Ua faapea mai le tusitala Peretania o le 17 senituri o Edward Herbert: “O se tasi e lē mafai ona faamagaloina isi ua ia momotuina le ala laupapa e ao ona ia savali ai.” O lea faamatalaga e faamatilatila mai ai le māfuaaga e tatau ai ona tatou faamagaloina isi. Auā e iai taimi e manaʻomia ai ona faamagalo i tatou e isi. (Mataio 7:12) Peitaʻi, e iai se māfuaaga e sili atu ona tāua e ao ai ona tatou lotofaamagalo. Mātau upu a le aposetolo o Paulo i le Kolose 3:13.​—Faitau.

Talu ai o i tatou o tagata lē lelei atoatoa, e iai taimi e tatou te faia ai mea e faatigā pe faaita ai isi tagata. Atonu e latou te faia foʻi na tulaga iā i tatou. (Roma 3:23) E faapefea ona tatou tausia le filemu ma isi e lē lelei atoatoa? Na faagaeeina e le Atua Paulo ina ia tusi, ia onosaʻi ma lotofaamagalo. O loo tāua pea lenā fautuaga i aso nei e pei o le taimi na tusia ai i le silia ma lua afe tausaga ua mavae. Seʻi o tatou iloiloina upu a Paulo.

“Ia faaauau ona onosaʻi le tasi i le isi.” O le faaupuga “ia faaauau ona onosaʻi” i le upu Eperu e iai le uiga o le faapalepale. O loo taʻua i se tasi tusitusiga, e faaalia e Kerisiano lea uiga e ala i le “lotomalie e onosaia uiga lē lelei o isi e ui e lē fiafia i ia uiga.” O le faaupuga “le tasi i le isi,” o lona uiga e onosaʻi i vaega uma. O lea, pe a tatou manatua e iai o tatou uiga e lē fiafia ai isi, e lē avea mea e tatou te lē fiafia ai i isi ma itu e saveʻuina ai le filemu ma i latou. Ae faapefea pe a faia e se isi se mea e te tigā ai?

ʻIa faaauau ona fefaamagaloaʻi ma le lotoatoa.’ Ua faapea mai se tasi tagata atamai, o le upu Eleni “fefaamagaloaʻi ma le lotoatoa” “e lē na o se faaupuga masani e faamatala ai le uiga o le faamagalo . . . ae o loo faamatilatila mai ai le uunaʻiga e faamagalo ai, o le alofa fua.” Ae i se isi tusitusiga, e faasino atu lenei faaupuga i le “faia o se gaoioiga ona o le lotomalie, alofa ma e aogā.” E tatou te faaalia le alofa fua i le lotomalie e faamagalo isi e tusa pe “faia e se tasi se mea e tigā ai le isi.” Aiseā e ao ai ona tatou faamagaloina isi? Auā e iai le taimi e manaʻomia ai ona faamagaloina i tatou e isi.

“E pei ona finagalo malie Ieova e faamagalo iā te outou, ia faapea foʻi ona outou faia.” O le māfuaaga sili lea e tatou te lotomalilie ai e faamagalo ai i isi. (Mika 7:18) Seʻi manatu i le alofa sili o Ieova ua ia faamagaloina ai tagata agasala ua salamō. E lē agasala Ieova e pei o i tatou. Peitaʻi e finagalo malie o ia e faamagalo tagata agasala ua salamō, e ui e na te silafia e na te lē manaʻomia le faamagaloga a tagata. Ioe, o Ieova o le faaaʻoaʻoga sili o lē e finagalo malie e faamagalo tagata agasala ua salamō!

O le alofa mutimutivale o Ieova e tosina atu ai i tatou iā te ia ma uunaʻia e faaaʻoaʻo iā te ia. (Efeso 4:32–5:1) E lelei ona tatou fesili ifo iā te i tatou lava, ʻAfai ua alofa fua mai Ieova ma faamagalo aʻu, e faapefea la ona ou lē faamagaloina se tagata lē lelei atoatoa o lē ua salamō moni mo le mea sesē na ia faia iā te aʻu?’​—Luka 17:3, 4.