O le a Tafiesea Faiga Piʻopiʻo!

“Ia faamoemoe iā Ieova ma tausi i lona ala . . . E te vaai atu foʻi i le faaumatiaga o tagata amioleaga.”—SALAMO 37:34.

PE E pei oe o isi tagata o loo popole e lē mafai ona tafiesea faiga piʻopiʻo? Afai o lea, e talafeagai la lou popole auā ua tele tausaga o faataʻitaʻi e tagata so o se ituaiga o faigāmalo, ae e lē o mafai lava ona tafiesea ai faiga piʻopiʻo. Pe e iai se taimi o le a faamaoni ai tagata uma?

Ua taʻua i le Tusi Paia o le a iai le taimi, ma e lē o toe umi ona gaoioi lea o le Atua e tafiesea faiga piʻopiʻo mai le lalolagi. E faapefea? E ala i lona Malo i le lagi lea o le a matuā suia atoatoa ai le lalolagi. O le Malo lenei, na aʻoaʻo e Iesu ona soo e tatalo ina ia oo mai, i lona faapea atu: “Ia oo mai lou malo. Ia faia lou finagalo i le lalolagi.”—Mataio 6:10.

Ua valoia mai e le Tusi Paia e uiga i le Pule o lenā Malo, o Iesu Keriso: “E laveaʻi e ia le tagata mativa o loo tagi mai mo se fesoasoani, atoa foʻi ma lē ua mafatia ma lē ua leai  sona fesoasoani. E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva. E laveaʻiina e ia i latou mai i le pule sauā ma faiga sauā.” (Salamo 72:12-14) Mātau mai, e manatu mamafa Iesu i ē o loo aafia i faiga piʻopiʻo, ma o le a ia tafiesea pule sauā! Maʻeu le faamāfanafanaina o i tatou i na upu!

O le a tafiesea e le Malo o le Atua faiga piʻopiʻo mai i le lalolagi, i le taʻitaʻiga a lona Tupu malosi ma alofa. E faapefea? E ala i le aveesea o aafiaga e tolu ua māfua ai faiga piʻopiʻo.

Agasala

E tatau ona tatou tauivi i le taimi lenei e tetee atu i faanaunauga agasala, ia e tatou te gaoioi ai ma le manatu faapito. (Roma 7:21-23) Ae e iai tagata lelei o loo mananaʻo e faia le mea saʻo. E latou te faatuatua i le taulaga togiola a Iesu, lea e mafai ona faamagaloina ai a latou agasala. * (1 Ioane 1:7, 9) O le a latou maua foʻi aogā mai i le faailoaga silisili o le alofa o le Atua, e pei ona taʻua i le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”

E talitonu tagata faamaoni o le a faia e le Atua se mea ofoofogia. I le lalolagi fou, o le a ia tafiesea atoatoa le agasala, ma faasolosolo ona toe faafoʻisia tagata faamaoni i le tulaga lelei atoatoa ma amiotonu. (Isaia 26:9; 2 Peteru 3:13) O le a lē toe iai le agasala lea e māfua ai faiga piʻopiʻo, ma e ala i le Malo o le Atua, o le a “saʻoloto ai [tagata faamaoni] mai i le faapologaina i mea leaga.”—Roma 8:20-22.

Taaʻiga a Lenei Lalolagi Leaga

E faanoanoa lava ona ua fai ma le loto iai e nisi ni mea e faatigā ai i isi. E latou te faileagaina tagata faatauvaa ma matitiva, ma faapogaia foʻi isi ina ia faia faiga piʻopiʻo. Ua apoapoaʻi mai le Tusi Paia: “Ia lafoaʻi e le tagata amioleaga lona ala, ia lafoaʻi foʻi e le tagata faufau leaga ona manatu.” Pe afai e salamō na tagata, ua folafola mai e le Atua o le a ia “matuā faamagaloina lava.”—Isaia 55:7.

Peitaʻi, o le a tafiesea atoatoa e le Atua i latou e lotomaaa ma lē mananaʻo e suia o latou ala. E ala i le Malo o le Atua, o le a faataunuuina ai le folafolaga a le Tusi Paia e faapea: “Ia faamoemoe iā Ieova ma tausi i lona ala . . . E te vaai atu foʻi i le faaumatiaga o tagata amioleaga.” * (Salamo 37:34) Pe a tafiesea tagata amioleaga, ona lē toe aafia lea o auauna faamaoni a le Atua i faiga piʻopiʻo.

Satani le Tiapolo

O lē ua sili ona agasala ma lē fia salamō, o Satani le Tiapolo. Ae maʻeu lo tatou fiafia ona e lē o toe umi ona taofia lea e le Atua Satani mai i le taaʻina o tagata. Mulimuli ane o le a faaumatia atoatoa loa o ia, ma e lē toe aafia tagata i ana taaʻiga.

Peitaʻi, o le manatu o le a tafiesea e le Atua pogai o faiga piʻopiʻo, e tai pei ua na o se miti. E te ono manatu: ʻPe e finagalo moni lava le Atua e faataunuu na suiga? Pe afai o lea, aiseā ua ia lē gaoioi ai loa i le taimi nei?’ O ni fesili faatupu manatu na, ma o loo i le Tusi Paia ni tali faamalieloto. * E matou te valaaulia oe ina ia iloilo aʻoaʻoga a le Tusi Paia e uiga i le lumanaʻi, i le taimi o le a lē toe iai ni faiga piʻopiʻo.

[Faaopoopoga i lalo]