai e lē toe iai se mea, o lona uiga la sa iai muamua lenā mea?

Ropati: E saʻo oe.

Mareko: Ae e leʻi iai lava le oti i le lagi, a ea? E na o le lalolagi o loo maliliu ai tagata.

Ropati: O lea ua ou tau malamalama atu.

Mareko: O lea la, o loo aʻoaʻoina mai i le Tusi Paia e iai nisi o le a ō i le lagi, ae e toʻatele foʻi o le a ola e faavavau i le lalolagi. Ou te iloa ua e masani i le faamatalaga lenei: “E fiafia o ē e agamalu, auā e fai mo latou tofi le lalolagi.”—Mataio 5:5

Ropati: Ioe, e masani ona ou faalogo ai i le matou lotu.

Mareko: Pe afai la o le a fai le lalolagi ma tofi o ē agamalu, pe e lē o lona uiga ea la, o le a nonofo tagata i le lalolagi? O le a maua e i latou o le a ola i le lalolagi faamanuiaga ia na taʻua i le Faaaliga. O le a latou vaaia le suia atoatoa o lo tatou lalolagi, ona o le a tafiesea e le Atua le amioleaga ma le oti.

Ropati: O lea ua ou tau malamalama atu, ae ailoga e lava se mau e tasi pe lua e faamaonia ai lenā manatu.

Mareko: E saʻo lelei a oe, e tele ni mau o loo taʻua ai le ola i le lalolagi i le lumanaʻi. Atonu e mafai ona ou faaali atu se tasi o mau ou te fiafia i ai pe a talafeagai ma oe.

Ropati: Ia manaia foʻi.

ʻO le a Lē Toe Iai le Tagata Amioleaga’

Mareko: Na ta talanoa i le taimi ua sola i le Salamo 37:29. Seʻi o ta toe suʻe la i le Salamo lava lenā, ae i le fuaiupu e 10 ma le 11. E mafai ona e faitauina mai faamolemole?

Ropati: Fai mai: “Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o  ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”

Mareko: Malo mo le faitau. Pe a tagaʻi i le fuaiupu e 11, o fea o le a nonofo ai “ē e agamalu” po o tagata lelei?

Ropati: Fai mai o le a “fai mo i latou le lalolagi.” Ae ou te iloa o loo faatatau mai i aso nei, auā o lea o loo iai tagata lelei i le lalolagi.

Mareko: E saʻo oe. Peitaʻi, o loo faapea mai foʻi le mau o le a fiafia tagata lelei i le “tele o le filemu.” Po o tatou vaaia i aso nei le tele o le filemu?

Ropati: E leai.

Mareko: O le a faapefea la ona faataunuuina lenei folafolaga? Atonu e lelei pe a manatu i lenei faataʻitaʻiga: Seʻi faapea e iai sou fale mautotogi telē. O nisi o tagata o loo mautotogi ai e lelei, e tausia lelei lou fale, ma o ni tuaoi lelei. E te fiafia e nonofo na tagata i lou fale. Ae e iai nisi e lē lelei e mautotogi ai foʻi, ma e latou te faaleaga lou fale, ma faatigā i isi. O lea, o le ā le mea e te faia pe afai e lē mananaʻo na tagata e suia o latou uiga?

Ropati: O le a ou tutuli ese i latou.

Mareko: O le mea tonu lava lenā o le a faia e le Atua i tagata leaga o loo iai i aso nei. Seʻi toe tagaʻi i le fuaiupu e 10, fai mai: “Ona lē toe iai lea o le tagata amioleaga.” I se isi faaupuga, o le a tuliesea e le Atua tagata o loo faapogaia tigā i isi. Ona mafai loa lea e tagata lelei ona maua se olaga filemu i le lalolagi. Ou te iloa e ese lenei manatu mai i le mea sa aʻoaʻoina ai oe.

Ropati: E saʻo lelei a oe, ou te leʻi faalogo lava i lenā mea i le matou lotu.

Mareko: E pei ona e taʻua muamua, e lē lava le talanoaina o se mau e tasi pe lua e uiga i se mataupu. O le mea moni, e tatau ona iloilo po o le ā o loo taʻua i le Tusi Paia atoa e uiga i le lumanaʻi o tagata lelei. Ae e tusa ma mau na ta faitau i ai, pe e te manatu e mafai ona ō isi tagata lelei i le lagi, ae e ola e faavavau isi tagata lelei i le lalolagi?

Ropati: Ou te lē o mautinoa, auā pe a fua i mau na ta faitauina, ou te iloa o le mea tonu lenā o le a tupu. Ae seʻi oʻu mafaufau atili i ai.

Mareko: Atonu e iai nisi o fesili e ono oso aʻe i lou mafaufau a o e iloilo atili i le mataupu. O se faataʻitaʻiga, ae faapefea tagata lelei na soifua muamua atu iā i tatou? Pe na ō i latou i le lagi? Afai e leai, o fea la o iai i latou?

Ropati: Manaia foʻi na fesili.

Mareko: Ia e mafai ona ou tusi atu nisi o mau e fesootaʻi atu i lenei mataupu, * ma ou te fiafia e toe foʻi mai ma talanoaina na mau ma oe, pe a uma ona e faitau ma mafaufau i ai. E ā, e talafeagai lenā tonu?

Ropati: Manaia foʻi lenā tonu. Faafetai lava.

[Faaopoopoga i lalo]