Na ou ola aʻe i le aai laʻitiiti o Texcoco, e gaoā ma pefua ona auala, ma e masani ona vaaia tagata ma a latou asini o loo uta ai ni mea e faatau atu. Ou te lona fitu i la matou fanauga e toʻaiva, ma sa matitiva tele lo matou aiga. Sa galue loʻu tamā o sē e faaleleia seevae tosotoso (guaraches), ina ia tausia ai lo matou aiga. Ae ina ua maliu o ia i le fitu o oʻu tausaga, na matuā pagatia ai loʻu tinā i le tausia aʻe o i matou.

E toetoe o tagata uma o lo matou aiga e iloa tā se meafaifaaili. E tāina e le tamā o loʻu tinā le vaiolini, ma sa avea o ia ma fuataimi i se ʻau faaili a le lotu. Sa pese loʻu tinā i le ʻaufaipese a le lotu, ae o lona tuagane e na te usuina upu o se tala ua lagi faapese, ma tāina le piano. E mapolotu lo matou aiga, ma sa avea aʻu ma tama tali Misasā, ma na ou manaʻo e avea ma faifeʻau misionare Katoliko. Ae i le taimi e tasi sa ou fiafia foʻi i ata karate, ma na atili ai ona iai ni oʻu uiga sauā.

Sa ou auai i se aʻoga o le lotu e tai pei o se aʻoga faafaifeʻau i le aai o Puebla, ona sa iai loʻu sini e fia avea ma patele Katoliko. Na amata ona ou lē fiafia i le Lotu Katoliko i laʻu tausaga faaiʻu, ma sa iai se taupousa sa ia faaosoosoina aʻu e faia feusuaʻiga. Na ou teena lenā faaosoosoga, ae na amata ai ona iai ni oʻu faalogona fia faaipoipo. Sa ou mātauina foʻi uiga faafiaamiotonu o patele, ma na ou lē toe manaʻo ai loa e avea ma patele.

 O lea na ou auai ai loa i le aʻoga musika o le National Conservatory of Music i Mekisikō. Na ou faaipoipo ina ua uma ona ou faauu, ma e leʻi leva ae maua sa ma fanau e toʻafā. Sa ou maua le tupe e tausia ai loʻu aiga e ala i le pese i le Misasā.

E leʻi lelei le ma faaipoipoga, ona sa iā i maʻua uma le uiga fuā. Sa amata e na o le tauupu, ae uma ane ua tauaʻifusu. O lea, ina ua mavae le 13 tausaga, sa ma filifili ai loa e nonofo eseese, ma mulimuli ane tatala le ma faaipoipoga.

Na muamua ou feiloaʻi i Molimau a Ieova a o ma nonofo pea ma loʻu toʻalua. Sa ō atu ni Molimau se toʻalua i lo matou fale ma ofo atu e matou te suʻesuʻeina le Tusi Paia. Na ou manatu e sili atu loʻu iloa, o lea na ou fesiligia ai i laʻua i ni fesili faigatā ina ia faamaonia ai lo la sesē. Ae sa faateʻia aʻu i le lelei o a la tali mai i le Tusi Paia, ma ou mātauina ai le itiiti o mea o loo ou iloa. Peitaʻi, na faamutaina laʻu suʻesuʻega ona o loʻu pisi tele, ma sa matuā lē mafaufau uiga faaalia o loʻu toʻalua i nai Molimau.

Na matou toe feiloaʻi ma isi Molimau i le lima tausaga mulimuli ane, ae ua ma nonofo ma se isi fafine e igoa iā Elvira. Sa faigofie ona faaauau laʻu suʻesuʻega auā e leʻi tetee Elvira. E ui i lea, sa tele tausaga o ou taumafai pea e suia loʻu olaga tuai.

Na ou iloa e tatau ona ou faia ni suiga pe a ou manaʻo e auauna iā Ieova ma le lotoatoa. Muamua, e tatau ona ou tuua laʻu galuega o le pese i le Misasā, ae saʻili se isi galuega e tausia ai le aiga. (Faaaliga 18:4) Sa tatau foʻi ona faatulafonoina la ma faaipoipoga ma Elvira.

O se isi suiga faigatā, o le pulea lea o loʻu ita. E lua mau o le Tusi Paia na fesoasoani iā te aʻu: O le Salamo 11:5, lea e taʻua ai e ʻinoʻino Ieova i le faasauā, ma le 1 Peteru 3:7 lea na ou iloa ai, afai ou te manaʻo e faafofogaina e Ieova aʻu tatalo, e tatau la ona ou āva i laʻu avā. O loʻu manatunatu i nei mau faapea ma le tatalo mo le fesoasoani a Ieova, na mafai ai ona pulea loʻu ita.

Ua ou maua nei se olaga fiafia i loʻu aiga. O loo ou taumafai pea e faaleleia la matou faiā ma oʻu atalii i loʻu toʻalua muamua, ma fesoasoani foʻi i si oʻu aiga fou ina ia malolosi pea faaleagaga.

A o ou laʻitiiti, sa ou manaʻo e avea ma patele ma fesoasoani i isi. Ae o lea ua iai se fuafuaga moni o loʻu olaga. Ua avea nei aʻu o se faiaʻoga musika, ina ia maua ai se tupe e tausi ai loʻu aiga. Ou te faafetaia Ieova i lona onosaʻi mai pea ma tuu mai le avanoa e avea ai aʻu o se tagata lelei.