Na faamatala mai e Naoko lea na taʻua i le mataupu ua teʻa le māfuaaga na mafai ai ona tuu lana ulaula: “Na suia loʻu olaga ona o mea na oʻu aʻoaʻoina e faatatau i uiga o le Atua ma lana fuafuaga.” O mea na ia aʻoaʻoina e mai i le Tusi Paia. E ui e lē o taʻua se tapaa i le Tusi Paia, ae e mafai ona fesoasoani iā i tatou e malamalama ai i le silafaga a le Atua i le ulaula. * O lenā malamalamaga ua fesoasoani i le toʻatele e manumalo mai ai i lenei masaniga leaga. (2 Timoteo 3:16, 17) Seʻi o tatou iloilo ni aafiaga se tolu o le tapaa, ma tilofaʻia po o le ā le manatu o le Tusi Paia.

E iai i le tapaa se vailaau e taʻua o le nikotini, lea e māfua ai ona fiafia pea le tagata e ula le tapaa. O lenei vailaau e pei e faatupu malosi, ae e vaivai ai foʻi le tino. E vave ona oo le nikotini i le faiʻai pe a ula le tapaa. O le miti e tasi o le tapaa e tutusa lenā ma se inumaga se tasi o le nikotini. I se fua faatatau, e tusa ma le 200 inumaga o le nikotini i le aso pe a ulaina se pepa sikareti atoa, ma e matuā tele lava ia inumaga pe a fua atu i isi fualaau. O le māfuaaga lea e manaʻo ai pea le tagata e ulaula. O lea, e iai aafiaga i le tagata ulaula pe a lē faamalieina lona manaʻo i le nikotini.

Ina ia iai se vaaiga saʻo e faatatau i lenei mataupu, ua faapea mai le Tusi Paia: “Pe e tou te lē iloa ea, afai tou te tuuina atu outou i se tasi e fai ma pologa e usiusitaʻi i ai, o outou o ana pologa auā ua outou usiusitaʻi iā te ia?” (Roma 6:16) Pe a pulea gaoioiga ma le mafaufau o se tasi i le tapaa, ua avea la o ia ma pologa a lenā masaniga leaga. Peitaʻi, e finagalo Ieova le Atua ina ia tatou saʻoloto mai i mea e faaleagaina ai le tino ma le agaga, po o le mafaufau. (Salamo 83:18; 2 Korinito 7:1) O lea, pe a atiaʻe e se tasi le faaaloalo loloto mo Ieova, o le a ia iloa ai e tatau ona avatu le mea e sili ona lelei mo Ia. Peitaʻi, e lē mafai ona ia faia faapea a o avea o ia ma pologa a le tapaa. O le iloaina o lenā mea moni, e fesoasoani ai i se tasi e teena lenei masaniga leaga.

E 16 tausaga o feagai Olaf mai i Siamani ma lenei masaniga, ma na amata ona ulaula i le 12 o ona tausaga. Na ia faapea mai: “O le tapaa muamua sa pei o se tamaʻi poloka ʻaisa, ae a o faagasolo tausaga, sa pei o se mauga ʻaisa. I se tasi taimi ina ua leai saʻu tapaa, na ou lagona ai loʻu matuā fia ula ma na ou aoina ai ni muli sikareti ma tāʻai faatasi i se nusipepa ma ula. E lagona le māsiasi pe a ou toe mafaufau i lenā taimi.” Na faapefea ona ia tuua lenā masaniga leaga? Na faapea mai o ia: “O le māfuaaga autū ona  o loʻu faanaunauga e faafiafia Ieova, ma o le alofa o Ieova i tagata ma le faamoemoe ua ia saunia, na maua ai le malosi e tuu motu ai laʻu ulaula.”

Ua taʻua i le tusi The Tobacco Atlas: ʻUa faamaonia mai e suʻesuʻega faasaienisi, o le ulaula tapaa e toetoe aafia ai totoga uma o le tino ma ua faatupulaʻia ai maʻi ma le oti.’ O le pogai lea o nisi o faamaʻi lē pipisi e pei o le kanesa, maʻi fatu, ma le faaleagaina o māmā. Peitaʻi, e tusa ai o se lipoti mai i le WHO, o le ulaula tapaa o le pogai autū foʻi lea o le maliliu o tagata i faamaʻi pipisi e pei o le fatafata vaivai.

E ala mai i lana afioga le Tusi Paia, ua aʻoaʻoina ai i tatou e Ieova ina ia iai se vaaiga saʻo i o tatou olaga, tino, ma le mafaufau. Na taʻua e lona Alo o Iesu e faapea: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mataio 22:37) E manino mai, e finagalo le Atua e faaaogā tatau o tatou olaga ma tausia lelei o tatou tino. A o tatou aʻoaʻoina mea e uiga iā Ieova ma ana folafolaga, o le a tatou talisapaia ai ma le fiafia mea ua ia faia mo i tatou. O le a uunaʻia ai foʻi i tatou e tetee atu i so o se mea e faaleagaina ai le tino.

