NA AMATA ona lomia lenei mekasini i a Iulai 1879. Ua suia le tulaga o mea talu mai lenā taimi, ma e faapena foʻi i lenei mekasini. (Tagaʻi i ata.) E amata atu i lenei mekasini, o le a e mātauina ai nisi o suiga i Le Olomatamata. O ā mea ua suia?

I le tele o atunuu, ua faatuputupulaʻia i latou e fiafia e faaaogā le initaneti, ona e faigofie ona maua ai faamatalaga eseese. Ua mafai ona faitau i le tele o tusi, so o se mekasini, ma nusipepa i le initaneti.

O le māfuaaga lenā ua faia ai suiga i la matou tuatusi o le jw.org, ina ia faaoso ai le naunau o tagata e faitau ma e faigofie ona faaaogāina. E mafai ona e faitau i lomiga e silia i le 430 gagana o loo iai i lenā tuatusi. Peitaʻi, e amata atu i lenei masina, o le a mafai ona e faitau i nisi o mataupu sa masani ona lomia i a matou mekasini, ae o lea ua na o la matou tuatusi i le Initaneti e maua ai. *

Talu ai o le a maua le tele o mataupu i le initaneti, o lea, e amata atu i lenei mekasini ona faaitiitia le aofaʻi o itulau o Le Olomatamata mo le lautele, mai i le 32 itulau i le 16. O loo faaliliuina Le Olomatamata i le 204 gagana. O lea, atonu o le a sili atu nisi gagana e mafai ona faaliliuina ai lenei mekasini ona ua puupuu.

E faamoemoe o le a avea nei suiga o se auala e faaoo atu ai le feʻau faasaoola mai i le Tusi Paia i le toʻatele o tagata. E matou te maumauaʻi e saunia pea le tele o faamatalaga faalaeiau ma faatupu manatu, e lē gata i a matou lomiga ae faapea foʻi le initaneti, ina ia maua ai aogā e la matou ʻaufaitau, o ē e faaaloalogia le Tusi Paia ma mananaʻo e iloa aʻoaʻoga o loo iai.

O Ē na Lomiaina