Le Mana o le Afioga a le Atua i se Aiga Hinitū

Ua Faamatalaina e Nalini Govindsamy

E LĒ taitai ona galo iā te aʻu le faatasiga a lo matou aiga mo le mālū taeao, iā Aokuso 22, 2005. Sa iai se tuma i loʻu faiʻai, ma na matuā lamatia ai loʻu ola. Sa faia e loʻu toʻalua o Krishna se tatalo, ona ou talanoa atu loa lea i lo matou aiga.

Sa ou faapea atu: “O lea o le a ou alu i le falemaʻi e fai soʻu taotoga tugā. Ia nofosauni po o le ā lava le mea e tupu mai. Ua uma ona ou faia fuafuaga mo loʻu toe sauniga pe a ou oti. Mo outou o ē o loo tapuaʻi iā Ieova, faamolemole aua le faavaivai. Ae ou te talosaga atu i le isi toʻatele o outou, ia faia ni suʻesuʻega faale-Tusi Paia ma auai i a matou sauniga faa-Kerisiano. Ona outou aʻoaʻoina ai lea o loʻu talitonuga e uiga i se lalolagi fou o le a avea ma parataiso, e ola e faavavau ai tagata tapuaʻi moni o le Atua, ma maua ai le soifua mālōlōina lelei atoatoa.”

A o leʻi taʻuina atu le iʻuga o loʻu taotoga, seʻi oʻu faamatala atu loʻu talaaga ma le auala na ou iloa ai le Atua moni.

Ola aʻe i le Lotu Hinitū

Sa nonofo lo matou aiga i se fale telē i luga o se aʻega maualuga i le aai tū matafaga o Durban, i Aferika i Saute. Pe a sau mai le auala tele, e tatau ona āʻea faasitepu e 125, sosoo ai ma se auala puupuu e togāvaoa, ona faatoʻā taunuu mai lea i le pā. I le isi itu o le pā, e faafesagaʻi ai lo matou fale ma le tamaʻi malumalu tapuaʻi o le tinā o loʻu tamā, e tumu i ata ma faatusa o atua Hinitū. Na fai mai o ia, o aʻu o se “tamaitiiti o le malumalu” (mandir kī baccā i le faa-Hinitu), ma ua māfua ona ou fanau ona o na atua. E telē lo matou fale, e iai sona auala savali umī, se umukuka telē e iai se ogaumu e tafu, fitu potumoe, ma se isi potumoe i le faasee. E toʻa 27 i matou sa nonofo i lenā fale, e aofia ai mātua o loʻu tamā, loʻu tamā, o ona uso e toʻatolu, lona tuafafine laʻitiiti, ma o latou aiga.

E lē faigofie le tausia o se aiga toʻatele. Peitaʻi e tele mea mananaia e matou te manatua mai i taimi e matou te faapotopoto faatasi ai. Sa galulue faatasi loʻu tinā, o Gargee Devi, ma taʻitoʻalua o uso o loʻu tamā i le faia o feʻau i le fale, ma auauaʻi e kuka meaʻai. O le tamā o loʻu tamā o le ulu lea o le aiga, ma e na te faatauina mai meaʻai. O Aso Lulu uma e ō ai mātua o loʻu tamā i le maketi e faatau mai meaʻai mo le vaiaso atoa. E masani ona matou nofonofo i le paolo o se paina e i le tumutumu o se āʻega, lea e iloa mai ai le auala tele, ma faatalitali le taimi e la te foʻi mai ai i le maketi. O le taimi lava e iloa atu ai ua la feosofi mai i lalo ma le pasi ma se faatauga telē, ona matou taufetuli atu lea i lalo i faasitepu e 125, e fesoasoani e aumai le la faatauga.

E iai le laau o le pama i lo matou fanua, ma e ofaga i ai manu o le maina. E mafai lava ona iloa atu i latou a o felelei solo ma fetagisi. E masani ona fiafia le tinā o loʻu tamā e faamatala mai iā i matou ni tala, e pei o loo ia faamatala mai le uiga o le fetagisi a manu. E tele ni mea lelei ou te manatua a o matou ola faatasi aʻe i inā, e matou te taliē, fetagisi,  taaalo, fetufaaʻi mea, ma fiafia e ola faatasi aʻe o se aiga e tasi. Ae o le mea e sili ona tāua, o i inā na amata ai ona matou iloa e uiga iā Ieova o Lē na foafoaina mea, ma lona Alo o Iesu Keriso.

