O loo taʻua i le Tusi Paia, na faaaogā aloe ina ia faamanogi ai lāʻei ma moega. (Salamo 45:8; Faataoto 7:17; Pese a Solomona 4:14) E foliga mai o aloe i le taimi o le Tusi Paia, sa maua mai i le laau o le Agarwood, o se tasi o ituaiga o laau mai le Aquilaria. Pe a pala le laau, ona maua mai ai lea o le sua ma se uu manogi. E oloina lenei laau ina ia avea ma pauta, lea e maua mai ai le “aloe” e faatauina atu.

I le Tusi Paia, e faatusaina faleʻie o Isaraelu “e pei o laau o le aloe ua totōina e Ieova.” (Numera 24:5, 6) Atonu e uiga atu i foliga o le laau o le Agarwood, lea e mafai ona oo atu lona maualuga i le 100 futu (30 m), ma o se laau e ola mafalā. E ui ua lē o toe maua lenei laau i Isaraelu i aso nei, ae ua taʻua i le A Dictionary of the Bible, “e lē aveesea ai le mea moni sa ola lenei laau ma isi laau i le vanu o Ioritana, o se vaipanoa sa tamaoaiga ma toʻatele tagata na nonofo ai.”

Na taʻua i le Tulafono a le Atua, o taulaga uma e ofo atu i le malumalu e tatau ona matuā lelei. E lē taliaina e le Atua se taulaga e ponā. (Esoto 23:19; Levitiko 22:21-24) Na taʻua e Philo, o se tusitala Iutaia mai le uluaʻi senituri T.A. e faapea, e siakiina lelei e ositaulaga manu mai lava “i le tumuaʻi e oo i alofivae,” ina ia faamautinoa “e leai se ponā po o se maʻi.”

Na faapea mai se tagata atamai e igoa iā E. P. Sanders, atonu na ʻfaataga e alii o le malumalu tagata faatau manu maufaatuatuaina, e faatau atu manu ma manulele ua uma ona siakiina lelei e ositaulaga mo taulaga. Na tuuina atu e le tagata faatau manu se faamaufaailoga i le tagata faatau, ina ia faamautinoa ai e lē ponā lenā manu.’

I le tausaga e 2011, na maua ai e ni tagata suʻesuʻe i toega o mea i le eleele se tamaʻi faamaufaailoga, i se vaipanoa e lata ane i le malumalu. O lenei faamaufaailoga ʻele, e tusa lona telē ma se tupe siliva. Atonu na faaaogā lenei faamaufaailoga i le va o le uluaʻi senituri T.L.M. ma le 70 T.A., ma o loo iai upu faa-Arama e faapea “Mamā mo le Atua.” O lona uiga, na faaaogā e alii o le malumalu nei faamaufaailoga ina ia faailoga ai manu ma isi mea e faaaogā mo taulaga.