Fesili 3: Aiseā ua Lē Taofia ai e le Atua Oʻu Mafatiaga?

O LE tamā o Ian o se tagata e inu tele i le ʻava malosi. E ui sa maua e Ian le tausiga faaletino sa ia manaʻomia, ae e na te leʻi maua le lagolagosua i le itu tau i faalogona, lea sa ia manaʻomia mai i lona tamā. Na faapea mai o ia: “Ou te leʻi alofa i loʻu tamā ona o lana masaniga, aemaise le auala e na te faileagaina ai loʻu tinā.” A o tuputupu aʻe, sa amata ona ia fesiligia pe e iai se Atua. Na ia faapea mai: “ʻPe afai e iai moni se Atua, aiseā la ua ia lē taofia ai puapuaga o tagata?’”

Māfuaaga o le fesili. E tusa pe e lē tele ni faafitauli i lou olaga, ae e te lagona lava le lē fiafia pe a vaaia tagata lē sala o mafatia. Peitaʻi, i le pei o Ian, o le a sili atu ona tāua lenei fesili e faatatau i mafatiaga pe afai e oo moni lava iā te oe faigatā, maʻi se tasi e pele iā te oe, pe e maliu foʻi.

Manatu o isi. E manatu isi, e faataga e le Atua mafatiaga ona e tofotofoina ai i tatou, ma aʻoaʻo ai ina ia lotomaulalo ma alolofa. A o isi e manatu ua māfua mafatiaga, ona o ni agasala sa tatou faia i le taimi ua teʻa, po o ni agasala o loo natia.

O le ā ua faaalia i na manatu? E faigatā ona tatou alolofa i le Atua ona e lē manatu mamafa mai i mafatiaga o tagata, ma e sauā o ia.

Aʻoaʻoga a le Tusi Paia. Ua faaalia manino mai i le Tusi Paia, e lē tuuaʻia le Atua i mafatiaga o tagata. “Pe a faaosoosoina se tasi, aua neʻi manatu: ʻUa faaosoosoina aʻu e le Atua.’ E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (Iakopo 1:13) O le mea moni, e lē ōgatusa le manatu e faapogaia e le Atua mafatiaga, ma le auala o loo faamatala ai ona uiga i le Tusi Paia. E faapefea?

O se tasi o uiga autū o le Atua o le alofa. (1 Ioane 4:8) Ina ia faamamafa lenā manatu, ua faamatala e le Tusi Paia le Atua o sē e iai ni ona uiga e pei o se tinā failele. Na fesili mai le Atua: “Pe e mafai ona galo i se tinā lana tama o loo susu, ma lē alofa i le tama tama a lona manava?  E galo foʻi i nei tinā ae e lē galo oe iā te aʻu.” (Isaia 49:15) Pe e iai se tinā alofa e na te faileagaina lana lava pepe? E pei ona lē faapogaia e se matua alofa mafatiaga o lana tama, e faapena foʻi ona lē faapogaia e le Atua mafatiaga o tagata.—Kenese 18:25.

Peitaʻi, ona o loo mafatia pea tagata lē sala, e te ono mafaufau la, ʻAfai e alofa mai le Atua ma e tele lona mana, aiseā la ua ia lē aveesea ai le pogai o mafatiaga?’

E iai māfuaaga lelei ua lē taofia ai e le Atua mafatiaga. O se tasi o māfuaaga: O tagata lava e masani ona faapogaia mafatiaga i isi. O le toʻatele o tagata sauā ma fia malolosi, e lē mananaʻo e suia o latou uiga. O lea, ina ia aveesea e le Atua le pogai autū o mafatiaga, e tatau ona ia faaumatia na tagata.

Na faamatala mai e le aposetolo o Peteru le māfuaaga ua lē faaumatia ai e le Atua tagata o loo faia mea sesē, ina ua ia tusi: “E lē faatuai mai Ieova e tusa ma lana folafolaga, e faapei ona manatu ai isi tagata i le faatuai, ae o loo onosaʻi mai pea o ia iā te outou, auā e lē finagalo o ia e faaumatia se tasi, ae e finagalo ia oo uma lava i le salamō.” (2 Peteru 3:9) O le onosaʻi o Ieova o se faailoaga lea o lona alofa mutimutivale ma lona agalelei.

Peitaʻi e lē o toe umi ona gaoioi loa lea o le Atua. O le a ia “taui atu . . . puapuaga i ē ua faapuapuagatiaina” ē e lē sala. O i latou o loo faapogaia mafatiaga o le a “oo i ai le faasalaga tonu o le faaumatiaga e faavavau.”—2 Tesalonia 1:6-9.

Na maua e Ian lea na taʻua i le amataga, ni tali faamalieloto i lana fesili e uiga i puapuaga, ma na suia ai ona manatu i le olaga. Faitau i lana tala i le itulau e 13 o lenei lomiga.

Mo nisi faamatalaga i le māfuaaga ua lē taofia ai e le Atua mafatiaga, ma le mea o le a ia faia, tagaʻi i le mataupu e 11 o le tusi O ā Aʻoaʻoga Moni a le Tusi Paia? E maua foʻi i le initaneti i le www.pr418.com

[Pusa i le itulau 9]

Le Manatu o Iesu i Mafatiaga.

E leʻi tuuaʻia e Iesu le Atua mo mafatiaga na ia vaaia. Nai lo lea, sa ia faailoa mai mea o loo mulimuli mai.

E lē faasalaina e le Atua tagata e lē sala e ala i mafatiaga. Na faamālōlō e Iesu ē mamaʻi, pipili ma tauaso. (Mataio 15:30) E lua ni mea moni tāua e tatou te aʻoaʻoina mai i vavega sa ia faia: Muamua, na faaaogā e Iesu le mana o le Atua e aveesea ai mafatiaga, ae e lē ina ia faapogaia ai. Lona lua, e leʻi faamālōlō e Iesu tagata e aunoa ma le alofa i ai, auā na ʻmutimutivale lona alofa’ ina ua vaai atu i tagata o mafatia. (Mataio 20:29-34) Na faaalia atoatoa mai e Iesu faalogona o lona Tamā e uiga i mafatiaga. O lea, e tatou te aʻoaʻoina mai i upu ma gaoioiga a Iesu, o loo tigā le finagalo o le Atua i mafatiaga o loo silasila mai ai, ma e finagalo ina ia tafiesea.—Ioane 14:7, 9.

O Satani le Tiapolo le pogai moni o mafatiaga. Ua faapea mai Iesu: “O [Satani] o le fasioti tagata talu le amataga.” (Ioane 8:44) Na faailoa mai foʻi e Iesu o Satani o “le pule o lenei lalolagi,” ma o lē ua “faasesēina le lalolagi atoa.”—Ioane 12:31; Faaaliga 12:9.

O le a lē toe iai ni mafatiaga. Na aʻoaʻo e Iesu ona soo ina ia tatalo: “Lo matou Tamā e o i le lagi, . . . ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Pe a oo mai le Malo o le Atua, o le a lē toe iai ni mafatiaga i le lalolagi e pei foʻi ona lē iai i le lagi.

I le vaaiga na iloa e le aposetolo o Ioane, na faamatala mai ai e Iesu le ituaiga o olaga o le a maua e i latou e ola i le lalolagi, i le pulega a le Malo o le Atua. O le taimi lenā o le a ʻsoloiesea ai e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’—Faaaliga 1:1; 21:3, 4.

[Ata i le itulau 8]