Pe e Tatau Ona Tatou Fesiligia le Atua?

UA FAAPEA mai nisi e sesē le faia faapea, ona e lē o se faaaloalo le fesiligia o le Atua i le māfuaaga ua ia faataga po ua lē taofia ai nisi o mea o loo tutupu. Po o lou manatu foʻi lenā?

Afai o lou manatu lenā, o le a faateʻia oe i le iloa e toʻatele nisi o tagata lelei na fesiligia le Atua. O nisi nei o a latou fesili:

O le tagata faamaoni o Iopu: “Aiseā ua e natia ai ou fofoga ma manatu ai iā te aʻu e pei o sou fili?”—Iopu 13:24.

O le perofeta faamaoni o Sapakuka: “Aiseā la ua e silasila ai iā i latou o ē ua faia mea e lē faamaoni ma e lē fetalai ai pe a faatamaʻia e lē e amioleaga o lē ua sili ona amiotonu nai lo o ia?”—Sapakuka 1:13.

Iesu Keriso: “Loʻu Atua e, loʻu Atua e, aiseā ua e tuulafoaʻiina ai aʻu?”—Mataio 27:46.

Pe a e faitau i fuaiupu o loo siʻomia ai mau o loo taʻua i luga, e lē o taʻua ai se manatu e faapea sa lē fiafia le finagalo o Ieova * le Atua i na fesili. E lē faateʻia i tatou i lona faapalepale. O se faaaʻoaʻoga, e lē toʻasā Ieova pe a ōle atu iā te ia ina ia faamalie o tatou manaʻoga i le tino, nai lo lea, e na te faamalieina lava. (Mataio 6:11, 33) E lotomalie foʻi o ia e saunia mai faamatalaga e maua ai le mālōlōina i le mafaufau ma i faalogona. (Filipi 4:6, 7) O le mea moni, na faapea atu Iesu i ona soo: “Ia talosaga atu pea, ona foaʻiina mai ai lea iā te outou.” (Mataio 7:7) E faaalia i mau o loo siʻomia ai le faamatalaga lenā a Iesu, sa talanoa o ia i le mauaina o mea e tausia ai o tatou manaʻoga i le tino, faapea ma tali i fesili tāua.

Pe a e maua le avanoa e fesili atu ai i le Atua, o lē fea fesili o le a e fesili atu ai?

● Pe e iai se fuafuaga o loʻu olaga?

● O le ā e tupu pe a ou oti?

● Aiseā ua e lē taofia ai oʻu mafatiaga?

Talu ai o “Tusitusiga Paia uma e mai i le agaga o le Atua,” o le a e maua la tali mai i le Atua e ala i lana Afioga Paia. (2 Timoteo 3:16) Mātau māfuaaga ua tuufesili ai isi i fesili o loo taʻua i luga, faapea ma tali mai i le Tusi Paia.

[Faaopoopoga i lalo]