Sa ou ola aʻe i Riga le laumua o Latvia. O loʻu tinā o se Katoliko, ma na ia tausia aʻe i maʻua ma loʻu tuafafine. E pau lava le taimi e ma te ō ai i le lotu, o taimi e faia ai aso faamanatu faalelotu. E mai lava i loʻu laʻitiiti, na ou talitonu e iai se malosiaga e sili atu. Ae ina ua ou tuputupu aʻe ma avea o se talavou, sa ou tosina atu i le tele o isi mea o le olaga.

Na mātauina e loʻu tinā e iai loʻu tomai e toe tuufaatasi ai ni mea na ou faaleagaina, e pei o le tele o mea i totonu o lo matou fale. O le māfuaaga lea e popole ai e tuua na o aʻu i le fale. O lea na ia faatauina mai ai se pusa e iai mea eseese e mafai ona ou tatala ma toe tuufaatasia. Peitaʻi, na iai foʻi se isi mea na ou fiafia i ai, o tuuga pasika. O lea, sa lesitalaina ai e loʻu tinā loʻu igoa i se tuuga pasika e taʻua o le Zelta Mopēds po o le The Golden Moped. Na ou amata i mopeds po o pasika vilivae, ae na mulimuli ane oʻu auai loa i tuuga pasika.

Sa vave ona ou aʻoaʻoina le tele o mea e faatatau i lenei taaloga e lamatia ai le ola, ma ou maua ai se olaga taulau manuia. E faatolu ona ou siamupini i lenei taaloga i Latvia, ae e faalua ona ou manumalo i le Baltic States Superbike Championship.

A o sologa lelei loʻu olaga i lenei taaloga, na feiloaʻi ai laʻu uō teine o Evija (lea ua avea nei ma aʻu avā) ma Molimau a Ieova. Na ia mauaina nisi o a latou lomiga ma faatumu le tuatusi o loo i le pito i tua, ma lafo i le meli e talosagaina ai le faia o se talanoaga faale-Tusi Paia. E leʻi umi ae asiasi mai ni fafine Molimau a Ieova se toʻalua iā te ia, ma amata ai loa lana suʻesuʻega faale-Tusi Paia. E leʻi iai se afāina o lenā tulaga iā te aʻu. Peitaʻi, ou te leʻi naunau moni i mea faaleagaga i lenā taimi.

Mulimuli ane, na faapea mai nei mafine pe ou te fia auai ma faalogologo i le suʻesuʻega a Evija. Na ou taliaina ma na  ou fiafia i mea sa talanoaina ai. Na matuā pāʻia loʻu loto i le folafolaga a le Tusi Paia e faatatau i se lalolagi parataiso. O se faataʻitaʻiga, na sili ona ou fiafia i le folafolaga o loo i le Salamo 37:10, 11 e faapea: “Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”

Sa faaauau ona tuputupu aʻe loʻu naunau i mea faaleagaga, ma na amata ai ona ou iloa le tele o aʻoaʻoga pepelo o loo aʻoaʻoina i lotu. E ese mai ai aʻoaʻoga o loo i le Tusi Paia, lea e faigofie ona malamalama i ai ma lagona ai le faafouina.

A o faaauau ona ou suʻesuʻeina le Tusi Paia, na ou aʻoaʻoina ai le silafaga a le Atua i le ola, o se mea e matuā tāua iā te ia. (Salamo 36:9) O lenā manatu na iai se aafiaga iā te aʻu, ma na ou manaʻo ai loa e faaaogā loʻu ola e auauna ai iā Ieova, nai lo o le alu lē aogā i nei taaloga e lamatia ai le ola. O le olaga taʻutaʻua, viiga, ma le fiafia e maua mai i le taututuu i pasika, e leʻi toe iai se tāua iā te aʻu.

I le 1996, na ou auai ai i se tauaofiaga faavaomalo a Molimau a Ieova na faia i Tallinn i Estonia, lea e lē mamao mai i malae ia sa masani ona ou taututuu ai. I lenā tauaofiaga, na ou vaai ai i tagata mai atunuu eseese o loo nonofo faatasi i le filemu ma le autasi. O se faataʻitaʻiga, ina ua leiloa se ato tupe a se tasi o fafine Molimau a Ieova, na ou manatu e lē toe maua. Ae e leʻi umi ae toe faafoʻi mai e se isi Molimau a Ieova na mauaina le ato, e aunoa ma se mea na aveesea. Na matuā faateʻia lava aʻu, ma na ou talitonu ai, e moni lava e ola Molimau a Ieova e tusa ma tapulaa maualuluga o le Tusi Paia. Na faaauau pea la ma suʻesuʻega ma Evija, ma i le 1997, na papatisoina ai loa i maʻua o ni Molimau a Ieova.

E iai nisi o aʻu uō ua maliliu ona o lenei taaloga mataʻutia o le taututuu i pasika. O le suʻesuʻeina o le Tusi Paia, na ou malamalama ai o lea ou te nofo aitalafu iā Ieova o Lē na foaʻi maia le ola. O lenā malamalamaga na faasaoina ai loʻu ola.

O se faaeaga lo ma galulue ma Evija i le ofisa o le lālā a Molimau a Ieova i Riga mo le fā tausaga. I le taimi lenei o loo ma fiafia i le tausia aʻe o la ma tama teine o Alise, ma fesoasoani iā te ia e atiaʻe lona alofa mo Ieova. E tasi le aso i le vaiaso ou te galue ai i le ofisa faaliliu i le faaleleia o taavale ma isi mea, ma o se faaeaga foʻi lenā mo aʻu. O se fiafiaga mo aʻu le faaaogā lelei o loʻu tomai na maua mai a o oʻu laʻitiiti. Ioe, o lea lava ou te tatalaina mea ma toe tuufaatasi.

E matou te matuā faatāuaina ma loʻu aiga le faaeaga o le molimau atu e faatatau i le Atua moni e toʻatasi. O nei mea uma, na ou aʻoaʻoina mai i le Tusi Paia. Ioe, na suia loʻu olaga ona o le folafolaga i se lalolagi parataiso!