A o leʻi aʻoaʻoina e uiga iā Ieova, e masani ona faia ni faiga faalotu a Hinitū i aso taʻitasi. E masani foʻi ona fai ni faatasitasiga tetele, e valaaulia ai isi e tapuaʻi i atua eseese ma atua fafine. O le taimi lenā e amata ona fesootaʻi ai le tinā o loʻu tamā ma agaga, ma pe a oo i le vaeluapō, ona ofo atu lea o taulaga i manu e faafiafia ai agaga. Na lauiloa foʻi le tamā o loʻu tamā i le nuu, ona o ana foaʻi tau tupe e lagolago ai le fausiaina o faleaʻoga, ma malumalu o Hinitū.

Maua le Upu Moni

I le 1972, na maʻi ai le tamā o loʻu tamā ma maliu ai. I nai masina mulimuli ane, na talia ai e Jane, le avā a le uso o loʻu tamā, se lomiga o Le Olomatamata ma le Ala Mai! mai i ni Molimau a Ieova. Na faanoanoa o ia ona e na te leʻi valaaulia i laʻua i le fale mo se talanoaga. E masani lava ona matou lē talia Molimau a Ieova, ae i se tasi o aso ina ua latou toe asiasi atu, na talia ai loa e Jane mo se talanoaga. Sa ia faamatala atu faafitauli i lana faaipoipoga, e aofia ai le onā soo o lona toʻalua i le ava malosi. E masani ona uunaʻia o ia e tuaoi ma tauaiga ina ia teteʻa ma lona toʻalua, ae na faamatala atu e Molimau iā te ia le silafaga a le Atua i le faaipoipoga. (Mataio 19:6) Na fiafia Jane i le fautuaga mai le Tusi Paia ma le folafolaga mo se olaga lelei i le lalolagi. * Na suia lona mafaufau e faatatau i le tuua o lona toʻalua, ma suʻesuʻe e lē aunoa le Tusi Paia ma Molimau a Ieova. A o faia lana suʻesuʻega i le potu mālōlō, e faalogologo atu foʻi i ai isi fafine nofotane o lo matou aiga mai i o latou potu.

Mulimuli ane, na auai uma fafine nofotane i le suʻesuʻeina o le Tusi Paia. Na faamatala mai e Jane mea sa ia aʻoaʻoina, ma faitau ma faamalamalama mai tala o loo i le tusi Listening to the Great Teacher. * Ina ua iloa e uso o loʻu tamā o loo suʻesuʻe o latou taʻitoʻalua i le Tusi Paia, ona faasagatau atu lea iā i latou. Na susunu e le isi uso o loʻu tamā a matou lomiga uma, e aofia ai ma se Tusi Paia. Na latou faileagaina i matou e ala i upu po o le fasi faamoʻamoʻa foʻi, ona o le auai i sauniga a Molimau a Ieova. E na o loʻu tamā e leʻi faaalia maia nei uiga, ma e leʻi tetee i lo matou aʻoaʻoina e uiga iā Ieova. Na faaauau pea ona auai nei fafine e toʻafā i sauniga, ma faatuputeleina lo latou alofa iā Ieova le Atua.

O le 1974, na papatiso ai Jane e avea ma Molimau a Ieova, ma e leʻi umi ae papatiso foʻi loʻu tinā ma isi fafine nofotane. Mulimuli ane, na tuua e le tinā o loʻu tamā lana tapuaʻiga faa-Hinitū. E tele tausaga o ou auai ai i sauniga faa-Kerisiano, ae i se tasi o tauaofiaga tele a Molimau a Ieova, na fesili mai ai se Molimau e suafa iā Shameela Rampersad, “O afea o le a e papatiso ai?” Na ou tali atu,  “E lē mafai, ona e leai se tasi o faia saʻu suʻesuʻega faale-Tusi Paia.” O lea na ia ofo mai ai loa e na te faia laʻu suʻesuʻega, ma i le isi tauaofiaga iā Tesema 16, 1977, na ou papatiso ai loa. Mai le toʻa 27 o lo matou aiga, e toʻa 18 i latou ua papatiso. Ae i le taimi o loʻu taotoga, o loo auai pea loʻu tamā o Sonny Deva i le lotu Hinitū.

