Sa ou fanau i Baku i Azerbaijan, ma o aʻu o le uii o le fanau e toʻalua. O loʻu tamā o se Musalimi, ae o loʻu tinā e lotu Iutaia. Sa māfana le alofa i le va o oʻu mātua ma talia le eseesega o o la talitonuga. Sa lagolago e loʻu tinā loʻu tamā pe a anapogi i le masina faa-Musalimi o Ramadan, ma sa lagolago e loʻu tamā loʻu tinā pe a faamanatu le Paseka. Sa iai a matou kopi o le tusi paia a tagata Musalimi (Koran), le Tulafono faa-Iutaia (Torah), ma le Tusi Paia.

Sa ou manatu iā te aʻu o se Musalimi. E ui lava e lē taitai ona ou fesiligia le iai moni o le Atua, ae e iai mataupu sa faigatā ona ou malamalama i ai. Sa ou taumānatu: ʻAiseā na faia ai e le Atua tagata, ma o le ā le aogā o le mafatia o se tasi i lona olaga atoa, ae e uma ane e susunu e faavavau i le afi i seoli?’ Talu ai na faapea mai tagata e tutupu mea uma ona o le finagalo o le Atua, o lea na ou taumānatu ai: ʻPe e faapogaia e le Atua faafitauli o tagata ona silasila mai lea ma le fiafia a o mafatia tagata?’

I le 12 o oʻu tausaga, na amata ai ona ou faia le tatalo a tagata Musalimi e taʻua o le namaz, e faalima ona fai i le aso. I lenā taimi, sa ave e lo ma tamā i maʻua ma loʻu uso i se aʻoga a le lotu Iutaia. O nisi o mataupu na ma aʻoaʻoina i le aʻoga, o Tulafono faa-Iutaia ma le gagana Eperu. A o leʻi amata le aʻoga i aso taʻitasi, e tatau ona matou tatalo e tusa ai ma le tū faa-Iutaia. O lea, ou te tatalo i le taeao i le fale i le namaz, ae mulimuli ane ou te faia tatalo a le lotu Iutaia i le aʻoga.

Sa ou matuā fia maua ni tali saʻo o aʻu fesili. E tele taimi na ou fesili ai i faifeʻau i le aʻoga: “Aiseā na faia ai e le Atua tagata? O le ā le silafaga a le Atua i loʻu tamā o se Musalimi? O ia o se tagata lelei, ae aiseā e manatu ai iā te ia o sē e lē mamā? Aiseā na faia ai e le Atua o ia?” E na o ni nai tali na ou maua, ae e lē faavaea ma e lē saʻo.

Sa mou atu loʻu faatuatua i le Atua i le 2002. O lea faatoʻā matou siitia mai i Siamani, ae i le vaiaso na sosoo ai, na mafatia ai loʻu tamā ina ua pē le isi  itu o lona tino ma lē iloa ai se mea. Sa ou tatalo i le tele o tausaga ia malolosi ma manuia lo matou aiga. Sa ou talitonu e na o Lē e ona le malosi uma lava e iai le mana e foaʻiina mai le ola ma toe aveesea. O lea na ou tatalo ai i aso uma ina ia toe malosi loʻu tamā. Sa ou manatu, ʻE lē faigatā i le Atua ona faataunuu le manaʻo o se teineitiiti laʻitiiti.’ Sa ou mautinoa o le a tali mai le Atua i aʻu ōlega, peitaʻi na oti lava si oʻu tamā.

Sa matuā faateʻia aʻu ona e foliga mai e lē o ano mai le Atua, ma na ou matuā mafatia. Sa ou manatu: ʻMasalo e sesē le auala o loo oʻu tatalo ai. A lē o lenā, ailoga e iai se Atua.’ Sa ou lē mautonu ma na ou lē toe faia le tatalo o le namaz. Ou te leʻi ioe i isi lotu, o lea na ou manatu ai e leai se Atua.

