Na teteʻa Linda ma lona toʻalua muamua. Ae na ia lagona le fiafia ina ua ia faaipoipo atu iā Herman. Peitaʻi, e pei ona taʻua i a la faamatalaga, e iai lava luʻi e tulaʻi mai pe a toe faaipoipo, lea e leʻi iai i le faaipoipoga muamua. *

O ā ni ou faalogona talu ona e toe faaipoipo? Na taʻua e Tamara, o lē na toe faaipoipo ina ua mavae le tolu tausaga talu ona tatala lana faaipoipoga: “Pe afai ua e faatoʻā faaipoipo, e iai le lagona mautinoa e tumau e faavavau lau faaipoipoga. Ae pe a e toe faaipoipo, atonu e lē toe iai lenā faalogona, pe a toe mafaufau i mea sa tutupu i lau faaipoipoga muamua.”

Peitaʻi, e toʻatele e maua le fiafia moni pe a  toe faaipoipo, e ala i le faia o taumafaiga ina ia taulau ai a latou faaipoipoga. E mafai foʻi ona e taulau manuia. E faapefea? Seʻi iloilo ni luʻi masani se tolu, ma mataupu silisili faale-Tusi Paia e mafai ona fesoasoani iā te oe e fesagaʻia na luʻi. *

Ua faapea mai Elena mai Aferika i Saute: “Ou te manatua pea nisi o taimi fiafia o laʻu faaipoipoga muamua, aemaise pe a ma asiasi ma laʻu tane i nofoaga sa masani ona ma faimalaga ai ma loʻu toʻalua muamua. O nisi taimi ou te faatusatusaina o ia i loʻu toʻalua muamua.” E mautinoa e te lē fiafia pe a fai ma masani le talanoa o lau paaga e faatatau i lona toʻalua muamua.

FAUTUAGA: Aua e te faatalitalia o le a vave ona faagalo e lau paaga lana faaipoipoga muamua, aemaise pe afai e tele ni tausaga na nonofo ai. Ua taʻutino mai nisi, e iai taimi e latou te faaigoaina a latou paaga i igoa o o latou toʻalua muamua, e aunoa ma le iloaina. E faapefea ona oulua taulimaina lenā tulaga? Ua faapea mai le Tusi Paia: “Ia taumafai e malamalama i faalogona o le isi.”​—1 Peteru 3:8, New Century Version.

Aua e te faasāsā le talanoa atu o lau paaga e faatatau i lana faaipoipoga muamua. Nai lo lea, ia faaalia le magafagafa ma faalogologo lelei, pe a manaʻomia ona talanoa i mataupu faapena. Aua le vave faia se faaiʻuga e faapea ua faatusatusa oe i le toʻalua muamua a lau paaga. Na faapea mai Ian o lē ua atoa le sefulu tausaga talu ona toe faaipoipo: “E lē taitai faasā e laʻu avā o Kaitlyn le talanoa e faatatau i loʻu toʻalua muamua. E na te vaai i ai o se avanoa e iloa lelei ai e faatatau iā te aʻu.” E ono fesoasoani talanoaga faapena e faaleleia ai la oulua faiā ma lau paaga fou.

Ia uaʻi atu i uiga lelei o lau paaga ua iai. E eseese uiga ma tomai e lelei ai lou toʻalua muamua ma lau paaga ua iai. Peitaʻi, ina ia faamalosia la oulua faiā ma lau paaga ua iai, e tatau ona e manatunatu ma talisapaia ona uiga lelei, nai lo o le ʻfaatusatusa o ia i le isi tagata.’ (Kalatia 6:4) Na faapea mai Edmond o se tane na toe faaipoipo: “E lē tutusa ni faigāuō se lua, e faapena foʻi ona lē tutusa le tulaga o mea i le taimi muamua na faatoʻā faaipoipo ai, ma le taimi e toe faaipoipo ai.”

E faapefea ona iai iā te oe se vaaiga paleni i uiga o lou toʻalua muamua ma lau paaga ua iai? Na taʻua e Jared, e iai taimi e tomānatu ai i taimi fiafia o lana faaipoipoga muamua. Peitaʻi, ua sili atu lona fiafia ma le talisapaia o lana avā ua iai, faapea le olaga ua la mauaina o se ulugalii.

