E faitau miliona tagata e mananaʻo e ō i le lagi pe a feoti. Na fetalai Iesu o le a ola i le lagi ona aposetolo faamaoni. A o leʻi maliu o ia, na ia folafola o le a ia saunia se nofoaga mo i latou e faatasi ai ma lona Tamā i le lagi.​—Faitau le Ioane 14:2.

Aiseā o le a toe faatutūina ai i latou i le lagi? O ā mea o le a latou faia i inā? Na fetalai Iesu i ona aposetolo o le a avea i latou ma tupu, ma o le a pule mai i le lalolagi.​—Faitau le Luka 22:28-30; Faaaliga 5:10.

I le tele o atunuu, e toʻaitiiti lava tagata e avea ma pule. Talu ai e toe faatūina e Iesu tagata i le lagi ina ia mafai ona latou pule mai i le lalolagi, e tatou te faatalitalia foʻi la e toʻaitiiti i latou e tofia e avea ma pule. (Luka 12:32) O loo taʻua i le Tusi Paia le fuainumera patino o i latou o le a pule faatasi ma Iesu.​—Faitau le Faaaliga 14:1.

E lē na o i latou e ō i le lagi o le a maua le taui. O le a olioli foʻi tagatānuu faamaoni o le Malo o Iesu i le ola e faavavau i se lalolagi parataiso. (Ioane 3:16) O nisi o le a sao atu i le Parataiso pe a faasaoolaina mai le faaumatiaga o lenei faiga amioleaga o mea, a o isi o le a faasaoina pe a toetutū mai.​—Faitau le Salamo 37:29; Ioane 5:28, 29.