Pe e silasila alofa mai le Atua i o tatou mafatiaga? O loo i le Tusi Paia se tali faamāfanafanaloto i lenā fesili. E manatu mamafa mai le Atua, ma e finagalo o ia e tatou te maua le fiafia. E faaalia e le Atua lona agalelei i tagata, e oo lava i ē e lē lotofaafetai. Seʻi mātau upu a le aposetolo o Paulo.​—Faitau le Galuega 14:16, 17.

Na faapea atu Paulo i tagata o le aai o Lusa, o ē e lē tapuaʻi i le Atua: ʻNa tuu e le Atua le faitalia i nuu ese i tupulaga ua mavae, e savavali i o latou lava ala, ae o le mea moni, na ia saunia se molimau i mea lelei na ia faia, auā na ia foaʻi mai le timu mai i le lagi ma fuata o le tau, na foaʻi mai foʻi le anoanoaʻi o meaʻai ma ua tutumu ai o outou loto i le olioli.’ O le ā le uiga o upu a Paulo?

Na faigofie ona malamalama tagata Lusa i le uiga o upu a Paulo. O i latou o ni tagata faifaatoʻaga o le nuu, ma sa latou nonofo i se vaipanoa lafulemu ma tele ai le suāvai. Ae e pei ona taʻua e Paulo, o Ieova o Lē foaʻi mai le timu ma fuata o le tau. O lea, ona o le agalelei o le Atua, ua mafai ai ona latou seleseleina mai ai fua o faatoʻaga, ma fiafia i meaʻai susua.

E tele lesona e tatou te aʻoaʻoina mai i upu a Paulo e faatatau iā Ieova le Atua.

Ua tuuina mai e Ieova iā i tatou le saʻolotoga e filifili ai. E leʻi taofia e Ieova tagata o Nuu Ese mai le “savavali i o latou lava ala.” E tusa ai ma se lomifefiloi e faaaogāina e tagata faaliliu o le Tusi Paia, e uiga atu le savavali i o latou lava ala i le “fai o le mea e latou te fiafia i ai,” po o le “faia o le mea e latou te manatu e sili ona lelei.” E lē faamalosia e Ieova tagata e tapuaʻi atu iā te ia, nai lo lea, ua ia tuuina mai le saʻolotoga e tatou te filifili ai le ituaiga olaga e tatou te ola ai.​—Teuteronome 30:19.

E finagalo Ieova e tatou te aʻoaʻoina e faatatau iā te ia. Na faapea mai Paulo, ʻna saunia e Ieova se molimau.’ I le lomifefiloi na taʻua muamua, e faasino atu lenā faaupuga i le ʻfaailoa manino mai e Ieova o le ituaiga o Atua e iai o ia.’ O foafoaga a le Atua o se faamaoniga malosi lea o ona “uiga lē vaaia,” lea e aofia ai lona agalelei, atamai, mana ma le alofa. (Roma 1:20) Peitaʻi, ua tele atu isi mea ua faailoa mai e Ieova i le Tusi Paia e faatatau iā te ia. (2 Timoteo 3:16, 17) E manino mai la, e finagalo Ieova ia tatou aʻoaʻoina e faatatau iā te ia.

E finagalo Ieova ina ia tatou fiafia. Na taʻua e Paulo: ʻE foaʻi mai e Ieova le anoanoaʻi o meaʻai ma ua tutumu ai loto i le olioli.’ E oo lava i le tagata agasala e lē faafetaia Ieova, e mafai ona ia maua le tele o meaʻai ma maua le fiafia i le olaga. Peitaʻi, e finagalo Ieova ina ia tatou maua le fiafia moni e tumau. O lea, ia aʻoaʻoina le mea moni e faatatau iā te ia ma faatatau i o tatou olaga.​—Salamo 144:15; Mataio 5:3.

E tele aogā ua tatou maua ona o le agalelei o Ieova. O lea, seʻi faaauau pea ona aʻoaʻoina e faatatau i auala e faaalia ai lou lotofaafetai i le Atua, o lē ʻfoaʻi mai le anoanoaʻi o meaʻai ma ua tutumu ai loto i le olioli.’