Fesili 1: Pe e Iai se Fuafuaga o Loʻu Olaga?

NA SOIFUA aʻe Rosalind i Egelani ma sa matuā naunau e maua le atamai, ma manaʻo foʻi e fesoasoani i isi. Ina ua faauu mai i le aʻoga, sa ia maua se galuega e sili ona lelei e fesoasoani ai i tagata e maumausolo i auala, ma ē e lē atoatoa le malosi o le tino ma le mafaufau. E ui na faamalieina o ia i lana galuega ma maua le tele o mea, ae ua faapea mai o ia: “E tele tausaga o ou tuufesili, ʻAiseā ua tatou iai i inei?’, ma ʻO le ā le fuafuaga o le olaga?’”

Māfuaaga o le fesili. E lē pei tagata o manu e leai ni mafaufau, ona e iai lo tatou tomai e aʻoaʻo ai lesona mai i mea ua tuanaʻi, fuafua mamao mo le lumanaʻi, ma vaavaai mo se fuafuaga o le olaga.

Manatu o isi. E manatu le toʻatele, o le fuafuaga autū o le olaga e maua ai le fiafia, o le tele o ʻoa ma le taʻutaʻua.

O le ā ua faaalia i na manatu? E pule i tatou i mea e faamuamua i o tatou olaga, ma e sili o tatou manaʻoga nai lo o le finagalo o le Atua.

Aʻoaʻoga a le Tusi Paia. E ui na tamaoaiga le tupu o Solomona ma olioli i le tele o mea, ae na ia iloa e lē mafai e na mea ona aumaia se fuafuaga moni o le olaga. Na ia faailoa mai le auala e maua ai le fuafuaga o le olaga ina ua tusi e faapea: “O le faaiʻuga lenei o mea uma ua faalogo i ai: Ia mataʻu i le Atua moni ma tausi i ana poloaʻiga. Auā o le matafaioi lea a tagata.” (Failauga 12:13) O le ā e aofia ai i le tausia o poloaʻiga a le Atua?

O se vaega o le fuafuaga a le Atua mo i tatou o le olioli lea i le olaga. Na tusi Solomona: “E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega  mamafa. O aʻu, ua ou vaai foʻi i lea mea, ma iloa ai o le mea lea e mai i le aao o le Atua moni.”—Failauga 2:24.

E finagalo foʻi le Atua ina ia tatou tausia ma alolofa i o tatou aiga. Mātau nisi o taʻiala faigofie ma aogā ua tuu mai i sui taʻitoʻatasi o le aiga.

• “E tatau i tane ona alolofa atu i a latou avā e pei o o latou lava tino.”—Efeso 5:28.

• “A o le avā, ia matuā faaaloalo o ia i lana tane.”—Efeso 5:33.

• “Le fanau e, ia usiusitaʻi i o outou mātua.”—Efeso 6:1.

E maua le fiafia ma le faamalieina, pe a tatou faatatauina na fautuaga mai i le Tusi Paia. Peitaʻi, o le mea sili e ao ona fai, o le iloa lelei lea o Lē na faia i tatou ma mafuta vavalalata atu i ai e pei o se Uō. O le mea moni, o loo i le Tusi Paia se valaaulia ma se folafolaga mataʻina e faapea: “Ia mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) Pe a e talia lea valaaulia, o le a e maua se fuafuaga moni o le olaga.

Ua iloa nei e Rosalind lea na taʻua i le amataga, ua ia maua se fuafuaga moni o lona olaga. E mafai ona e faitau i lana faamatalaga i le auala na suia ai ona manatu, i le itulau e 10 o lenei lomiga.

Mo nisi faamatalaga i le auala e mafai ona e faafiafia ai le Atua i lou olaga, tagaʻi i le mataupu e 12 o le tusi O ā Aʻoaʻoga Moni a le Tusi Paia? E maua foʻi i le initaneti i le www.pr418.com

[Pusa i le itulau 5]

Le Manatu o Iesu i le Fuafuaga o le Olaga.

Na iloa lelei e Iesu le fuafuaga o lona olaga, auā na faapea mai o ia: “O le mea lea na ou fanau mai ai, o le mea foʻi lea na ou sau ai i le lalolagi, ina ia ou molimau i le upu moni.” (Ioane 18:37) Na faaaogā e Iesu lona olaga e aʻoaʻo ai isi i upu moni e uiga i le Atua ma Lana fuafuaga.

E tatou te maua se fuafuaga moni o le olaga pe a faaaʻoaʻo iā Iesu, auā ua ia valaaulia i tatou e faia faapea. (Mataio 11:29) Mātau ni auala se lua e tatou te faaaʻoaʻo ai iā te ia.

E maua le fiafia pe a “naunau i mea faaleagaga.” (Mataio 5:3) E faamalieina o tatou manaʻoga faaleagaga pe a tatou iloa lelei “le Atua moni e toʻatasi, atoa ma lē na [Ia] auina mai, o Iesu Keriso.”—Ioane 17:3.

E tatau ona aʻoaʻo isi i mea ua tatou iloa. Na faapea atu Iesu i ona soo: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.”—Mataio 28:19, 20.

Ua iloa e i latou o loo faamalieina o latou manaʻoga faaleagaga e ala i le suʻesuʻe o le Tusi Paia, ma faatatau mea ua aʻoaʻoina, le faaleleia o o latou olaga. O le aʻoaʻoina foʻi o isi ina ia iloa lelei le Atua, ua faamausalī atili mai ai le iai o se fuafuaga moni o o latou olaga.

[Ata i le itulau 4]