Na faapea mai Javier o lē ua ono tausaga talu ona toe faaipoipo: “Na iai pea i laʻu avā lagona o loo faitioina o ia e nisi o aʻu uō ma mātau ona masei, e ui ua leva ona ma nonofo.” Peitaʻi, e ese le tulaga na feagai ma se tane e igoa iā Lio. Na ia faapea mai: “E faia e nisi tagata faamatalaga e viiviia ai le tane muamua a laʻu avā a o ou iai.”

FAUTUAGA: Taumafai e malamalama i faalogona o au uō. Ua faapea mai Ian lea na taʻua muamua, atonu e faigatā mo au uō ona talia le mea moni ua iai se isi tagata ua e alofa i ai. O lea, “ia magafagafa, ma ia matuā agamalu i tagata uma.” (Tito 3:2) Ia tuu atu se taimi e faamasani ai au uō ma aiga i lou olaga fou ua iai. Ua faapea mai Javier lea na taʻua, a o faagasolo taimi sa latou toe faifaimea faatasi ma uō ma ē masani. E faatalitalia o le a oulua mauaina nisi uō fou, ona o le suiga ua iai lua olaga. Na faapea atili mai Javier, sa la taumafai ma lana avā ua iai e maua nisi uō fou, ma sa fesoasoani lea iā i laʻua.

Ia amanaʻia faalogona o lau paaga, pe a faatasitasi ma i latou sa masani ona faifaimea faatasi ma lou toʻalua muamua. Pe a taʻua le faaipoipoga  muamua, ia faaaogā le faautaga mamao, ina ia lagona ai e lau paaga o loo amanaʻia ona faalogona. Ua faapea mai le Faataoto 12:18: “O le tagata e tautala lē mafaufau, ua pei o le tutuʻi o le pelu, a o le laulaufaiva o ē e atamamai, e mālōlō ai.”

Na tuua Aneterea e lona toʻalua muamua. Mulimuli ane, na ia faaipoipo atu iā Riley. E masani ona mafaufau Aneterea e sili atu le tane muamua a Riley nai lo o ia. O lea na ia lagona ai le popole ina neʻi lē faamaoni foʻi Riley ma filifili e tuua o ia.

FAUTUAGA: Ia saʻoloto lau talanoa i lau paaga e faatatau i ou popolega. Ua faapea mai le Faataoto 15:22, “e faalēaogāina fuafuaga pe a lē iai ni talanoaga i mataupu faalilolilo.” Na fesoasoani lenā mau iā Aneterea ma Riley, e maufaatuatuaina ai e le tasi le isi. Na faamautinoa atu e Aneterea iā Riley, e lē o le teteʻa le vaifofō i o la faafitauli, ma o le manatu foʻi lenā o Riley. A o faagasolo taimi, sa mafai ona maufaatuatuaina atoatoa e Aneterea Riley.

Pe afai sa lē faamaoni le toʻalua muamua o lau paaga ua iai, ia faia au taumafaiga e faamaonia atu ai e mafai ona maufaatuatuaina oe. O se faataʻitaʻiga, o Michel ma Sabine, o lē na tatala a la faaipoipoga muamua. Na la malilie e taʻu i le isi pe afai e iai se taimi e fesootaʻi ai ma o la taʻitoʻalua muamua. Na taʻua e Sabine, o talanoaga faamaoni faapena, na la mautinoa ai e tumau pea e faavavau le la faaipoipoga.​—Efeso 4:25.

O le toʻatele o tagata e toe faaipoipo, e taulau manuia a latou faaipoipoga. E mafai foʻi ona e taulau manuia, auā o lea ua iai le tomai mai le faaipoipoga muamua. Ua faapea mai Aneterea: “E lē mafaatusalia le fiafia ua ou maua talu ona ou faaipoipo atu iā Riley. Ua 13 tausaga talu ona ma faaipoipo, ma e ma te mananaʻo ia tumau pea le māfana ma le malosi o la ma faiā o se ulugalii.”