Na ou ola aʻe i Warialda, o se tamaʻi aai i New South Wales lea e tele atinaʻe e faia ai e pei o lafumanu ma faatoʻaga. O se aai e tau leai ni soligatulafono e tutupu ai.

E toʻasefulu la matou fanauga, ma o aʻu le ulumatua. Na amata ona ou faigaluega i le 13 o oʻu tausaga e fesoasoani ai i le tausiga o lo matou aiga. Talu ai e leʻi lelei ni aʻu aʻoga, o lea sa ou galue ai i le tele o atinaʻe i lo matou nuu. I le 15 o oʻu tausaga, na ou galue ai o sē e tausia lafumanu e pei o solofanua.

Na iai itu lelei ma itu lē lelei o lea galuega. Na ou fiafia i laʻu galuega faapea le siʻomaga faalenatura. Pe a oo i le pō, ou te nofo i tafatafa o se afi e faamāfanafana ai, ma vaavaai i le masina ma fetu o le lagi, a o agi mālū mai le savili. Ou te manatua le tele o taimi ou te manatunatu ai, pe faamata e iai Sē na foafoaina nei mea matagofie. Ae i le isi itu, sa tele taaʻiga leaga sa iai, e pei o le faaaogāina o gagana masoā, ma le ulaula tapaa. E leʻi umi, ae avea na masaniga leaga ma vaega o loʻu olaga.

Ina ua 18 oʻu tausaga, sa ou siitia ai i Sini. Na ou taumafai e saʻili saʻu galuega i le vaegaʻau, ae e leʻi taliaina ona o le lē lelei o aʻu aʻoga. Sa maua laʻu galuega i Sini ma ou nofo ai mo le tausaga. O le taimi foʻi lea faatoʻā ou feiloaʻi ai i Molimau a Ieova. Na ou taliaina se valaaulia e auai i a latou sauniga, ma o i inā na ou iloa ai o loo latou aʻoaʻoina le upu moni.

E leʻi umi ae ou filifili e toe foʻi i le olaga sa iai i nuu i tua. Na ou siitia i Goondiwindi i Kuiniselani, maua saʻu galuega, faaipoipo, ma o i inā na amata ai ona ou inu tele.

Ina ua fananau mai la ma fanau tama e toʻalua, o i inā na amata ai ona ou mafaufau loloto i le mea e tatau ona fai i loʻu olaga. Na ou manatua se manatu sa ou faalogo ai i se  tasi o sauniga a Molimau a Ieova i Sini, ma o lea na fai ai laʻu filifiliga i le mea e tatau ona fai.

Na ou maua se lomiga tuai o Le Olomatamata lea sa iai le tuatusi o le ofisa o le lālā a Molimau a Ieova i Ausetalia. Na ou tusia se tusi, ma lafoina atu e talosagaina ai se fesoasoani. Na talia laʻu talosaga ina ua asiasi mai se Molimau a Ieova e alofa ma agalelei, ma e leʻi umi ae amata laʻu suʻesuʻega faale-Tusi Paia.

Ina ua ou suʻesuʻeina le Tusi Paia, na ou iloa ai e manaʻomia ona faia ni suiga tetele i loʻu olaga. O se tasi o mau na matuā pāʻia ai loʻu loto, o le 2 Korinito 7:1, lea e faalaeiauina ai i tatou ina ia ʻfaamamā mai i mea uma e faaleagaina ai le tino.’

E leʻi faigofie ona tuu laʻu ulaula faapea le inu tele i le ʻava malosi, auā ua leva ona avea o se vala masani o loʻu olaga. Peitaʻi, sa ou maumauaʻi e faia aʻu taumafaiga ina ia ola i se auala e finagalo malie i ai le Atua. Na telē le fesoasoani na ou maua mai i le faatatauina o le mataupu silisili o loo i le Roma 12:2: “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau.” Na ou iloaina mai lenei mau, ina ia mafai ona faia ni suiga i loʻu olaga, sa tatau ona ou vaai i mea e pei ona silasila i ai Ieova, e pei o le auala ou te mafaufau ai, faapea aʻu masaniga leaga sa iai. O lana fesoasoani, na ou manumalo ai mai le ulaula tapaa ma le inu tele.

Peitaʻi, na sili ona faigatā iā te aʻu le taumafai e aua le toe faaaogāina gagana masoā. E ui lava sa ou iloa le fautuaga i le Efeso 4:29 ina “ia aua neʻi alu atu se upuleaga mai i o outou gutu,” ae e leʻi faigofie ona ou tuua lea masaniga. Na fesoasoani iā te aʻu le manatunatu loloto i upu o loo i le Isaia 40:26 lea e faatatau i se pō maninoa: “Ia outou tetepa aʻe ma vāai. O ai ua na faia ia mea? O Lē o loo taʻitaʻia ia mea e pei o se ʻautau e tusa ma le faitau aofaʻi o ia mea, ma ua ia valaau i o latou igoa. Ona o le tele ma le mataʻutia o lona malosi, ma le matuā tele o lona mana, e leai se mea o ia mea ua leiloa.” Na ou taumānatu, pe afai e iai i le Atua le mana e foafoaina ai le vateatea aoao lea sa ou fiafia e vaavaai i ai, e mautinoa foʻi la e mafai ona ia foaʻi mai le malosi ou te faia ai suiga e faafiafiaina ai o ia. O le tatalo faatasi ma aʻu taumafaiga, na faasolosolo ai lava ina mafai ona ou pulea lenei masaniga o le tautala i upu masoā.

A o ou faigaluega o sē tausia lafumanu, e leʻi tele se avanoa na ou maua e talatalanoa ai i tagata, talu ai e lē toʻatele nisi sa galulue ai i inā. Peitaʻi, o mea sa ou aʻoaʻoina mai i sauniga a Molimau a Ieova, sa fesoasoani iā te aʻu e faamatala atu ai i isi oʻu talitonuga. Ua ou maua le lototele e faailoa atu i isi le tala lelei o le Malo o le Atua.​—Mataio 6:9, 10; 24:14.

O loo faaauau pea ona ou auauna ma le fiafia o se toeaina i se tasi o faapotopotoga a Molimau a Ieova. O se faaeaga iā te aʻu le faia o le mea e gata ai loʻu mafai e fesoasoani ai i oʻu uso talitonu.

Ou te faafetaia Ieova ina ua ia aʻoaʻoina aʻu, o sē e leʻi lelei ni aʻoaʻoga. (Isaia 54:13) Ou te maufaatuatuaina atoatoa upu o loo i le Faataoto 10:22 e faapea: “O le faamanuiaga a Ieova, e faatamaoaiga ai.”