Le Tele ua Oo Iai Faiga Piʻopiʻo

“E faia e la matou kamupani se auaunaga mo le malo, ma e masani ona matou faatali mo le lua i le tolu masina, ona faatoʻā maua lea o lo matou totogi. Peitaʻi talu ai nei na vili mai ai se tagata faigaluega o le malo ma faapea mai, e mafai ona ia faavavevaveina le totogiina mai o i matou, pe afai e toe avatu se isi vaega o lenā tupe iā te ia.”—IOANE. *

PE NA e aafia i ni faiga piʻopiʻo? Atonu e leʻi tupu iā te oe se mea e pei ona taʻua i luga, ae e mautinoa na aafia oe i āuga o nisi o faiga piʻopiʻo.

O le kamupani o le Transparency International, lea e faatulagaina po o le ā le tele ua oo iai faiga piʻopiʻo i atunuu, sa faia sa latou suʻesuʻega i le 2009 ma iloa ai le mea moni e faapea: “E leai se vaega o lenei lalolagi e sao mai i faiga piʻopiʻo.” Ma i la latou suʻesuʻega i le 2011 i atunuu e 183, na faamaonia ai o le tele o na atunuu ua matuā faateteleina ai faiga piʻopiʻo.

E mafai ona mataʻutia iʻuga o faiga piʻopiʻo. O se faataʻitaʻiga, ua taʻua i le mekasini o le Time e faapea, o “faiga piʻopiʻo ma le faatamala” na toʻatele ai tagata na maliliu i le mafuiʻe i Haiti i le 2010. Ua faapea atili mai: “E leʻi  saogalemu fale i Haiti, ona na totogi e le ʻaufaufale tagata o le malo na siakiina le galuega, ina ia faapea mai ua saogalemu fale, ae o le mea moni e leai.”

Pe e mafai ona aveesea atoatoa faiga piʻopiʻo? Ina ia maua le tali, e tatau ona iloa pogai autū o faiga piʻopiʻo. O le a iloiloina le tulaga lenā i le mataupu o sosoo mai.

[Faaopoopoga i lalo]

[Faamatalaga faaopoopo i le itulau 3]

“O faiga piʻopiʻo, o le faaaogā sesē lea o le tulaga pule ina ia maua ai nisi mea, ma e matuā afāina ai ola ma le fiafiaga o i latou o loo faalagolago atu i le faamaoni, o lē o loo i le tulaga pule.”—TRANSPARENCY INTERNATIONAL