E FAATEʻIA nisi i le fesili o loo i le faavaa o lenei lomiga, ona e latou te manatu e lē sauā le Atua. Peitaʻi, o isi e fai mai e sauā le Atua. Ae e toʻatele foʻi isi ua fesiligia lenā tulaga. Aiseā?

Ua fesili nisi na sao mai mala faalenatura: “Aiseā ua faataga ai e le Atua nei mea e tutupu? Pe e lē ano mai o ia? Pe e sauā o ia?”

O isi ua tuufesili i lenei lava fesili, ona o mea na latou faitau ai i le Tusi Paia, e pei o le tala iā Noa ma le Lolo. E latou te manatu: “Aiseā na fasiotia ai e le Atua alofa na tagata? Pe e sauā o ia?”

Pe masani ona e tuufesili i na fesili? Pe e faafaigatā ona e avatu se tali iā i latou e tuufesili i na fesili? O le a mafai ona e malamalama i tali o na fesili, e ala i le iloiloina o le fesili o le a sosoo mai.

E manino le tali, ona e iai iā i tatou le lagona e iloa ai le mea saʻo ma le mea sesē. E ese i tatou mai i meaola, auā na faia i tatou e Ieova “i lona faatusa.” (Kenese 1:27) O le ā lona uiga? Na ia faia i tatou i se auala e mafai ona atagia atu ai ona uiga ma tapulaa tau amio, aemaise ona lagona i le mea saʻo ma le mea sesē. Afai la na foaʻi mai e le Atua le lagona e tatou te ʻinoʻino ai i faiga sauā, pe e lē faamaonia mai ai e ʻinoʻino foʻi le Atua i faiga sauā?

Ua faamaonia le moni o lenā manatu i le fetalaiga a le Atua i le Isaia 55:9 e faapea: “E faapena ona maualuga o oʻu ala i o outou ala, ma oʻu manatu i o outou manatu.” Afai tatou te faamasinoina le Atua i le faasauā, o lona uiga ua tatou faapea atu e sili o tatou ala nai lo o Ia. O se gaoioiga atamai le iloa o nisi o faamatalaga, nai lo o le vave fai o se faaiʻuga faapena. E lē o se mea atamai le fesiligia pe faamata e sauā le Atua, ae e ao ona tatou iloa pe aiseā ua avea ai isi ana gaoioiga ma mea e foliga mai ai e sauā o Ia. Ina ia maua se fesoasoani, iloilo po o le ā le uiga tonu o le “sauā.”

Pe a tatou taʻua se tasi e sauā, o lona uiga e tatou te fesiligia ona uunaʻiga. O le tagata sauā, e fiafia pe a mafatia isi, pe e lē manatu mamafa foʻi i faafitauli o isi. O lea, o le tamā sauā, e fiafia e aʻoaʻi lana fanau ina ia faatigā i o latou faalogona. Ae o le tamā lelei, e na te aʻoaʻi lana fanau ina ia faatonu ma puipuia i latou. E faigofie ona faauigasesē e se tasi ou uunaʻiga, pe afai e lē o malamalama i māfuaaga o au gaoioiga.

Seʻi o tatou iloilo māfuaaga se lua ua manatu ai nisi e sauā le Atua: (1) mala faalenatura o loo tatou vaaia, (2) faamasinoga a le Atua o loo i le Tusi Paia. Po o faaalia moni mai i nei mea e sauā le Atua?