“Ua Alaala Lē e Mai Anamuā Ona Aso”
Ia Mafuta Atu i le Atua
“Ua Alaala Lē e Mai Anamuā Ona Aso”
UA FAAPEA mai le Tusi Paia, “E leai lava se tasi ua vaai i le Atua.” (Ioane 1:18) Ona o le mamalu o le Atua, ua lē mafai ai e se tasi ona vaai iā te ia ma ola pea. (Esoto 33:20) Peitaʻi, i nisi vaega o le Tusi Paia, na faailoa atu ai e Ieova ni vaaiga i le lagi i nisi o tane tofia, e pei o le perofeta o Tanielu. O mea na vaaia e Tanielu, na ia lagona ai le migao ma le faaaloalo loloto, ma o se uiga e tatau foʻi ona iā i tatou. Seʻi mātau le auala na faamatala ai e Tanielu le vaaiga na ia iloa. *—Faitau le Tanielu 7:9, 10.
“Lē e mai anamuā ona aso.” O lenā faaupuga na faaaogā e Tanielu, e faailoa ai se tasi ua loa le soifua. (Tanielu 7:9, 13, 22) Faamata o le ā le matua o le soifua o Ieova? Ona o ia o le “Tupu o le vavau,” o lona soifuaga la e mai i le vavau e oo i le faavavau. (1 Timoteo 1:17; Iuta 25) O le māfuaaga lea e tatou te mautinoa ai e lē gata mai lona atamai. I le Tusi Paia, e masani ona taʻua faatasi le atamai ma le soifua matua. (Iopu 12:12) Peitaʻi, afai e faigatā ona tatou talitonu e soifua e faavavau Ieova, e faapefea la ona tatou faatalitalia e malamalama atoatoa i lona atamai?—Roma 11:33, 34.
Mātau, ua “alaala” Lē e mai anamuā ona aso. Aiseā? O loo taʻua i fuaiupu o loo siʻomia ai le mau se “Faamasinoga.” (Tanielu 7:10, 22, 26) O lea, i le vaaiga na iloa e Tanielu, o loo alaala Ieova o se Faamasino. O ai o loo ia faamasinoina? O atunuu uma o le lalolagi, lea e faaata i le vaaiga na iloa e Tanielu, i manu feʻai. * (Tanielu 7:1-8) O le ā le ituaiga o Faamasino e iai Ieova?
“O ona ofu ua papaʻe e pei o le kiona, ma lona lauao e pei o fulufulu mamoe mamā.” O le paʻepaʻe ua faaata mai ai le amiotonu ma le mamā. I le tulaga masani, e paʻepaʻe le lanu o le fulufulu mamoe, o lea la, o le lauao e pei o se fulufulu mamoe mamā, e lanu paʻepaʻe. Seʻi faapea ua e vaai i le vaaiga na iloa e Tanielu. Po o e iloa atu le Faamasino ulusinā o loo ofu i se ofu talaloa paʻepaʻe e pei o le kiona? O nei faaupuga faafaatusa, ua tatou iloa ai le amiotonu ma le saʻo o faamasinoga a Ieova. O ia o se Faamasino e tatau ona matuā maufaatuatuaina ma faaaloalo i ai.
“Ua auauna pea iā te ia le afe o ni afe, ma ua tutū pea i ona luma le selau miliona.” O ai nei auauna faalelagi? O loo taʻua i le Tusi Paia agelu o “ana [Atua] auauna.” (Salamo 104:4) E faitau selau miliona lo latou aofaʻi, ma o loo pisi i le ʻfaataunuuina o le afioga a le Atua ma fai lona finagalo.’ (Salamo 103:20, 21) Pe e lē o faamaonia ai ea le atamai tele o Ieova? E na o Ieova lava e mafai ona faamaopoopoina lenei ʻautau toʻatele i le lagi ma faapisi i latou mo le faitau miliona o tausaga.
O le vaaiga na iloa e Tanielu, ua faalaeiauina ai i tatou ina ia maufaatuatuaina Ieova, o Lē e mai anamuā ona aso. E tonu lana faamasinoga, ma e maufaatuatuaina lona atamai. Aiseā e lē iloilo ai pe e faapefea ona faalatalata atu i le Atua o lē e ona le atamai uma?
Faitauga Tusi Paia mo Oketopa:
[Faaopoopoga i lalo]
^ pala. 3 E leʻi vaai moni Tanielu i le Atua, ae na Ia tuu i le mafaufau o Tanielu ni vaaiga manino. O lea, na faaaogā e Tanielu se gagana faafaatusa e faamatala ai le mea na ia vaaia, e aofia ai le faaaogā o faaupuga faaletino e faamatala ai le Atua. O na faaupuga faafaatusa, e fesoasoani iā i tatou e iloa lelei ai le Atua, ae e lē o ni mea moni na vaaia e Tanielu.
^ pala. 5 Mo nisi faamatalaga e faatatau i le vaaiga na iloa e Tanielu i manu feʻai, tagaʻi i le mataupu e 9 o le tusi Uaʻi Atu i le Valoaga a Tanielu! lomia e Molimau a Ieova.
[Faamatalaga faaopoopo i le itulau 18]
O ia o se Faamasino e tatau ona matuā maufaatuatuaina ma faaaloalo i ai
