Lagolago e le Faamasinoga i Europa Aiā a Tagata

UA LAUILOA Molimau a Ieova i le lalolagi aoao i lo latou solitū, pe a oo i faiga faapolotiki ma taua. E latou te matuā talitonu e tatau ona “tuʻi a latou pelu e fai ma uʻamea suōtosina,” ma e lē toe “aʻoaʻo foʻi i taua.” (Isaia 2:4) E latou te lē aiā fua i ē o filifili e auauna i vaegaʻau o taua. Ae faapefea pe a filifili le lotofuatiaifo o se Molimau e lē auai i le vaegaʻau, ae o loo iai se tulafono a lona atunuu e faamalosia ai? O le tulaga lenā na fesagaʻia e se tane talavou e suafa iā Vahan Bayatyan.

Mea na Tutupu na Iʻu ai i le Faamasinoga i Europa

Na fanau Vahan i Armenia iā Aperila, 1983. I le 1996, na suʻesuʻe ai o ia ma isi tagata o lona aiga i le Tusi Paia, faatasi ma Molimau a Ieova, ma na papatiso ina ua 16 ona tausaga. I lana suʻesuʻega o le Tusi Paia, na ia faatāua ai aʻoaʻoga a Iesu Keriso, e aofia ai lana faatonuga i ona soo, ina ia aua neʻi fetagofi i auupega o taua. (Mataio 26:52) Peitaʻi, ina ua mavae sina taimi talu ona papatiso Vahan, ae fesagaʻia loa se filifiliga faigatā i lona olaga.

O le tulafono a le malo o Armenia, e 18 loa tausaga o se alii ona auai loa lea i le vaegaʻau. A latou teena, o le a faafalepuipuiina i latou e oo atu i le tolu tausaga. Na manaʻo Vahan e auauna mo lona atunuu, ae e leʻi manaʻo foʻi e faatigā i lona lotofuatiaifo ua aʻoaʻoina e le Tusi Paia. O lea, o le ā na ia faia?

O le 2001 na ausia ai e Vahan tausaga e auai ai i le vaegaʻau, o lea na tusi atu ai o ia i tagata maualuluga o le malo o Armenia. I lana tusi, na ia taʻua ai o lenei auaunaga e aafia ai lona lotofuatiaifo ma ona talitonuga  faalotu. Na ia faailoa atu foʻi lona lotomalie e faia se isi auaunaga faalemalo mo le lautele.

E silia ma le tausaga o tulaʻi pea Vahan i luma o tagata maualuluga, e faailoa atu lona solitū. Peitaʻi, na loka o ia iā Setema 2002, ae mulimuli ane molia i le teena o le faatonuga e auai i le vaegaʻau. Na faasala o ia mo le 18 masina i le falepuipui. Peitaʻi e leʻi faamalieina le itu tetee i le faasalaga na avatu iā Vahan, ma finau e toe faaopoopo se isi faasalaga mamafa. Na finau le itu tetee, o le filifiliga a Vahan e lē auai i vaegaʻau ona o lona lotofuatiaifo, “e lē faavaea ma e iai sona lamatiaga.” Na talia e le faamasinoga le talosaga a le itu tetee, ma faaopoopo ai le isi 12 masina i le faasalaga a Vahan.

Na apili e Vahan le iʻuga o le faamasinoga maualalo, i luma o le Faamasinoga e Sili Ona Maualuga a Armenia. I a Ianuari 2003, na lagolago ai e le faamasinoga maualuga le faaiʻuga a le faamasinoga maualalo. Na auina atu loa Vahan i se falepuipui e tuli ai lona faasalaga faatasi ma le ʻaufasioti tagata, o ē faatau fualaau faasāina, ma le ʻau toso teine.

Le Faamasinoga i Europa

O le 2001 na avea ai Armenia ma sui o le Faalapotopotoga o le Fono a Europa. O lea, na iai le aiā a tagata Armenia ina ia apili a latou tagi i le Faamasinoga o Aiā Tatau i Europa (ECHR), pe afai ua siliga se fesoasoani mai le faamasinoga a lo latou atunuu. O le mea lenā na filifili Vahan e fai. I lana apili, na ia finau ai, o le faasalaga na tuu atu e le malo o Armenia, ua solia ai le Vaega 9 o le tulafono a le Faalapotopotoga o Maliega mo Aiā Tatau a Tagata i Europa. Na ia talosaga e puipuia lana filifiliga e lē auai i vaegaʻau e faavae i lona lotofuatiaifo, i lalo o le Vaega 9 o le tulafono—o se mataupu e leʻi manumalo ai lava se tasi na finauina.

I a Oketopa 27, 2009, na faia ai le faaiʻuga a le ECHR i le mataupu. Na taʻua i le faamasinoga, o le saʻolotoga e faia ai se filifiliga e faavae i le lotofuatiaifo, e pei ona faamauina i le Vaega 9 o le tulafono a le Faalapotopotoga o Maliega i Europa, e lē o puipuia ai le aiā a se tagata e tetee e auai i le vaegaʻau.