I le ono masina mulimuli ane ai, na asiasi mai ai Molimau a Ieova i lo matou fale. Talu ai sa matou vaai maulalo i le faa-Kerisiano, o lea na ma mananaʻo ai ma loʻu uso e taʻu atu ma le faaaloalo i Molimau a Ieova, e lē saʻo la latou tapuaʻiga. Na ma fesili i ai: “E faapefea i Kerisiano ona tapuaʻi iā Iesu, le koluse, Maria ma isi faatusa, ae e faasā i Tulafono e Sefulu?” Sa faailoa mai e Molimau a Ieova mai i le Tusi Paia, faamaoniga moni e faapea e lē talafeagai i Kerisiano moni ona tapuaʻi i tupua, ma e tatau ona tatalo tuusaʻo atu tau lava o le Atua. Sa faateʻia aʻu i na manatu.

Sa ma toe fesili atu: “Ae faapefea le Tolutasi? Pe afai o Iesu o le Atua, na faapefea la ona ola i le lalolagi ma fasiotia e tagata?” Na la toe tali mai foʻi i le Tusi Paia ma faamatala mai, o Iesu e lē o le Atua ma e lē tutusa foʻi ma le Atua. Na la faapea mai o le pogai lea e lē talitonu ai Molimau a Ieova i le Tolutasi. Sa faateʻia aʻu ma manatu ifo, ʻE matuā ese lava la nei Kerisiano.’

Peitaʻi, sa ou fia iloa pea le māfuaaga e feoti ai tagata ma lē taofia ai e le Atua mafatiaga. Sa faaali mai e Molimau le tusi Le Poto e Taʻitaʻia ai i le Ola e Faavavau, * lea e iai mataupu o loo tali ai aʻu fesili. Sa amata ai loa i inā la matou talanoaga faale-Tusi Paia.

O taimi uma lava e fai ai la matou talanoaga, ou te maua ai tali saʻo mai i le Tusi Paia mo aʻu fesili. Na ou iloa ai o le suafa o le Atua o Ieova. (Salamo 83:18) O lona uiga autū o le alofa lē manatu faapito. (1 Ioane 4:8) Sa ia faia tagata ona na finagalo ia latou maua le meaalofa o le ola. Ua ou iloa foʻi e ui e lē o taofia e le Atua faiga lē tonu, peitaʻi e na te inosia ia faiga ma e lē o toe umi ona ia aveesea lea. Ua ou aʻoaʻoina ua iai aafiaga leaga i tagata ona o le fouvalega a Atamu ma Eva. (Roma 5:12) O se tasi o āuga faanoanoa o le maliliu lea o ē e pele iā i tatou, e pei o si oʻu tamā. Peitaʻi, o le a aveesea e le Atua mafatiaga uma pe a oo mai le lalolagi fou, lea o le a toetutū mai ai ē ua maliliu.​—Galuega 24:15.

Ua mafai i upu moni o le Tusi Paia ona taliina ai aʻu fesili. Sa amata ona ou toe talitonu i le Atua. A o faasolo ina ou iloa lelei Molimau a Ieova, sa ou iloa ai o i latou o se ʻauuso i le lalolagi aoao. Sa ou maofa i lo latou autasi ma le alofa o le tasi i le isi. (Ioane 13:34, 35) O mea na ou aʻoaʻoina e faatatau iā Ieova, na uunaʻia ai aʻu e auauna iā te ia. O lea na ou filifili ai loa e avea ma Molimau a Ieova, ma na ou papatiso i le 2005 iā Ianuari 8.

Na suia atoa loʻu manatu e faatatau i le olaga, ona o le moni ma le talafeagai o aʻoaʻoga a le Tusi Paia. Ua toʻafilemu loʻu mafaufau ona o faamatalaga maufaatuatuaina ua ou maua mai i le Afioga a le Atua. Ua ou matuā olioli ma faamāfanafanaina i le faamoemoe o le toe vaai atu i si oʻu tamā, e ala i le toetū ua folafola mai i le Tusi Paia.​—Ioane 5:28, 29.

Ua ono nei tausaga o fiafia la ma faaipoipoga ma laʻu tane o Jonathan, o lē e tapuaʻi foʻi iā Ieova. Ua ma aʻoaʻoina e saʻo ma faigofie le upu moni e faatatau i le Atua, ma o se ʻoa e tautele. O le pogai lea e ma te fiafia ai e faasoa atu i isi o ma talitonuga ma le faamoemoe. Ua ou iloa nei o Molimau a Ieova e lē o ni tagata “ese,” ae o i latou o Kerisiano moni.