Na faapea mai Jayavanth o se fomaʻi i Initia sa ulaula mo le 38 tausaga: “Na ou aʻoaʻoina le mataʻutia o le ulaula tapaa mai i mekasini faafomaʻi. Na ou iloa e leaga, ma na ou fautuaina aʻu maʻi e tuu le ulaula, peitaʻi e leʻi mafai ona tuu laʻu ulaula e ui sa ou taumafai faalima pe faaono e tuu.” O le ā na fesoasoani iā Jayavanth? Na ia faapea mai: “Na mafai ona tuu ina ua fai laʻu suʻesuʻega faale Tusi Paia. O loʻu faanaunauga e faafiafia Ieova, na uunaʻia ai aʻu e lafoaʻia lenā masaniga leaga.”

E oona le asu o loo feula mai i fafo e le tagata ulaula. O lea, pe a mānavaina e se tasi lenā asu e aafia ai o ia i le kanesa ma isi faamaʻi eseese, ma ua fasiotia ai le 600,000 o tagata e lē ulaula i tausaga taʻitasi, aemaise lava i fafine ma tamaiti. Ua  taʻua i se lipoti mai i le WHO: “E aafia tagata e lē ulaula e oo lava i sina asu e latou te mānavaina.”

E lona lua atu i le alofa i le Atua le alofa i o tatou tuaoi, e aofia ai o tatou aiga, uō, ma isi tatou te faatasi. Na taʻua e Iesu e faapea: “Ia e alofa atu i lou tuaoi e pei o oe lava iā te oe.” (Mataio 22:39) O lea pe afai e iai se mea e tatou te fiafia e fai ae e aafia ai isi, e tatou te lē o faaalia la le alofa i o tatou tuaoi. O le alofa moni e uunaʻia ai i tatou e mulimuli i le fautuaga a le Tusi Paia: “Aua neʻi saʻilia e se tasi lona lava lelei, a ia faaauau ona saʻili le lelei o isi.”​—1 Korinito 10:24.

Na taʻua e Armen mai Aminia e faapea: “Na tauanau aʻu e loʻu aiga e tuu laʻu ulaula ona o loo aafia ai i latou. Ou te leʻi manaʻo ou te ioe o loo aafia isi i laʻu ulaula.” Na faamatala mai e Armen le māfuaaga na suia ai lona manatu: “O mea na ou iloa mai i le Tusi Paia ma loʻu alofa mo Ieova na fesoasoani e tuu ai laʻu ulaula, ma amanaʻia le mea moni e lē na o aʻu o loo aafia ai ae o loo aafia ai foʻi isi.”

O le atamai mai i le Tusi Paia na fesoasoani ia Olaf, Jayavanth, ma Armen e saʻoloto mai ai i lenei masaniga leaga. O lo latou taulau e tuu motu le tapaa e leʻi māfua mai i le iloaina o ona aafiaga, ae ona o lo latou alofa mo Ieova ma le faanaunauga ina ia faafiafia o Ia. O loo faailoa mai e le 1 Ioane 5:3 le tāua o le alofa e faapea: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” O le mea moni e lē faigofie le usitaʻia o taiala mai i le Tusi Paia, peitaʻi o le malosi o le alofa o se tasi i le Atua e uunaʻia ai o ia e usitaʻi.

Ua fesoasoani Ieova i le faitau miliona o tagata ina ia saʻoloto mai i le faapologaina i le tapaa, e ala i se polokalame tau aʻoaʻoga o loo faia i le lalolagi aoao. (1 Timoteo 2:3, 4) E ala mai i lona malo faalelagi lea ua pule ai lona Alo o Iesu, ua toeitiiti ona aveesea lea e Ieova tagata matapeʻapeʻa o lenei lalolagi, lea o loo faapologaina le faitau miliona o tagata i le tapaa. O le a ia tafiesea aafiaga leaga uma o le ulaula tapaa, ae tuuina atu i tagata usiusitaʻi se soifuaga lelei atoatoa i le tino ma le mafaufau.​—Isaia 33:24; Faaaliga 19:11, 15.

Afai o loo e tauivi e tuu le tapaa, aua le fiugofie. E mafai ona e taulau manuia pe afai e te atiaʻe le alofa iā Ieova ma amanaʻia lana silafaga e tusa ai o le tapaa. E fiafia Molimau a Ieova e fesoasoani atu iā te oe ina ia aʻoaʻoina ma faatatau mataupu silisili o le Tusi Paia. E mautinoa e fesoasoani mai Ieova, e ala i le foaʻi mai o le mana ma le malosi e saʻoloto mai ai i le pulea e le tapaa.​—Filipi 4:13.