E oo ane i le taimi lenā ua leva ona magalo mai Vahan, ua faaipoipo, ma ua fai sona atalii. Na matuā lē fiafia Vahan i le faaiʻuga a le faamasinoga. O lea na filifili ai pe e faataatia le mataupu pe toe apili i le Faamasinoga Sili a le ECHR. Na filifili Vahan e toe apili lana talosaga, ma na fiafia o ia ina ua talia e le Faamasinoga Sili lana apili, auā e na o mataupu tāua e latou te iloiloina.

 Mulimuli ane iā Iulai 7, 2011, i Strasbourg i Falani, na tolaulau ai e le Faamasinoga Sili a le ECHR le faaiʻuga. Mai le 17 o faamasino sa palota, e 16 na faamaonia ua solia e le malo o Armenia le aiā a Vahan, ina ua latou molia ma faafalepuipui o ia i lona solitū. Ae o le palota e tasi lea na tetee, o le faamasino mai Armenia.

Aiseā e mataʻina ai lenei faaiʻuga? Talu ai o le taimi muamua lea i le talafaasolopito o le Faamasinoga Sili a le ECHR, ua malupuipuia ai i lalo o le Vaega 9 o le tulafono, le filifiliga a se tagata e lē auai ai i le vaegaʻau, e faavae i lona lotofuatiaifo. O le iʻuga, na faaalia i le faamasinoga, o se solitulafono i se atunuu tutoʻatasi le faafalepuipui o se tagata, ona o sana filifiliga e lē auai i le vaegaʻau, e faavae i lona lotofuatiaifo.

Na faia e le Faamasinoga Sili se faamatalaga e faatatau i Molimau a Ieova ma lenei tulaga e faapea: “E malamalama ma ioe le Faamasinoga Sili, e māfua ona solitū nei tagata ona o talitonuga faalotu, ma o na talitonuga e lē mafai ona latou lē amanaʻia.”

Tali e Tusa ai ma le Faaiʻuga

Talu mai le lua sefulu tausaga ua mavae, e silia ma le 450 Molimau a Ieova ua molia i Armenia, i le lē auai i le vaegaʻau ona o a latou filifiliga e faavae mai i le lotofuatiaifo. I le taimi a o tuufaatasia lenei lomiga, e 58 alii na faafalepuipui i Armenia ona na lē auai i le vaegaʻau, e tusa ai ma la latou filifiliga e faavae i le lotofuatiaifo. O le toʻalima o i latou, na faafalepuipui ina ua mavae le faaiʻuga mataʻina i le mataupu a Vahan ma le malo o Armenia. * O se tasi o na alii na talosaga atu i le lōia a le itu tetee, ina ia faaui i tua moliaga faasaga iā te ia. Ae na teena e le lōia le talosaga ma faapea mai: “O le faaiʻuga a le Faamasinoga i Europa iā Iulai 7, 2011, e faatatau iā Vahan ma le malo o Armenia, e leai ma se sootaga i lenei mataupu.”

Aiseā na manatu ai faapena le lōia? I le taimi na molia ai Vahan, e leai se galuega mo le lautele na mafai ona sui aʻi le auai i le vaegaʻau. Talu mai lenā taimi, na faia ai e le malo o Armenia ni galuega mo le lautele, e mafai ona faia e i latou e mumusu e auai i le vaegaʻau. Peitaʻi, o na galuega mo le lautele e i lalo foʻi o le vaavaaiga a le vaegaʻau, ma e lē mafai foʻi e i latou e lē auai i le vaegaʻau ona faia na galuega, ona o filifiliga e faavae mai i o latou lotofuatiaifo.

Na faafiafiaina Vahan ona o le faaiʻuga mataʻina na manumalo ai i le faamasinoga. Ua faatonuina nei e le faamasinoga le malo o Armenia, e taofia le molia ma le faafalepuipuiina o tagata taʻitoʻatasi, ia e filifili e lē auai i le vaegaʻau e faavae mai i o latou lotofuatiaifo.

E lē o le fuafuaga a Molimau a Ieova ina ia faaofi atu nisi tulafono e ese mai i tulafono a le atunuu. Peitaʻi, e pei o le mea na fai e Vahan Bayatyan, e latou te faailoa atu a latou aiā tatau e faavae i tulafono ua uma ona tusitusia a o latou atunuu. Aiseā? Ina ia faaauau pea ona latou nonofo fifilemu, ma saʻoloto e usiusitaʻi atu i lo latou Taʻitaʻi o Iesu Keriso.

[Faaopoopoga i lalo]

[Ata i le itulau 30]

Vahan Bayatyan i luma o le falepuipui o Nubarashen i Armenia

[Ata i le itulau 30]

Vahan ma ana lōia i le Faamasinoga o Aiā Tatau i Europa, Novema 24, 2010

[Ata i le itulau 31]

Vahan ma lana avā o Tsovinar, ma lona atalii o Vahe