“Aua Neʻi Popole i se Mea”

Na fesoasoani tele iā te aʻu upu o le Filipi 4:6, 7, aemaise lava ina ua taʻu mai ua sosolo le tuma i loʻu faiʻai. Fai mai le mau: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.” E ese le faigatā ona lē “popole i se mea,” aemaise lava pe a faailoa atu e lē toe foʻi i se lelei lou maʻi. I le taimi muamua e na o loʻu tagi lava, ae ina ua ou tatalo iā Ieova, o le taimi lenā na ou tofo ai i le “filemu mai i le Atua, e silisili i mea uma lava e manatu i ai.”

Na ou lagona e pei o loo uu e Ieova loʻu lima taumatau ma taʻitaʻi atu aʻu i le ala. (Isaia 41:13) Na fesoasoani o Ia iā te aʻu, e faamatala atu ma le lototele i fomaʻi laʻu filifiliga e usitaʻia le poloaʻiga a le Tusi Paia, ina ia taumamao mai i le toto. (Galuega 15:28, 29) O le iʻuga, na malilie uma le fomaʻi tipitipi ma lē e faia tui moe, e faia loʻu taotoga e aunoa ma le tuiina o le toto. Ina ua uma loʻu taotoga, na faamatala mai e le fomaʻi ua aveesea uma le tuma sa aafia ai loʻu faiʻai, ma e leʻi vaai muamua lava i se maʻi ua vave ona manuia talu ona uma se taotoga tugā i le faiʻai.

I le tolu vaiaso mulimuli ane, na ou faia ai se suʻesuʻega faale-Tusi Paia, a o ou taoto i loʻu moega i le fale. Ina ua māeʻa vaiaso e fitu, sa amata ona ou toe aveina le taavale, auai i le talaʻiga, faapea ma sauniga. Ou te talisapaia le fesoasoani a uso ma tuafāfine Kerisiano na matou galulue i le talaʻiga, ma e latou te faamautinoa ua ou foʻi saogalemu i le fale. Ou te talitonu, o loʻu faalogologo i mataupu faale-Tusi Paia na puʻeina, ma taulaʻi atu i vala faaleagaga o loʻu olaga, na fesoasoani ou te toe vave malosi ai.

Na ou lagona le fiafia ina ua uma mai loʻu taotoga, ae ua talia e loʻu tamā se suʻesuʻega faale-Tusi Paia ma Molimau. O le 73 o ona tausaga na papatiso ai, ma o loo auauna maelega nei iā Ieova. E silia ma le toʻa 40 tagata o lo matou aiga ua matou tapuaʻi faatasi atu iā Ieova. E ui ua faalētonu loʻu mata tauagavale, ma o loo faamau faatasi loʻu atigipoo i uʻamea, ae ou te tulimataʻia le taimi o le a faia ai e Ieova “ia fou mea uma” i le lalolagi Parataiso.—Faaaliga 21:3-5.

Ua faamanuiaina aʻu i se tane alofa, o lē o loo auauna o se toeaina Kerisiano, faapea ma se tama teine lelei o Clerista, lea e fesoasoani mai i laʻu galuega talaʻi faataimi atoa. Ua faamanuia e Ieova laʻu galuega talaʻi, ma ua mafai ona ou fesoasoani i aʻu tagata suʻesuʻe e iloa le malosi o le mana o le Afioga a le Atua i o latou olaga. E silia ma le toʻa 30 ua tuuina atu i le Atua ma papatisoina.

I se faamoemoe mautinoa, ou te tulimataʻia le taimi o le a aveesea ai e Ieova mea tigā o loo iai i lenei lalolagi, ae taʻitaʻia i tatou i le lalolagi parataiso.

[Faaopoopoga i lalo]

[Ata i le itulau 10]

O loo sii aʻu e loʻu tinā

[Ata i le itulau 10]

Lo matou fale

[Ata i le itulau 10]

O faasitepu e 125

[Ata i le itulau 11]

Maʻua ma loʻu toʻalua (itu agavale), o laʻu tama teine, ma oʻu mātua