Olaga i Taimi o le Tusi Paia—Le Leoleo Mamoe

“E na te leoleoina lana lafu mamoe e pei o se leoleo mamoe. E na te aoaoina tamaʻi mamoe i lona aao; ma tauave mamoe i lona fatafata.”—ISAIA 40:11.

E TELE taimi e taʻua ai leoleo mamoe i le Tusi Paia, e mai lava i le Kenese seʻia oo i le Faaaliga. (Kenese 4:2; Faaaliga 7:17) O nisi tane taʻutaʻua e pei o Aperaamo, Mose, ma le Tupu o Tavita, o i latou o ni leoleo mamoe. Na faamatalaina ma le matagofie e le faisalamo o Tavita le matafaioi ma popolega o se leoleo mamoe lelei. Na taʻua foʻi e le faisalamo o Asafo Tavita o sē na leoleoina le nuu o le Atua i aso anamua.—Salamo 78:70-72.

I taimi foʻi o Iesu, sa tāua pea le galuega a le leoleo mamoe. Na taʻua e Iesu o ia lava o se “leoleo mamoe lelei,” ma e masani ona ia faaaogā uiga o se leoleo mamoe lelei e aʻoaʻo mai ai ni lesona tāua. (Ioane 10:2-4, 11) E oo foʻi iā Ieova le Atua o Lē e ona le malosi uma lava, na taʻua foʻi o se “leoleo mamoe.”—Isaia 40:10, 11; Salamo 23:1-4.

O ā ituaiga o manu na tausia e leoleo mamoe? O ā mea e aofia i lana galuega? Ma o le ā e tatou aʻoaʻoina mai i na tagata galulue mamafa?

Mamoe ma ʻOti

I Isaraelu anamua, e masani ona tausia e se leoleo mamoe ituaiga eseese o mamoe, e aofia ai mamoe mai i Suria, ia e lapopoʻa siʻusiʻu ma mafiafia fulufulu. E na o le mamoe  poʻa o lenei ituaiga e fai ona seu. O nei manu e filemu ma usiusitaʻi, ae e leai so latou malosi e faafesagaʻia ai mea leaga e ono feagai ma i latou, e aofia ai le osofaʻia e manu feʻai.

E tausia foʻi e leoleo mamoe ʻoti. O lanu o ʻoti, e uliuli pe eena. O o latou taliga e uumi toe fai lā, ma e faigofie ona masaesae pe a lavelavea i laau talatala, a o feʻaʻei i se vaega maualuga e maamaā e aai i vao.

E feagai le leoleo mamoe ma se luʻi i aso uma, i le aʻoaʻoina o mamoe ma ʻoti ia usiusitaʻi i lana faatonuga. E lē gata i lea, e nafa foʻi le leoleo mamoe lelei ma le tausia o manu o loo ia vaavaaia, ma faaigoa i latou ina ia faalogo mai pe a valaau atu.—Ioane 10:14, 16.

Vaitau Eseese

Pe a oo i le tau e totogo ai mea, ona ave lea e le leoleo mamoe lana lafu i aso taʻitasi e fafaga i se laufanua olaola o loo lata ane. I lenā vaitau, e fananau mai ai nisi mamoe ma ʻoti ma faateleina ai le lafu, ma o le taimi foʻi lenā e sele ai fulufulu o mamoe, ma fai ai faigaʻai tetele!

Pe afai e lāiti ni mamoe a se tagata, e mafai ona ia totogi se leoleo mamoe e tuu faatasi a la mamoe, ma tausia e lenā leoleo. Peitaʻi, e masani ona vaavaaia lelei e lenā tagata faigaluega na o ana lava mamoe.—Ioane 10:12, 13.

