Ua faapea mai le Tusi Paia: “Pe a pule le tagata amioleaga, e mapuitigā ai le nuu.”​—Faataoto 29:2.

Ua iloga i le talafaasolopito le toʻatele o taʻitaʻi o malo e pule ma le sauā, ma aumaia ai le tele o mafatiaga i o latou tagatānuu. Ae e lē faapena isi taʻitaʻi o malo, auā e naunau isi e fesoasoani i o latou tagatānuu. Peitaʻi, e latou te maua loa le pule, e masani ona toe fetauaʻi lava i latou po o ai e pule. Atonu e latou te faaaogāsesēina foʻi le pule mo lo latou lava lelei, ae mafatia ai tagata. Na taʻua e Henry Kissinger, o se tasi sa avea ma failautusi o le malo o Amerika: “O le talafaasolopito, ua na o se faamatalaga o taumafaiga lē taulau ma faamoemoega lē taunuu.”

O loo taʻua foʻi i le Ieremia 10:23: “E lē o i le tagata foʻi e savali, ona faatonuina le mea e ui ai o ia.” E lē o iai i tagata lē lelei atoatoa le atamai ma le tofā mamao e taʻitaʻia ai o latou olaga ina ia taulau manuia. Pe afai e lē mafai e tagata ona faatonutonuina o latou ala, e faapefea la ona latou taʻitaʻia se atunuu? Po ua e mātau mai le māfuaaga e lē mafai ai e taʻitaʻi faaletagata ona aveesea mafatiaga? O le mea moni, ua māfua ona mafatia tagata ona o le leaga o faigāmalo po o pulega faaletagata.

Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”​—Ioane 13:35.

O taʻitaʻi lotu uma lava e latou te talaʻia le alofa ma le autasi. Peitaʻi, ua latou lē taulau i le totōina i loto o a latou tagata lotu, le alofa lea e mafai ona aveesea ai so o se uiga faailogatagata. Ua saosaolaumea lotu i le feʻainaʻi ma le feitagaʻi o tagata ma atunuu, nai lo o le fesoasoani iā i latou e atiaʻe le alofa. I le faaiʻuga o lana tusi Christianity and the World Religions, na taʻua e Hans Küng o se tagata poto i aʻoaʻoga faalelotu e faapea: “O tagata e sili ona maelega valea ma faimea piʻopiʻo i faiga faapolotiki, o i latou nei sa iai sa latou aafiaga mai tapuaʻiga.”

 E lē gata i lea, ua lagolagoina e le toʻatele o faifeʻau le faia o feusuaʻiga a o leʻi faaipoipo, mulilua ma faiga faatauatane ma le tauafafine. O nei mea ua oo atu ai i le tele o faamaʻi, faapaʻūtama, maʻitaga e lē manaʻomia, faaipoipoga ma aiga malepelepe, ma ua iʻu ai i le tele o tigā ma mafatiaga.

“A ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.”​—Iakopo 1:14, 15.

Talu ai ua tuufaasolo mai iā i tatou le tulaga lē lelei atoatoa, ua faigofie ona tatou faia mea sesē ma tauivi ma le tuʻinanau o le ʻfaia o mea e manaʻo i ai le tino.’ (Efeso 2:3) E sili ona faigatā ona teena se faanaunauga sesē, pe afai e tatou te maua le avanoa e faatino ai. E mataʻutia iʻuga e oo i ai pe a tatou lolo atu i na tuʻinanauga leaga.

Na taʻua e le tusitala o P. D. Mehta: “O le tele o mafatiaga e māfua ona o o tatou tuʻinanauga, saʻilia ma le lē pulea o faafiafiaga, le faamalieina o o tatou lava manaʻoga, o lo tatou matapeʻapeʻa ma lo tatou faasausili.” Ua faaleagaina olaga o le toʻatele o “tagata faaaloalogia” ma mafatia o latou aiga, uō ma isi, ona o tuʻinanauga ma masaniga e pei o le ʻava malosi, fualaau faasāina, taaloga faitupe, feusuaʻiga ma isi lava mea. Pe a manatu la i le tulaga lē lelei atoatoa o tagata, ua moni ai upu a le Tusi Paia o loo i le Roma 8:22: “Auā ua tatou iloa o loo ōi faatasi pea ma tigā faatasi foafoaga uma e oo mai i aso nei.”

O loo taʻua i le Tusi Paia Satani o “le atua o lenei faiga o mea a le lalolagi,” ma o loo aufaatasi ma ia agaga leaga malolosi ua taʻua o temoni.​—2 Korinito 4:4; Faaaliga 12:9.

E pei o Satani, o loo faaauau ona pulea ma faasesēina e temoni tagata. Na faamaonia lenā manatu ina ua faapea mai le aposetolo o Paulo: “Tatou te lē o tau ma tagata a o malo, ma pule, ma taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi.”​—Efeso 6:12.

E ui lava e fiafia temoni e faatigā i tagata, ae e lē o lo latou faanaunauga autū lenā. E latou te naunau ina ia faaliliuese tagata mai le Atua Silisili Ese o Ieova. (Salamo 83:18) O nisi o auala e faaaogā e temoni e faasesē ma pulea ai tagata, o faiga e pei o le saʻili i fetu, faiga faataulāitu, ma vavalo mea o le a tutupu i le lumanaʻi. O le māfuaaga lenā e lapataʻia ai i tatou e Ieova i na faiga, ma aumaia le puipuiga mo i latou uma e teena Satani ma ana temoni.​—Iakopo 4:7.

Pe tusa ma le 2,000 tausaga ua mavae na valoia ai i le Tusi Paia: “Ia iloa lenei mea, o aso e gata ai e oo mai ai aso e sili ona faigatā.”

O loo taʻua atili le māfuaaga ua sili ai ona faigatā nei aso e faapea: “Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, . . . o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.” E mautinoa o se tasi o māfuaaga autū o le tele o mafatiaga i aso nei, ona o loo tatou ola i “aso e gata ai.”​—2 Timoteo 3:1-4.

Pe a fua la i manatu na tatou iloiloina, po ua lē manino mai ai le māfuaaga e lē mafai ai e tagata ona aveesea mafatiaga, e ui e saʻo le uunaʻiga o loo latou faia ai? O fea e mafai ona tatou saʻili atu ai mo se fesoasoani? E tatou te saʻili atu i Lē na foafoaina i tatou, o lē na folafola mai o le a ia ʻfaalēaogāina galuega a le Tiapolo’ ma i latou e mulimuli atu iā te ia. (1 Ioane 3:8) O le a iloiloina i le mataupu o sosoo mai le auala o le a aveesea ai e le Atua le pogai o o tatou mafatiaga.