Ua Fesili Mai le ʻAufaitau . . .

Pe e Faalagolago le Fiafia i le Faaipoipo?

▪ Po o aʻoaʻoina i le Tusi Paia e faatoʻā e maua le fiafia pe a e faaipoipo? Atonu e iai nisi o mau e foliga mai o loo lagolagoina ai lenā manatu. E faapefea?

E tusa ai ma le tala o loo i le Kenese, na silasila mai le Atua e “lē lelei” mo Atamu ona ola na o ia, o lea na Ia faia ai Eva “o sē e talafeagai” mo Atamu. (Kenese 2:18) O le upu “talafeagai” e uiga atu i le faaatoatoaina o se mea. I lenā tala, e tatou te ono manatu ai e lē atoatoa se tasi pe afai e lē faaipoipo. E lē gata i lea, e tele isi tala o loo i le Tusi Paia e taʻua ai le faaipoipoga o se puna o faamanuiaga ma le fiafia, e pei o le tala iā Ruta.

Peitaʻi, po o aʻoaʻoina mai i na tala e faatoʻā fiafia ma faaatoatoaina se Kerisiano pe a faaipoipo ma fai fanau? E leai, auā o Iesu Keriso le tagata e sili ona atoatoa na soifua i le lalolagi, ae sa tumau ona lē faaipoipo seʻia oo ina maliu. O Iesu o le tagata e silisili ona atamai, ma o le faatusa lelei atoatoa o le “Atua fiafia” o Ieova. (1 Timoteo 1:11; Ioane 14:9) Sa faailoa mai e Iesu le auala e maua ai le fiafia ma faamanuiaga i lenei lalolagi, ae e na te leʻi taʻua ai le faaipoipo.—Mataio 5:1-12.

O lea, po ua feteenaʻi le Tusi Paia e tusa ai o lenei mataupu? E leai. E tatau ona tatou iloilo le tulaga o le faaipoipoga e tusa ma le fuafuaga a Ieova. E ui sa ia faatulaga le faaipoipoga ina ia maua ai le fiafia, faapelepele ma le faamāfanafana, ae sa iai foʻi se matafaioi autū i le faataunuuina o nisi o vala o lona finagalo. O se faataʻitaʻiga, o le fuafuaga a le Atua mo Atamu ma Eva o le “fanafanau ma ia matuā faatoʻateleina, ia tumu ai le lalolagi.” (Kenese 1:28) Sa lē mafai e Atamu na o ia ona faataunuu le fuafuaga lenā a le Atua, ma e faapena foʻi Eva, auā na manaʻomia e le tasi le isi ina ia faaatoatoaina ai i laʻua uma.

I se tulaga tutusa, sa iai ni fuafuaga patino a Ieova sa aofia ai le faaipoipo ma olaga faaleaiga, a o ia feutagaʻi ma le nuu o Isaraelu anamua. Sa finagalo o ia ina ia faatoʻateleina lona nuu ina ia aua neʻi faatoʻilalo ai e o latou fili. Sa ia fuafuaina foʻi o le a tupuga mai le Mesia i le ituaiga o Iuta, o lē o le a laveaʻiina tagata faamaoni mai i le agasala ma le oti. (Kenese 49:10) Na manatu fafine faamaoni o Isaraelu, o se faaeaga faapitoa le faaipoipo ma le faia o fanau, ae o se luma pe afai e lē faia faapea.

Ae ā aso nei? Pe e tatau i tagata ona faaipoipo ma fanafanau, ona o le poloaʻiga anamua a le Atua ina ia ʻfaatumu le lalolagi?’ E leai. (Mataio 19:10-12) E lē o toe manaʻomia e le Atua ona puipuia le gafa o le a tupuga mai ai le Mesia, po o le nuu o le a fanau mai ai o ia. O le ā la le manatu e tatau ona iai i Kerisiano e tusa ai o le faaipoipo ma le nofofua?

O le mea moni, o nei tulaga uma o ni meaalofa mai i le Atua, ae atonu o le meaalofa e fetaui i le isi, e lē fetaui i le isi. O le faaipoipoga o se faatulagaga paia e maua ai le alofa, faauōga, ma se faavae malosi mo se aiga. I le taimi e tasi, o loo taʻua manino i le Tusi Paia o i latou e faaipoipo i lenei lalolagi lē lelei atoatoa o le a feagai ma faafitauli, po o “puapuaga i o latou tino.” Ae e tusa ai o le tulaga nofofua, e lē silasila i ai Ieova o se tulaga e māsiasi ai. Nai lo lea, o loo faapea mai lana Afioga e iai ni tulaga e lelei ai le nofofua nai lo o le faaipoipo.—1 Korinito 7:28, 32-35.

I le Tusi Paia, e tutusa le tulaga o le faaipoipo ma le nofofua. E finagalo Ieova o Lē na faavaeina le faaipoipoga ma aiga, ina ia fiafia ma faamalieina ana auauna uma, e tusa pe e nofofua pe e faaipoipo.