Pe e Mafai Ona E Faamaoni i Lenei Lalolagi?

“Matou te mananaʻo ina ia faia mea uma ma le faamaoni.”—EPERU 13:18.

E UI o loo tatou aafia i tulaga agasala, o taaʻiga a lenei lalolagi, ma omiga mai i le Tiapolo, ae e mafai lava ona tatou teena na aafiaga. E faapefea? E ala i le mafuta vavalalata atu i le Atua, ma faatatauina mataupu silisili o le Tusi Paia ia ua faamaonia le aogā. Mātau nisi o faataʻitaʻiga se lua.

MATAUPU SILISILI O LE TUSI PAIA: “Aua foi tou te amio faatasi ma lenei lalolagi.”—Roma 12:2, Tusi Paia Samoa, Lomiga 1969.

Se tala moni: O Guilherme o se tagata faipisinisi taulau manuia mai i Pasili, na taʻutino mai e lē faigofie le faamaoni. Na faapea mai o ia: “E faigofie ona lē faamaoni se tagata faipisinisi pe afai o loo taumafai e ausia nisi o sini, po o le manaʻo foʻi e taulau i tauvaga faapisinisi. E manatu le toʻatele o se mea masani le faia o faiga faagaoi, ma e matuā faigatā foʻi  ona faamaoni se tagata faipisinisi o loo gafa ma le vaaia o tulaga tautupe.”

E ui lava i lenā, ae sa mafai lava e Guilherme ona teena omiga ina ia lē faamaoni. Ua faapea mai o ia: “E mafai ona faamaoni se tasi e oo lava i siʻomaga faapisinisi e taatele ai faiga piʻopiʻo. E tatau ona tausia amioga tatau, ma ua fesoasoani le Tusi Paia iā te aʻu ina ia iloa aogā o le faamaoni. E maua e se tagata faamaoni se lotofuatiaifo mamā, e filemu le loto, e faaaloalogia, ma e iai foʻi sona aafiaga lelei i isi.”

MATAUPU SILISILI O LE TUSI PAIA: “O i latou o ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai. Auā o le manaʻo tele i tupe o le pogai lea o mea leaga eseese uma.”—1 Timoteo 6:9, 10.

Se tala moni: O André e iai sana kamupani e gafa ma le vaaia o le saogalemu, ma o se tasi o vaega e faaaogāina la latou auaunaga o se kalapu soka. I se tasi o aso ina ua uma se taaloga soka, na alu atu ai André i le ofisa e aumai le totogi o lana auaunaga. Na matuā pisi le pulega e faitau tupe na maua i le faatauina atu o pepa ulufale. Ae ona ua leva le aso, na faatopetope ai ona totogi e le pule ia tagata na aitalafu i ai, e aofia ai ma André.

Ua faapea mai André: “A o ou alu i le fale, na ou iloa ai ua sili mai le tupe na aumai, ma e lē taitai ona iloa e le pulega lē ua sili i ai. Na ou iloa foʻi o le a toe totogi e si pule le tupe ua sili mai, o lea na ou filifili ai loa e toe faafoʻi le tupe. Sa matuā faateʻia le pule, auā e lē taitai ona faafoʻi atu e se tasi se tupe iā te ia.”

Ua faapea atili mai André: “O lenā gaoioiga faamaoni na faaaloalogia ai aʻu e le pule. Ua tele tausaga talu ona mavae lenā mea, ma e na o aʻu lava o loo tumau pea ona ia faaaogāina laʻu auaunaga. Ou te lagona le lotofaafetai, ona o le faaaogāina o tapulaa maualuluga tau amio a le Tusi Paia, ua ou maua ai se talaaga lelei.”

O se faalaeiauga le iloa, e mafai ona teena faiga piʻopiʻo, e ala i le fesoasoani a le Atua. Peitaʻi, e lē mafai ona tafiesea faiga piʻopiʻo e ala i taumafaiga a tagata taʻitoʻatasi, ona e matuā faigatā ona foʻia. Po o lona uiga la, o le a lē tafiesea faiga piʻopiʻo? O le a iloiloina i le mataupu o sosoo mai le tali faalaeiau mai i le Tusi Paia.

[Ata i le itulau 6]

[Faamatalaga faaopoopo i le itulau 6]

“Ua fesoasoani le Tusi Paia iā te aʻu ina ia iloa aogā o le faamaoni.”—GUILHERME

[Ata i le itulau 6]

[Faamatalaga faaopoopo i le itulau 6]

“Ou te lagona le lotofaafetai, ona o le faaaogāina o tapulaa maualuluga tau amio a le Tusi Paia, ua ou maua ai se talaaga lelei.”—ANDRÉ