Se Talanoaga Faale-Tusi Paia

Pe e Susunu e le Atua Tagata i le Afi i Seoli?

E FIAFIA Molimau a Ieova e talanoa ma tagata i le Tusi Paia. Pe e iai se mataupu faale-Tusi Paia o loo e mafaufau i ai? Po o e fia iloa talitonuga po o faiga faaletapuaʻiga a Molimau a Ieova? Pe afai o lea, ia talanoa atu i se Molimau i se taimi e te toe feiloaʻi i ai. O le a fiafia o ia e te lua talanoa i lenā mataupu.

O le talanoaga o loo mulimuli mai, o se talanoaga e masani ona fai e se Molimau a Ieova ma se tagata i le talaʻiga. Seʻi faapea ua alu atu le Molimau e igoa iā Toma i le fale o se tamāloa e igoa iā Alesana.

Pe e Susunu e le Atua Tagata Amioleaga?

Toma: Ua ou fiafia lava ua ta toe feiloaʻi.

Alesana: Ua ou fiafia foʻi ua e toe sau.

Toma: E iai se mea na e taʻua i le ta talanoaga mulimuli sa ou mafaufau lava i ai.

Alesana: O le ā lenā mea?

Toma: Na e fai mai ua faateʻia oe ina ua e faalogo e lē talitonu Molimau a Ieova i le afi i seoli.

Alesana: Oi ioe, faapea aʻu e lē o le tou talitonuga lenā.

Toma: Manaia lou manatu. E ese loʻu fiafia e faalogologo i manatu o isi. Talu ai e mau eseese tagata e faatatau i le afi i seoli, o le ā la sou manatu iai?

Alesana: Ou te talitonu, pe a feoti tagata amioleaga, e ō uma lava i le afi i seoli ma susunu ai e faavavau.

Toma: O le manatu taatele lenā. Ae seʻi oʻu fesili atu, pe e iai ni mea na tutupu i lou olaga na e faanoanoa ai?

Alesana: Ioe, i le lima tausaga ua mavae, sa fasiotia ai si oʻu tuafafine.

Toma: Talofa e! Ou te iloa ua e misia lava o ia.

Alesana: Ae ā, ou te mafaufau lava i ai i aso uma.

Toma: Ou te iloa o nisi tagata e maumauaʻi i le talitonuga i le afi i seoli, ona sa aafia fua i mea na faia e tagata amioleaga. O le pogai lenā e latou te fia vāai atu ai ua faasala tagata amioleaga.

Alesana: E saʻo lelei! Ou te manaʻo ia faasala le tagata na fasiotia loʻu tuafafine.

Toma: O o tatou faalogona masani na. Ua taʻua i le Tusi Paia e toʻatamaʻi foʻi le Atua pe a aafia fua ē e lē sala, ma folafola mai o le a ia faasalaina ē amioleaga. Mātau foʻi le manatu lenei ua taʻua i le Isaia 3:11: “Oi talofa i le tagata amioleaga! E malaia o ia; auā o mea na ia faia i isi e faapea foʻi ona faia iā te ia!” E mautinoa la o le a faasala e le Atua tagata amioleaga.

 Alesana: Ae e faapefea ona taunuu lenā mea, pe afai e leai se afi i seoli, e pei ona e fai mai ai?

Toma: Manaia lau fesili. O le tali puupuu, e faasala e le Atua tagata amioleaga i le faaumatiaga e faavavau. Mātau le faamatalaga a le Tusi Paia o loo i le 2 Tesalonia 1:9. Seʻi e fofogaina mai faamolemole.

Alesana: Fai mai: “O i latou lava ia e oo i ai le faasalaga tonu o le faaumatiaga e faavavau, e teʻa ese mai luma o le Alii.”

Toma: Mātau, e leai se faamoemoe mo tagata amioleaga e ola ai i le lumanaʻi, auā o le a faasala e le Atua i latou i le oti e faavavau.

