Pe e te talitonu i le folafolaga a le Tusi Paia e faatatau i le toetū? * O le toe faatasi ma ē e pele iā i tatou ua maliliu, o se tala e logolelei. Peitaʻi, faamata e moni lenā faamoemoe? Ina ia maua le tali, seʻi o tatou iloiloina faaaʻoaʻoga a aposetolo o Iesu Keriso.

Na matuā talitonu le ʻauaposetolo i le toetutū mai o ē ua maliliu. Aiseā? E lua nisi o māfuaaga. Muamua, na faavae lo latou talitonuga i le mea moni lenei: Na toetū Iesu mai le oti, ma na vaaia e le ʻauaposetolo ma “le ʻauuso pe ā ma le toʻalima selau” le toetū mai o Iesu. (1 Korinito 15:6) E lē gata i lea, o loo taʻua foʻi i evagelia e fā le toetū o Iesu.​—Mataio 27:62–28:20; Mareko 16:1-8; Luka 24:1-53; Ioane 20:1–21:25.

Lona lua, na molimauina foʻi e aposetolo i latou na faatutūina e Iesu. O le toetū muamua na faia i Naina, sosoo ai Kapanaumi, ma mulimuli ane i Petania. (Luka 7:11-17; 8:49-56; Ioane 11:1-44) O le toetū lea na faia i Petania, lea na taʻua i se tasi o mataupu ua muamua atu, o loo aafia ai se aiga e māfana la latou mafutaga ma Iesu. Seʻi o tatou iloilo le mea na tupu.

Ina ua mavae aso e fā talu ona maliu Lasalo, na fetalai atu ai Iesu iā Mareta: “O le a toetū lou tuagane.” E leʻi malamalama Mareta i le uiga o upu a Iesu. O lea na ia faapea atu ai, “Ou te iloa o le a toetū o ia.” Na manatu Mareta o le a toetū mai lona tuagane i se taimi o le lumanaʻi. Ae seʻi faaāta i o tatou mafaufau le faateʻia o ia ina ua ia faalogo o fetalai Iesu, “O aʻu o le toetū ma le ola.” Na ia vaaia le toe faatūina mai e Iesu o lona tuagane mai le oti!​—Ioane 11:23-25.

O fea sa iai Lasalo mo aso e fā ina ua maliu? E leai se faamatalaga a Lasalo e iloa ai sa ola o ia i se isi nofoaga mo aso e fā. E leʻi iai foʻi se agaga o Lasalo na alu i le lagi. Ina ua faatūina e Iesu Lasalo, e leʻi faapea na ia aveesea Lasalo mai le lagi, o se nofoaga parataiso e olioli faatasi ai ma lona Atua. O fea la sa iai Lasalo mo aso e fā? O le mea moni, sa moe o ia i le tuugamau.​—Failauga 9:5, 10.

Ia manatua foʻi, na faatusaina e Iesu le toetū i se tasi sa moe ae ua toe ala mai. Ua faapea mai le Ioane 11:11-14: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.” Ona tali mai lea o ona soo iā te ia: “Le Alii  e, afai o loo mālōlō o ia, e toe malosi.” Peitaʻi ua fetalai Iesu e uiga i lona oti, ae ua manatu i latou ua fetalai o ia, o loo moe o ia e mālōlō. O lea na fetalai saʻo atu ai Iesu iā i latou: “Ua oti Lasalo.” Na toe faatasi Lasalo ma lona aiga ina ua toe faatūina o ia e Iesu. Maʻeu se meaalofa matagofie na saunia e Iesu mo lenei aiga!

O toetū na faia e Iesu a o iai i le lalolagi, ua na o se ata lenā o mea o le a ia faia i le lumanaʻi, pe a avea o ia ma Tupu o le Malo o le Atua. * I le taimi o lana pulega i luga o le lalolagi, o le a ia toe faatutū mai ai i latou o loo momoe i tuugamau. O le māfuaaga lea na ia fetalai ai, “O aʻu o le toetū.” Seʻi faaāta i o tatou mafaufau le fiafia o le a iai pe a toetutū mai ē e pele iā i tatou! E lē gata i lea, mafaufau foʻi i le olioli o le a maua e i latou o le a toetutū mai!​—Luka 8:56.

Na fetalai Iesu iā Mareta: “O lē e faatuatua mai iā te aʻu, e ui ina oti o ia, ae e toe ola mai lava, a o ē o loo ola ma faatuatua mai iā te aʻu, e lē oti lava.” (Ioane 11:25, 26) O i latou o le a toe faatutū mai e Iesu a o faagasolo le afe tausaga, o le a maua le ola e faavavau pe a latou faatuatua iā te ia.

Ina ua uma ona fetalai Iesu e faatatau i le toetū, ona ia fesili atu lea iā Mareta i se fesili tāua e faapea: “ʻPe e te talitonu i lenei mea?’ Ona fai mai lea o ia iā te ia: ʻIoe, le Alii e, ua ou talitonu o oe o le Keriso, o le Alo o le Atua.’” (Ioane 11:26, 27) Ae faapefea oe, pe e te manaʻo e atiaʻe le faatuatua i le toetū na iai iā Mareta? Muamua, e ao ona aʻoaʻoina le poto e faatatau i le Atua ma lana fuafuaga mo tagata. (Ioane 17:3; 1 Timoteo 2:4) O le faia faapea e taʻitaʻia atu ai i le faatuatua. Aiseā e te lē fesili atu ai i se tasi o Molimau a Ieova e faatatau i lea mataupu? E latou te fiafia e talatalanoa faatasi ma oe e faatatau i lenei faamoemoe matagofie o le toetū.