Pe tusa ma le 100 tausaga ua mavae, na tuua ai e le faitau miliona o alii talavou se olaga saogalemu i o latou aiga ae ō atu ma le naunau i le taua, ona o le malosi o lo latou lotonuu. Na faamatalaina e se tasi mai Amerika na tauofo e alu i le taua i le 1914, na ia lagona le fiafia ma tulimataʻia le taimi e alu ai i le taua.

Peitaʻi, na suia lo latou naunau fiafia i le faanoanoa. E leai se tasi na mafaufauina o le umi lea o le a tau ai ʻautau malolosi i Peleseuma ma Falani. I lenā vaitaimi na taʻua ai e tagata lenā taua o le “Taua Tele,” po o le taua muamua a le lalolagi e pei ona iloa ai i aso nei.

E mataʻutia lenei taua, pe a fua atu i le toʻatele o tagata na manunuʻa ai. I se fua faatatau, pe tusa ma le 10 miliona tagata na maliliu ai, ma le 20 miliona na manunuʻa tigāina ona o le sesē o faaiʻuga a faigāmalo. Na lē mafai e tagata maualuluga o malo o le atu Europa ona taofia feeseeseaʻiga faavaomalo, lea na iʻu ina aafia ai le lalolagi atoa. O loo iai pea aafiaga tumau o lenei “Taua Tele” i tagata, ma na matuā suia ai le lalolagi e oo mai i aso nei.

Na māfua le taua muamua o le lalolagi ona o le sesē o filifiliga sa faia. Na lilo i manatu o taʻitaʻi o Europa, ʻo filifiliga na latou faia o le a iʻu atu ai i se taua e aafia ai le lalolagi atoa i lenā vaitaimi filemu i le 1914.’—The Fall of the Dynasties—The Collapse of the Old Order 1905-1922.

I nai vaiaso mulimuli ane, na tagatavaleina ai se tasi o aloalii o Oseteria, ona amata loa lea ona fetauaʻi malo malolosi o Europa, o se tulaga e latou te leʻi mananaʻo i ai. Na fesiligia le taʻitaʻi o Siamani po o le ā le pogai o lenei taua, ae na ia faapea mai ma le faanoanoa, “maʻimau pe ana iloa e se tasi le māfuaaga.”

E leʻi iloa e nei taʻitaʻi le iʻuga e oo i ai ona o a latou filifiliga sesē. Peitaʻi, na vave lava ona iloa e fitafita o loo i le taua le mea moni o loo tupu. Na latou iloa mulimuli ane, e leʻi tausisi taʻitaʻi o malo i a latou folafolaga, faasesēina i latou e o latou taʻitaʻi lotu, ma na pelogia i latou e o latou taʻitaʻiʻau. I le ā le itu?

Na folafola e taʻitaʻi o malo, o lenei taua o le a maua ai se olaga e sili ona lelei ma filemu. Na folafola e le taʻitaʻi o Siamani: “O loo tatou tau ina ia sologa lelei a tatou fefaatauaʻiga, faapea le tofi mai i o tatou tuaʻā ma le lumanaʻi.” Na faailoa mai foʻi e le peresitene o Amerika i lenā vaitaimi o Woodrow Wilson, se faaupuga taʻutaʻua e faapea, o lenei taua ʻo le a saogalemu ai le lalolagi i faigāmalo faatemokalasi.’ Ae na manatu tagata i Peretania, o lenei taua ʻo le a faaiʻuina ai taua.’ Peitaʻi, e sesē uma na manatu.

Na lagolagoina malosi e taʻitaʻi lotu lenei taua. Ua faapea mai le The Columbia History of the World: “Na tausolomua taʻitaʻi lotu i le uunaʻia o tagata e ō i le taua, nai lo o le aʻoaʻoina e faatatau i le Tusi Paia. O lenei taua na faatuputeleina ai le feitagaʻi.” Na uunaʻia e taʻitaʻi lotu le feitagaʻi nai lo o le faaitiitia. O loo faamatalaina i le tusi o le A History of Christianity e faapea, ʻNa mananaʻo taʻitaʻi lotu e faamuamua le lotonuu nai lo o le faatuatuaga faa-Kerisiano. E toʻatele sa latou filifilia le auala faigofie, ma faapea mai e tutusa le faa-Kerisiano ma le lotonuu. Na apoapoaʻi atu taʻitaʻi lotu i fitafita Kerisiano ina ia fasiotia e le tasi le isi, i le suafa o lo latou Faaola o Keriso.’

Na folafola e taʻitaʻiʻau o le a faigofie ma vave ona latou mauaina le manumalo, ae e lē o le tulaga lenā na iai auā na faaauau pea ona fetauaʻi atunuu. O le māfuaaga lea na faapea mai ai se tusitala o talafaasolopito, “na fesagaʻia e le faitau miliona o fitafita se taua e sili ona mataʻutia, lea na matuā aafia ai o latou mafaufau ma faalogona.” E ui i le toʻatele o i latou na fasiotia ai, ae na faaauau pea ona auina atu e taʻitaʻiʻau le tele o fitafita i lenei taua. Mulimuli ane, na amata loa ona fouvale nei fitafita.

O le ā le aafiaga na iai i tagata ona o le taua muamua a le lalolagi? O loo faamatalaina i se tusi o talafaasolopito le faamatalaga a se tasi na auai i lenā taua e faapea: “Na faaleagaina e le taua le auala e mafaufau ma amioaʻi ai tagata.” O lenei taua na mou atu ai malo malolosi sa iai i lenā vaitaimi. O lenā mea na tupu, sa avea ma amataga o le faamasaatoto sili ona mataʻutia i le talafaasolopito o tagata. Talu mai lenā taimi, ua avea fouvalega ma solo tetee o se mea e masani ai.

Aiseā na suia ai e lenei taua le tulaga o mea i le lalolagi? Pe na avea lenei taua o se faalavelave mataʻutia? Po o faaalia mai i tali o nei fesili se mea e faatatau i lo tatou lumanaʻi?