E iai faafitauli ma luʻi patino ua feagai ma aiga ua toe faaipoipo le tamā po o le tinā. * O se faataʻitaʻiga, pe a faaipoipo se fafine i se tamā fai fanau, * e ao la i le fafine ona feagai ma le tinā moni o tamaiti e faatatau i mataupu e pei o le feasiasiaʻi, o aʻoaʻiga, ma le lagolagosua tautupe. E ono faigatā foʻi i tauaiga ma uō ona faamasani i isi sui fou o le aiga ua iai. Mātau le auala e fesoasoani ai fautuaga a le Tusi Paia iā te oe ma lou aiga fou.

Na taʻua e Judith mai i Namibia: “Na faapea atu le toʻalua muamua o laʻu tane i lana fanau, ua  na o aʻu o se toʻalua fou o lo latou tamā, ma a maua saʻu fanau, aua neʻi taʻua o ni o latou tei. Na matuā tigā loʻu loto i ana faamatalaga, ona sa pei lana fanau o ni aʻu fanau moni.”

E ioe tagata atamamai, o le feagai ai ma le toʻalua muamua o lau paaga, e ono fevaevaeaʻi ai le aiga fou. E masani lava ona lē lelei le va o le avā muamua ma le avā fou. O le ā se fesoasoani mo lenei tulaga?

Fesoasoani: Fai ni faatulagaga talafeagai. E mafatia lau fanau pe a e faasā i latou ona talanoa i lo latou tinā po o le tamā moni. * E tāua tele i le olaga o le tamaitiiti ē ʻna māfua ai ona fanau mai o ia.’ (Faataoto 23:22, 25) Ae i le isi itu, pe a aiā tele lou toʻalua muamua i le lua aiga fou, o le a fai la ma mea e mafatia ai lou toʻalua fou. Ia taumafai e paleni, ma fai ni faatulagaga ina ia puipuia ai lau faaipoipoga, a o galulue soosootauʻau pea ma lau paaga muamua.

FESOASOANI MO MĀTUA MONI O TAMAITI

• Pe a e talanoa i lau paaga muamua, ia taulaʻi i mataupu e uiga i tamaiti. O se faataʻitaʻiga, talosaga atu ma le faautauta iā te ia ina ia faatulaga lelei taimi e vili mai ai i tamaiti, nai lo o le vili mai i so o se taimi, po o le leva foʻi o le pō.

• Pe afai e lē iai sau aiā faaletulafono e tausia ai tamaiti, atonu e mafai ona outou fesootaʻi pea e ala i le vili atu iā i latou, tusi i ai, lafo ni feʻau tusitusia i le telefoni, imeli, pe e talanoa foʻi i le initaneti. (Teuteronome 6:6, 7) O le faia faapea o le a e iloa ai mea o loo tutupu i lau fanau, ma telē ai se aafiaga lelei iā i latou, nai lo o le mea sa e mafaufau i ai.

FESOASOANI MO TINĀ FOU

• Ia faaalia le “tigā alofa” mo le tinā moni o tamaiti, e ala i le faailoa atu e te lē o taumafai e faoa lona tulaga o se tinā. (1 Peteru 3:8) Ia taʻu atu iā te ia mea o loo tutupu i tamaiti, aemaise lava mea lelei. (Faataoto 16:24) Ia talosaga atu foʻi mo sana fautuaga, ma faafetai atu iā te ia.

• Ia faaitiitia le soona faaalia o lou alofa i tamaiti a o iai lo latou tinā moni. Na faapea mai Beverly i Amerika: “Na mananaʻo le fanau muamua a loʻu toʻalua e valaau aʻu o Mum. Sa ou fai i ai e mafai pe a na o i matou le fale, ae aua neʻi faia pe a iai lo latou tinā o Sieni, po o ona tauaiga foʻi. O le faia faapea na lelei ai lo ma va ma Sieni, ma galulue faatasi ai i meafai a tamaiti i le aʻoga.”

FESOASOANI MO MĀTUA UMA O LE TAMAITIITI

• Aua neʻi faia ni tala leaga e uiga i le toʻalua muamua po o le toʻalua fou o lau paaga a o faalogo atu tamaiti. E faigofie ona tupu lenei mea, ma e mafatia ai le tamaitiiti. E te lē iloa foʻi po o le a faauigasesē e le tamaitiiti lau tala na fai. (Failauga 10:20) Ia taumafai e malamalama i faalogona o le tamaitiiti, pe a ia faamatala atu ni tala leaga na faalogo o loo fai e uiga iā te oe. Atonu e te faapea atu: “Faamalie atu pe afai o le tala lenā na e faalogo ai. Ia e  lē o fiafia si ou tinā iā te aʻu, ma o nisi taimi o le ita e māfua ai ona faia e isi ni tala lē lelei.”