Alesana: O lea ua ou iloa le mea o loo fai mai ai le mau, ae e lē fetaui auā e feoti uma lava tagata. Pe e lē tatau ona mamafa atu le faasalaga o tagata amioleaga?

O le ā e Manaʻomia i le Faamasinotonu?

Toma: Ou te iloa e te naunau i le faamasinotonu.

Alesana: Ioe, saʻo lelei a oe.

Toma: Mālō lava. O le mea moni, e iloa lelei e tagata le mea e saʻo ma le mea e sesē auā na faia i tatou e le Atua ma lenā tomai. E tāua foʻi iā te ia le faamasinotonu. Ae ina ua aʻoaʻo e taʻitaʻi lotu e faasala e le Atua tagata i le afi i seoli, ua latou faaalia ai e matuā lē faamasinotonu le Atua.

Alesana: O le ā le uiga o lau tala?

Toma: Seʻi fai se faataʻitaʻiga. O lenā e te iloa le tala e uiga iā Atamu ma Eva, a ea?

Alesana: Ioe, na fetalai le Atua iā i laʻua e aua neʻi ʻaina le fua o le laau, ae e la te leʻi usiusitaʻi.

Toma: Ioe, o lenā. Seʻi ta faitau faatasi la i lenā tala, i le Kenese 2:16, 17. Fai mai le mau: “Ua tuuina atu foʻi e Ieova le Atua lenei poloaʻiga i le tagata: ʻE mafai ona e ʻai i laau uma o le faatoʻaga ma e maʻona ai. A o le laau e iloa ai lelei ma le leaga, aua neʻi e ʻai ai, auā o le aso e te ʻai ai, e te oti ai lava.’” O le ā le mea na fetalai le Atua o le a tupu pe a ʻai e Atamu le fua o le laau na faasāina?

Alesana: E oti.

Toma: Saʻo lelei, mātau: O le agasala a Atamu, ua māfua ai ona fananau mai tagata uma ma le agasala. * Ae e tusa ai ma le mau, pe na fetalai le Atua e uiga i le susunuina i le afi i seoli?

Alesana: Leai.

Toma: Pe afai sa lamatia Atamu ma Eva i le faapuapuagatia e faavavau, pe sa lē tatau la i le Atua ona lapataʻia i laʻua? Pe e lē o le mea tonu lenā ma alofa sa tatau ona fai?

Alesana: Ioe, o loʻu manatu foʻi lenā.

Toma: Seʻi o ta iloilo foʻi le fetalaiga a le Atua na fai atu iā Atamu ma Eva ina ua agasala. Seʻi e faitau mai le Kenese 3:19 faamolemole.

Alesana: Ia ua lelei, fai mai: “E te ʻai au meaʻai ma le afu o ou mata seʻia e toe foʻi atu i le eleele, auā na faia mai ai oe. Auā o le efuefu oe, e te toe foʻi atu lava i le efuefu.”

Toma: Faafetai lava. E tusa ai o le fetalaiga a le Atua, o fea e alu i ai Atamu pe a oti?

Alesana: E toe foʻi i le efuefu.

Toma: Ioe, o lenā. O lea la, pe e te ioe e faapea pe a toe foʻi se tagata i se nofoaga, o lona uiga sa iai muamua o ia i inā?

Alesana: Ioe.

Toma: O fea la sa iai Atamu a o leʻi faia o ia e le Atua?

Alesana: E leʻi iai se Atamu.

Toma: E saʻo, ma e lē o taʻua mai se afi i seoli i le faasalaga a le Atua. Pe e tonu i le Atua ona fai atu iā Atamu o le a toe foʻi atu i le eleele na faia mai ai o ia, ae o le mea moni o le a susunu i le afi i seoli?

Alesana: E leai, e lē fetaui lenā mea.

 Po o Faia e le Tiapolo le Finagalo o le Atua?

