Pe e faatāua e Ieova taumafaiga o loo faia e ona tagata tapuaʻi e faafiafia ai o ia? Atonu e faapea mai nisi e lē o manatu mamafa mai o ia. Peitaʻi o lenā faamatalaga ua sesē ai le vaaiga e faatatau i le Atua. Ae ua faailoa mai i lana Afioga le Tusi Paia le mea moni e faapea, e faatāua e Ieova taumafaiga a ona tagata tapuaʻi faatuatua. Seʻi mātau upu a le aposetolo o Paulo o loo i le Eperu 11:6.

O le ā e tatau ona fai ina ia faafiafiaina le finagalo o Ieova? Na tusi Paulo: ʻA aunoa ma le faatuatua e lē mafai ona faafiafiaina o ia [le Atua].’ Mātau, e lē o faapea mai Paulo e faigatā ona faafiafiaina le Atua pe a aunoa ma le faatuatua. Nai lo lea, na ia faapea mai pe a aunoa ma le faatuatua e lē mafai ona faafiafiaina le Atua. I se isi faaupuga, ina ia faafiafiaina le Atua e tatau ona iai le faatuatua.

O le ā le ituaiga o faatuatua e manaʻomia ina ia faafiafiaina ai Ieova? E lua vala o lo tatou faatuatua e tatau ona iai. Muamua, e ʻtatau ona talitonu o loo soifua o ia.’ E faapefea ona faafiafiaina Ieova pe afai e tatou te lē mautinoa o loo soifua o ia? E lē lava le tau na ona iai o le faatuatua moni, auā e oo foʻi i temoni e talitonu o loo soifua Ieova. (Iakopo 2:19) O le talitonu o loo soifua Ieova e uunaʻia ai i tatou e gaoioi, ma faamaonia atu lo tatou faatuatua e ala i le ola i se auala e faafiafiaina ai o ia.​—Iakopo 2:20, 26.

Lona lua, e tatau ona tatou talitonu o le Atua o lē e “tauia.” O le tagata e moni le faatuatua e talitonu atoatoa o loo aogā ana taumafaiga ina ia ola i se auala e faafiafiaina ai le Atua. (1 Korinito 15:58) E faapefea ona tatou faafiafiaina Ieova pe afai e tatou te fesiligia lona tomai po o lona finagalo e tauia i tatou? (Iakopo 1:17; 1 Peteru 5:7) O se tasi e faapea mai e lē manatu mamafa, lē lotofaafetai ma e lē agalelei le Atua, o le mea moni e na te lē iloa le Atua o le Tusi Paia.

O ai e tauia e Ieova? ʻO ē e matuā saʻili iā te ia.’ I se tasi o tusi o loo faaaogāina e tagata faaliliu o le Tusi Paia, o loo faasino atu le faaupuga Eleni ua faaliliuina “matuā saʻili” i le faia o taumafaiga ina ia “tapuaʻi” i le Atua, nai lo o le tau ina saʻili mo le Atua. Ae i se isi lomifefiloi, o loo uiga atu lenei faaupuga Eleni i taumafaiga filigā ma malolosi. O le mea moni e tauia e Ieova i latou e tapuaʻi atu iā te ia ma le lotoatoa ona o le faatuatua.​—Mataio 22:37.

O le ā le taui ua tuuina mai e Ieova mo ona tagata tapuaʻi faatuatua? Ua ia folafola mai se taui matagofie o le ola e faavavau i se lalolagi Parataiso, lea e faaalia ai le moni o lona agalelei ma lona alofa. (Faaaliga 21:3, 4) E oo lava i aso nei, o loo maua e i latou o loo matuā saʻili iā Ieova le tele o faamanuiaga. E latou te maua se olaga fiafia ma faamalieina ona o le fesoasoani a le agaga paia o Ieova, faapea fautuaga aogā o loo i lana Afioga.​—Salamo 144:15; Mataio 5:3.

Ioe, o Ieova o se Atua e talisapaia ma faatāua le auaunaga faamaoni o loo faia e ona tagata tapuaʻi faatuatua. Pe e lē uunaʻia ai ea oe e mafuta vavalalata atu iā te ia? Afai o le tulaga lenā, aiseā e te lē aʻoaʻoina atili ai e faatatau i le auala e atiaʻe ma faaalia ai le ituaiga o faatuatua e matuā tauia e Ieova?