NA TATOU talanoaina i le mataupu ua mavae, na maua e Iesu se olaga e aogā. Afai e tatou te mananaʻo e maua se olaga e aogā, e tatau la ona faaaʻoaʻo ma faalogo i ana fautuaga.

O le mea lenā o loo faalaeiau e Ieova i tatou e fai, e pei ona taʻua i le mau o loo i luga. O le savali e pei o Iesu, e aofia ai le fetuunaʻi o o tatou olaga ina ia ōgatusa ma ana faaaʻoaʻoga ma aʻoaʻoga. O le faia faapea, o le a maua ai le finagalo malie o le Atua ma se olaga e aogā.

Na aofia i aʻoaʻoga a Iesu ni mataupu silisili e fesoasoani iā i tatou ina ia savavali ai e pei o ia. O nisi o na mataupu silisili e mai i lana Lauga taʻutaʻua i le Mauga. Seʻi o tatou iloilo la nisi o mataupu silisili, ma vaai pe faapefea ona aogā i o tatou olaga.

AOGĀ O LENEI MATAUPU SILISILI:

Na taʻua e Iesu, e iai i tagata le faanaunauga e fia iloa mea faaleagaga. Ua leva ona tatou fia iloa tali i nisi o fesili e pei o le: Aiseā ua tatou iai i inei? Aiseā ua tele ai puapuaga? Pe e manatu mamafa mai le Atua? Pe e iai se isi olaga pe a mavae atu le oti? E manaʻomia ona iloa tali o na fesili, ina ia maua ai se olaga e aogā. Na silafia e Iesu, e na o le Tusi Paia e maua ai tali o na fesili. Ina ua tatalo Iesu i lona Tamā, na ia faapea atu: “O lau afioga o le upu moni lea.” (Ioane 17:17) Pe e mafai moni e le Tusi Paia ona faamalie o tatou manaʻoga faaleagaga?

SE MEA MONI NA TUPU:

Talu ai sa taʻitaʻia e Esa se ʻau fāʻili, sa faigofie la ona avea o ia o se tagata pese lauiloa. Peitaʻi, sa ia lagona o loo iai se mea o loo misi. Na ia faapea mai: “E ui sa ou fiafia i le ʻau fāʻili, ae sa ou naunau lava ina ia ou maua se olaga e aogā.” Mulimuli ane, na feiloaʻi Esa ma se tasi o alii Molimau a Ieova. Na faapea mai Esa: “E tele aʻu fesili na fai atu iā te ia, ae o le manino o ana tali mai le Tusi Paia, na uunaʻia ai aʻu e ma te suʻesuʻe i le Tusi Paia.” O mea na aʻoaʻoina e Esa mai i lana suʻesuʻega, na pāʻia ai lona loto ma filifili ai e tuuina atu lona ola iā Ieova. Na ia faapea atili mai: “E tele faafitauli ma mala sa ou fesagaʻia i taimi ua teʻa, ae o lea ua iai se fuafuaga moni o loʻu olaga.” *

AOGĀ O LENEI MATAUPU SILISILI:

O le alofa mutimutivale, e aofia ai le faaalia o le agalelei. Na faaalia e Iesu le alofa mutimutivale iā i latou na mafatia. O lona tigā alofa, na uunaʻia ai o ia e aveesea mafatiaga o isi. (Mataio 14:14; 20:30-34) O le faaaʻoaʻo i le alofa mutimutivale o Iesu e tatou te maua ai se olaga e aogā ma fiafia. (Galuega 20:35) E mafai ona tatou faaalia le alofa mutimutivale ma fesoasoani i isi, e ala i upu ma gaoioiga agalelei. Pe e mafai moni i le faaalia o le alofa mutimutivale ona maua ai se olaga e aogā?

SE MEA MONI NA TUPU:

O Maria ma lona toʻalua o Carlos, o ni faaaʻoaʻoga lelei o le alofa  mutimutivale. Ua maliu le tinā o Maria, ma ua maʻi foʻi si ona tamā. O lea na tausia ai o ia e Maria ma Carlos. E tau lē maua se la mālōlō, ma e masani foʻi ona topetope atu i le falemaʻi pe a maualuga le suka o lona tamā. E ui i le vaivai, ae o loo maua pea le fiafia e pei o upu a Iesu, auā ua la iloa o loo la tausia manaʻoga o lona tamā.

AOGĀ O LENEI MATAUPU SILISILI:

Ina ia “faatupuina le filemu,” o lona uiga, ia tausolomua i le tausiaina o le filemu. E faapefea i le tausolomua i le tausiaina o le filemu ona maua ai se olaga e aogā? O le tausia o le filemu i le va ma isi, o le a maua ai se faiā lelei ma i latou. Ua fautua mai le Tusi Paia: “Afai e mafai iā te outou, ia nonofo filemu ma tagata uma.” (Roma 12:18) O “tagata uma,” e aofia ai tagata o le aiga faapea ma isi. Pe e mafai moni e le tausiaina o le filemu ma “tagata uma,” ona maua ai se olaga e aogā?

SE MEA MONI NA TUPU:

E tele tausaga o fesagaʻia e se fafine e igoa iā Nair ni luʻi e tofotofo ai lona tausiaina o le filemu, aemaise lava i totonu o lona aiga. Ua 15 tausaga talu ona tuua o ia e lana tane, ma ua na o ia ma lana fanau. Na faaaogā e lana tama tama fualaau faasāina, ma e faamataʻu atu iā te ia ma lana tama teine. Na talitonu Nair, o mea na ia aʻoaʻoina mai le Tusi Paia, na uunaʻia ai o ia e tausia le filemu, agalelei, ma le tigā alofa i isi. (Efeso 4:31, 32) Na ia iloa, o le auala sili e maua ai se faiā lelei ma tagata o lona aiga ma isi, o le tausia lea o le filemu nai lo o le tauaʻimisa.

E tatou te maua se olaga fiafia ma faamalieina, pe a mulimuli i fautuaga atamai a Iesu. Peitaʻi, ina ia maua se olaga e aogā, e manaʻomia foʻi ona tatou iloa le mea o le a tupu i le lumanaʻi. Auā o le mea moni, e faapefea ona maua se olaga e aogā, pe afai o lo tatou iʻuga le ola matua, maʻi, ma le oti?

Peitaʻi, e iai se tala fiafia! E tele faamanuiaga ua saunia mai e Ieova mo i latou e savavali e faapei o Iesu. Ua folafola mai e Ieova, o le a iai se lalolagi fou amiotonu e ola ai e faavavau i latou e faamaoni, i se olaga lelei atoatoa. Ua faapea mai le Tusi Paia: “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”​—Faaaliga 21:3, 4.

O loo tulimataʻia ma le fiafia e Maria lea na taʻua i le mataupu amata le faataunuuina o na upu. Ae ā oe? Pe e te manaʻo e fia iloa atili e faatatau “i le ola moni,” i lalo o le pulega a le Malo a le Atua? (1 Timoteo 6:19) Afai o lea, faafesootaʻi Molimau a Ieova o loo i lou vaipanoa, pe e tusi atu foʻi i ē na lomia lenei mekasini. *