MATAUPU AUTŪ | E MAFAI ONA E MĀFANA ATU I LE ATUA
Pe E te Iloa le Suafa o le Atua ma Faaaogā?
Pe e iai sau uō e te māfana i ai ae e te lē iloa lona igoa? E mautinoa e leai. Na faapea mai Irina o se fafine Bulgaria: “E lē mafai ona e mafuta vavalalata atu i le Atua pe afai e te lē iloa lona suafa.” O le mea e lelei ai, e pei ona taʻua i le mataupu ua mavae, e finagalo le Atua e tatou te mafuta vavalalata atu iā te ia. O lea, e ala mai i le Tusi Paia, ua ia faailoa mai ai ia lava iā i tatou: “O aʻu o Ieova. O loʻu igoa lea.”—Isaia 42:8.
E ala mai i le Tusi Paia, ua faailoa mai ai e le Atua ia lava iā i tatou: “O aʻu o Ieova. O loʻu igoa lea.”—Isaia 42:8
Pe e tāua iā Ieova lou iloa ma faaaogā o lona suafa pe e leai? Seʻi mātau le mea lenei: E toetoe 7,000 taimi o loo taʻua ai le suafa o le Atua i le uluaʻi Tusitusiga Paia Eperu. O loo tusia i konesane faa-Eperu e fā e taʻua o le Tetakalamatone. E leai se isi igoa e tele faapea taimi o loo taʻua ai i le Tusi Paia. O le faamaoniga lenā e iloa ai, e finagalo Ieova e tatou te iloa ma faaaogā lona suafa. *
E amata se faauōga a ni tagata se toʻalua i le iloa e le tasi o le igoa o le isi. Pe e te iloa le suafa o le Atua?
Peitaʻi e ono manatu nisi, o se lē faaaloalo le faaaogā o le suafa o le Atua ona e paia ma silisili ese o ia. E moni e lē tatau ona tatou faaaogā sesē le suafa o le Atua, e pei lava ona tatou lē faaaogā sesē le igoa o sa tatou uō lelei. Peitaʻi, e finagalo Ieova i ē e alolofa iā te ia, e faamamalu ma faalauiloa atu lona suafa. (Salamo 69:30, 31; 96:2, 8) Sa aʻoaʻo foʻi e Iesu ona soo ia tatalo: “Lo matou Tamā e o i le lagi, ia faapaiaina lou suafa.” E mafai ona tatou faapaiaina le suafa o le Atua e ala i le faalauiloa atu. O le faia faapea, o le a atili ai ona tatou mafuta vavalalata atu iā te ia.—Mataio 6:9.
O loo taʻua i le Tusi Paia e manatu mamafa mai le Atua i “ē e manatunatu i lona suafa.” (Malaki 3:16) Ua folafola mai e Ieova iā i latou na: “Ou te puipuia foʻi o ia ona ua ia iloa loʻu igoa. E valaau mai o ia iā te aʻu, ona ou tali atu lea iā te ia. Ou te faatasi ma ia i le taimi o puapuaga.” (Salamo 91:14, 15) O lea, e tāua tele ona tatou iloa ma faaaogā le suafa o le Atua, pe afai e tatou te fia maua se faiā māfana ma ia.
^ pala. 4 E faanoanoa ona e tele isi faaliliuga o le Tusi Paia e lē o iai le suafa o le Atua, e ui lava e anoanoaʻi taimi o loo taʻua ai i Tusitusiga Eperu, po o le Feagaiga Tuai. Nai lo lea, ua latou suia le suafa o le Atua i taʻu e pei o le “Alii” ma le “Atua.” Mo nisi faamatalaga atili e faatatau i lenei mataupu, tagaʻi i le itulau e 195-197 o le tusi O ā Aʻoaʻoga Moni a le Tusi Paia? lomia e Molimau a Ieova.
E te Ono Fiafia Foʻi
LE OLOMATAMATA
Po o Lua Talanoa ma le Atua?
E tatou te tatalo i le Atua ae faapefea ona tatou faalogo atu iā te ia?