Pe a uma ona selesele se fanua o loo lata ane, ona ave lea e le leoleo mamoe lana lafu e aai i tātupu fou ma ʻau o saito o loo totoe. Pe a oo i le tau vevela, e ave e le leoleo mamoe lana lafu i se nofoaga maualuga e mālū. O le tele o taimi e galue ma moe ai le leoleo mamoe i fafo, ina ia leoleo le lafu i le pō a o aai i se fanua lanulauʻava. O nisi taimi e na te ave lana lafu i se ana i le pō, ina ia malupuipuia mai ai i taʻifau o le vao ma haena. Pe a faalogoina le tagi a nei manu feʻai, ona ia taumafai lea e faatoʻafilemu lana lafu.

O afiafi uma e faitau ma siaki ai e le leoleo mamoe ana manu po o mamaʻi. I le taeao, e na te valaau ai i latou ma taʻitaʻi atu i se nofoaga e aai ai. (Ioane 10:3, 4) A oo i le aoauli, e na te ave i latou i se mea o lepa ai se vai mālū e faafeinu ai. Ae oo ina mātūtū le vai, ona ia toe ave lea o i latou i se mea e iai le vaieli, ma asu ane ai vai mo lana lafu.

 Pe a lata i le iʻuga o le tau mugālā, e ono ave e le leoleo mamoe lana lafu i se fanua lafulemu. Pe a mālūlū timuga, ona ia ave lea o le lafu i le fale, auā e mate le manu pe a tetele timuga ma toʻulu le aisa. E lē avea e le leoleo lana lafu i fafo e fafaga ai, mai iā Novema seʻia oo i le vaitaimi e totogo ai mea.

Meafaigaluega ua Lava Saunia

E ofu e le leoleo mamoe ofu masani, ae e māfiafia toe anagatā. Ina ia puipuia o ia mai le timu ma pō mālūlū, e na te ofu i totonu se ofu lima pupuu, ona tui lea i tua ma se ofu e faaū i totonu fulufulu mamoe. E fai ona seevae e puipuia ai ona vae mai i maa maamaʻai ma mea tuitui, ma fusi lona ulu i se ʻie māfanafana.

E aofia i meafaigaluega a le leoleo mamoe mea nei: O se tamaʻi ato e tuu ai meaʻai, e pei o le falaoa, olive, mati mamago, ma le sisi, o se laau, e lapoʻa le pito i lalo ma e maamaʻai, ma o lana auupega sili lea e tolu futu (1 m) le umī, se naifi, o se tootoo, lea e totoo ai pe a savali pe peʻa foʻi i se mea, o sana fagu vai, o se pakete e fai mai i le paʻu manu, e asu mai ai vai i se vaieli, o se maatā, e sasau atu ai se maa i se mamoe po o se ʻoti o loo taasē ese ina ia faafefe ai ma toe foʻi ai i le lafu, pe e tuli ai se manu feʻai, ma le lona o se fagufagu e faafiafia ai o ia faapea lana lafu.

E iai foʻi aogā o nei manu i mea e manaʻomia e le leoleo mamoe, e pei o le susu ma aano o manufasi mo le taumafataga. O fulufulu ma paʻu manu, e faatau atu ina ia maua ai se tupe, ma e gaosia ai ofu ma fagu. E faaaogā uma foʻi mamoe ma ʻoti e fai ai taulaga.

Lesona Mo i Tatou

O se leoleo mamoe lelei, e filigā, maufaatuatuaina, lototele, ma e ofoina atu foʻi lona ola e puipui ai lana lafu.—1 Samuelu 17:34-36.

E lētioa a faaaogā e Iesu ma ona soo le leoleo mamoe, e faamatala ai uiga e tatau ona iai i se ovasia Kerisiano. (Ioane 21:15-17; Galuega 20:28) E pei o leoleo mamoe lelei i taimi o le Tusi Paia, ua maumauaʻi foʻi ovasia o faapotopotoga i aso nei e ʻleoleo i le lafu mamoe a le Atua o loo latou tausia, aua le manatu i ai o se avega mamafa, ae ia faia ma le lotomalie, aua le faia ona o le fia maua o mea i se auala faapiʻopiʻo, ae ia faia ma le lotonaunau.’—1 Peteru 5:2.