Toma: E iai se isi mea e ao ona ta iloiloina e faatatau i le aʻoaʻoga i le afi i seoli.

Alesana: O le ā lenā mea?

Toma: O ai e masani ona fai mai tagata e pule i le afi i seoli, ma e na te susunuina tagata?

Alesana: O le Tiapolo.

Toma: Ae o le Tiapolo o le fili sili lenā o le Atua. Afai la e ave e le Atua tagata i le afi i seoli ina ia susunuina ai e faavavau e le Tiapolo, po o lona uiga la e iai se fesootaʻiga i le va o le Atua ma le Tiapolo?

Alesana: E leʻi tau lava loʻu mafaufau i lenā mea.

Toma: Seʻi fai se faataʻitaʻiga. O oe foʻi o se tamā, a ea?

Alesana: Ioe, e iai loʻu atalii, e 15 ona tausaga.

Toma: Seʻi faapea ua matuā fouvale lava lou atalii, ua tele ana mea leaga e fai ma ua e faanoanoa ai lava. O le ā lau mea e fai?

Alesana: Ou te taumafai e faasaʻo o ia.

Toma: Ou te mautinoa o le a faaauau ona e fesoasoani i ai ia suia ona ala.

Alesana: Saʻo lelei.

Toma: Ae seʻi faapea ua uma au taumafaiga, ae e tetee mai lava. Atonu e leai se isi mea e mafai ona e faia, ae ia faasala loa o ia.

Alesana: Ioe, saʻo lelei a.

Toma: Ae faapefea pe a e iloa ane e iai se tagata leaga o loo aʻoaʻoina lou atalii e fai na mea leaga?

Alesana: Ou te matuā ita a i ai.

Toma: O le ā la sou manatu, ona o lea ua e iloa lenā tagata amioleaga o loo taaʻina lou atalii ina ia tetee iā te oe, po o le a e alu i ai e tago e faasala lou atalii?

Alesana: E leai, e matuā lē talafeagai lenā mea.

Toma: Pe e talafeagai la i le Atua ona fai atu iā Satani, o lē o loo taaʻina tagata amioleaga, ina ia faasala na tagata?

Alesana: E mautinoa e leai.

Toma: O lea la, afai na finagalo le Atua e faasala tagata amioleaga, aiseā la o le a ia faaaogā ai Satani lona fili sili, ina ia faia faapea?

Alesana: Ou te leʻi mafaufau lava i lenā mea.

O le a Tafiesea e Ieova Mea Leaga Uma

Toma: E mautinoa o le a gaoioi le Atua faasaga i ē amioleaga. Atonu toe tasi se mau e mafai ona faamanino ai lenei manatu. O le Salamo 37:9. E mafai ona e faitauina mai faamolemole?

Alesana: Fai mai: “Auā e faaumatia o ē e fai mea leaga, a o ē e faamoemoe iā Ieova, o i latou ia e fai mo i latou le lalolagi.”

Toma: Faafetai lava. E te mātauina o le ā o le a faia e Ieova le Atua i tagata amioleaga?

Alesana: Fai mai le mau o le a faaumatia i latou.

Toma: Saʻo. I nisi faaupuga, o le a ia faaumatia e faavavau i latou. Ae o tagata amiolelei, o “ē e faamoemoe iā Ieova,” o le a olioli i le ola e faavavau i inei i le lalolagi. Atonu la o le a lāgā ai nisi fesili i lou mafaufau. O se faataʻitaʻiga, aiseā na lē taofia ai e le Atua tagata mai i le faia o le mea leaga i le amataga? Ma afai e finagalo moni lava o ia e faasala tagata amioleaga, aiseā la ua ia lē faia ai loa faapea?

Alesana: Manaia na fesili.

Toma: Pe a ou toe asiasi mai, o le a ta talanoa i tali o na fesili mai i le Tusi Paia. *

Alesana: Manaia foʻi lenā tonu.

[Faaopoopoga i lalo]