Manatuaina o Iesu Keriso

“Ia faia pea lenei mea e fai ma faamanatuga iā te aʻu.”—LUKA 22:19.

Aiseā ua faamanatu ai e isi le Kerisimasi?

E manatu isi o le “autū o lenei vaitau” o Iesu, ma e faamanatu ai lona aso fanau.

Aiseā ua avea ai o se luʻi?

O le tele o pese ma tū masani o le Kerisimasi, e lē fesootaʻi atu iā Iesu, ma e faitau miliona o loo faamanatuina e lē faatuatua pe e talitonu e iai o ia. I le ʻau faipisinisi, o vaitau o le Kerisimasi ua avea ma taimi e faalauiloa ai a latou oloa, nai lo o le manatuaina ai o Iesu.

Mataupu silisili o le Tusi Paia.

ʻNa sau le atalii o le tagata e foaʻi atu lona ola e fai ma togiola e sui aʻi tagata e toʻatele.’ (Mareko 10:45) O le fetalaiga a Iesu o loo i le Luka 22:19, sa faia i le pō a o lumanaʻi lona maliu, ae e lē i lona aso fanau. O le pō lenā sa ia faavae ai se sauniga puupuu ma tuusaʻo e faamanatu ai lona maliu. O lea, aiseā na ia manaʻo ai i ona soo e faamanatu lona maliu nai lo o lona aso fanau? Auā o lana taulaga togiola ua maua ai e tagata usiusitaʻi le avanoa e ola ai e faavavau. Ua faapea mai le Tusi Paia: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.” (Roma 6:23) O lea, pe a faamanatu le maliu o Iesu i tausaga taʻitasi, e manatua ai e ona soo o ia o “le faaola o le lalolagi,” ae e lē o se pepe e lē mafaia se mea.—Ioane 4:42.

ʻNa puapuagatia Keriso mo outou, ua ia tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.’ (1 Peteru 2:21) Ina ia faamamalu ma manatuaina Iesu, e tatau ona suʻesuʻe i lana faaaʻoaʻoga o sē e lelei atoatoa ma atamai. Ia mafaufau loloto i auala na ia faaalia ai le alofa mutimutivale, onosaʻi, ma le lototele e faia le mea saʻo. Ia vaavaai mo ni avanoa e te faaaʻoaʻo ai iā te ia.

“Ua avea lo tatou Alii ma lona Keriso ma pule o le lalolagi, e pule foʻi o ia o se tupu e faavavau, faavavau lava.” (Faaaliga 11:15) Pe a e manatunatu iā Iesu, e tatau ona mātau mea o loo ia faia i le taimi lenei. Ua avea nei o ia ma Tupu i le lagi. Ua faapea mai se valoaga e uiga iā Iesu: “E faamasino e ia ma le amiotonu ē ua faatauvaa, e aʻoaʻi atu foʻi e ia ma le amio saʻo ina ia maua aogā e tagata agamalu o i le lalolagi.” (Isaia 11:4) O na uiga matagofie e lē iai i se pepe meamea, ae o loo iai i se Tupu malosi.