• Ia taumafai mātua uma e tutusa tulafono ma aʻoaʻiga e avatu i le tamaitiiti. Ae afai e lē mafai, ona faamatala atu lea i le tamaitiiti le māfuaaga, e aunoa ma le taʻufaatauvaaina o le isi matua. Mātau le faataʻitaʻiga lenei:

  Tinā fou: Simi, tautau i luga lou solo faamolemole.

  Simi: O le mea lenā a loʻu tinā e masani ona fai.

  Tinā fou (ita tele): Mea na ua e paiē ai faapena.

  Pe e lē sili ona lelei pe a tali atu faapea?

  Tinā fou (tali filemu): Oi e moʻi? Ia a o i inei e tautau a e le tagata lona solo.

• ʻAlofia le faatulaga o ni mea e fai ma tamaiti pe afai o le taimi lenā e ō ai e asiasi i le isi matua. (Mataio 7:12) Ae pe a lē mafai ona toe fetuunaʻi, ia faanoi i le isi matua a o leʻi taʻuina i tamaiti le mea e fai.

O loo taʻua i le tusi Step Wars le faaseā a se tinā i le faaʻauʻau o lona toʻalua i lana fanau matutua, ma e lē amanaʻia e lana tane le mea moni o loo faileagaina o ia e lana fanau. Na ia faapea mai: “Sa matuā ou ita tele i lenā mea.” E faapefea ona e faatumauina pea lau faaipoipoga e ui i na tulaga?

Fesoasoani: Faaalia le tigā alofa. Ua faapea mai le Tusi Paia: “Aua neʻi saʻilia e se tasi lona lava lelei, a ia faaauau ona saʻili le lelei o isi.” (1 Korinito 10:24) Ia taumafai e malamalama i faalogona o le isi. E ono popole le fanau matutua neʻi mou atu le alofa o lo latou tamā po o le tinā lea ua toe faaipoipo. Atonu foʻi e manatu, o le fiafia i le paaga fou ua pei ai ua agaleaga i lo latou tamā po o le tinā moni. Ae i le taimi e tasi, e ono musu foʻi se matua ua toe faaipoipo e otegia lana fanau, ina neʻi lē toe fiafia atu tamaiti iā te ia.

Aua neʻi faatalitalia e vave ona alolofa ma fiafia mai le fanau muamua a lau paaga. E lē lelei le faamalosia o i latou e alolofa mai iā te oe. (Pese a Solomona 8:4) O lea, ia taumafai e faaalia le mafaufau lelei a o atiaʻe se faiā māfana ma le fanau a lau paaga.

E lē manaʻomia ona faailoa atu mea uma o loo e manatu i ai, e tusa lava pe faileagaina ai oe. (Faataoto 29:11) Pe a faigatā ona pulea lou ita, ia tatalo e pei o le tupu o Tavita e faapea: “Ieova e, ia e tuuina se leoleo i loʻu gutu; ia e tuu foʻi se leoleo i le faitotoʻa o oʻu laugutu.”​—Salamo 141:3.

Afai e te filifili e nonofo ma lou toʻalua i la latou fale ma lana fanau, e mautinoa la e iai ni mea e lē mananaʻo tamaiti e suia i le fale. O lea, ia faaeteete i le soona faia o suiga. Atonu foʻi e lelei pe a siitia i se isi fale.

Na faapea mai Marion mai Kanata: “E masani ona faatau mai e oʻu mātua meaalofa mo laʻu tama tama, ae leai ni mea mo le fanau a si aʻu tane. O lea e ma te faatauina ai ma laʻu tane ni meaalofa mo lana fanau. Ae o nisi taimi e lē mafai ona faia faapea ona o le taugatā o mea.”

Fesoasoani: Faamuamua lou aiga fou. Faailoa i ou tauaiga lou faanaunauga mo lou aiga ua iai. (1 Timoteo 5:8) E ui e te lē faatalitalia ou tauaiga ma uō e vave ona alolofa i sui fou o lou aiga, ae ia talosaga atu iā i latou ina ia faaalia pea le faaaloalo, ma le fetuutuunaʻi. Faamatala i ai le mafatia o tamaiti pe a lē ano atu iā i latou.

Taumafai ia fesootaʻi pea lau fanau ma mātua o lou toʻalua muamua. Ua faapea mai Susana mai Egelani: “Sa ou toe faaipoipo ina ua mavae le 18 masina talu ona maliu si aʻu tane, ma sa faigatā tele i ona mātua ona fiafia i loʻu toʻalua fou. Ae na faaleleia tulaga o mea e ala i le faaaofia o i laʻua i mea fai a le matou aiga, faatonu tamaiti e vili e asi laʻua, ma faafetai foʻi i ai mo le la lagolagosua.”

E mafai i faiā ma isi ona avea ma luʻi i lou aiga fou. O le faatatauina o fautuaga mai i le Tusi Paia, o le a maua ai e lou aiga faamanuiaga e pei ona folafola mai: “Ua atiaʻe le aiga o i le fale i le atamai, ma ua faamausalīina i le faautaga loloto.”​—Faataoto 24:3.