PE E te fia iloa upu moni e uiga i le Atua—o ai o ia, o ā mea e fiafia ma ʻinoʻino i ai, ma o le ā lona finagalo? Ua faailoa mai e Ieova i le Tusi Paia upu moni uma e uiga iā te ia. Ae e lē o tagata uma e faitau i le Tusi Paia e malamalama atoatoa i na upu moni. Aiseā? Talu ai o le iloaina o na upu moni, o se faaeaga e lē maua e tagata uma. Seʻi o tatou iloiloina le fetalaiga a Iesu e uiga i lenei mataupu.​—Faitau le Mataio 11:25.

O loo amata mai le mau i upu nei: “Ona fetalai atu lea o Iesu.” O lea, o le fetalaiga a Iesu lea o le a fai atu atonu sa tali atu ai i se mea faatoʻā tupu. Na faatoʻā uma lava ona ia taʻusalaina tagata sa lē mananaʻo e avea ma ona soo, mai i aai e tolu o Kalilaia ia sa faia ai ana galuega mamana. (Mataio 11:20-24) E te ono taumānatu: ʻE faapefea i se tagata na vaai i galuega mamana a Iesu, ona lē talitonu i upu moni sa ia aʻoaʻoina atu?’ O le lē talitonu o tagata e māfua mai i le maaa o o latou loto.​—Mataio 13:10-15.

Na silafia e Iesu, e lua ni mea e manaʻomia ina ia malamalama ai i upu moni e uiga i le Atua: O le fesoasoani a le Atua ma se loto e faamaoni. Na fetalai Iesu: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e natia nei mea mai i tagata popoto ma ē e atamamai, a ua faaalia i tamaiti.” O le māfuaaga lenā o se faaeaga ai le malamalama i upu moni o le Tusi Paia. O loo iā Ieova le pule e filifili ai po o ai e faailoa i ai upu moni, auā o ia o le “Alii o le lagi ma le lalolagi.” Ae e lē faailogatagata le Atua e tusa ai o lenei tulaga. Aiseā e na te lē faailoa ai na upu moni i tagata uma?

E fiafia Ieova i ē lotomaulalo ae lē o ē e faamaualuluga. (Iakopo 4:6) Ua ia natia upu moni mai i ē ʻpopoto ma atamamai’ i le poto o lenei lalolagi, o ē e faamaualuga ma lē fia taliaina lana fesoasoani. (1 Korinito 1:19-21) Ae e na te faailoaina atu i “tamaiti,” po o ē e loto faamaoni, ma lotomaulalo e pei o tamaiti. (Mataio 18:1-4; 1 Korinito 1:26-28) Sa silafia lelei e Iesu nei ituaiga o tagata. O le toʻatele o taʻitaʻi lotu faamaualuluga sa lē malamalama i le feʻau a Iesu, ae sa malamalama i ai le ʻaufaifaiva lotomaulalo. (Mataio 4:18-22; 23:1-5; Galuega 4:13) I le taimi e tasi, sa avea ma soo o Iesu nisi o tagata mauoloa ma lelei aʻoaʻoga, o ē sa faaalia le lotomaulalo moni.​—Luka 19:1, 2, 8; Galuega 22:1-3.

Seʻi o tatou toe foʻi i le fesili o loo i le amataga: Pe e te fia iloa upu moni e uiga i le Atua? Pe afai o lea, o le a e fiafia la i le iloaina, e ʻinoʻino le Atua i ē atamamai i le poto o le lalolagi, ae e finagalo malie i ē lotomaulalo. Pe a e suʻesuʻeina le Tusi Paia ma se mafaufau ma se loto faamaoni, e ono avea la oe ma sē e foaʻi i ai e Ieova le meaalofa tautele, o le malamalama i upu moni e uiga iā te ia. O le iloaina o na upu moni o le a fiafia atili ai lou olaga i le taimi lenei, ma taʻitaʻia atu ai oe i le “ola moni,” o le ola lea e faavavau i le lalolagi fou amiotonu na folafola mai e le Atua e lē o toe umi oo mai. *​—1 Timoteo 6:12, 19; 2 Peteru 3:13.