Pe afai e iai faiga piʻopiʻo i le sosaiete o tagata, e iai foʻi la faiga piʻopiʻo i so o se malo lava o loo avea ma vaega o lenā sosaiete. O lea, ina ia iai se malo e lē iai ni faiga piʻopiʻo, e lē tatau ona avea lenā malo ma vaega o le sosaiete o tagata. Ua taʻua i le Tusi Paia lenā malo, o le Malo o le Atua, lea na aʻoaʻo e Iesu ona soo e tatalo ia oo mai.​—Mataio 6:9, 10.

O le Malo o le Atua o se malo moni lava e pule mai i le lagi, ma o le a suitulaga i malo faaletagata uma lava. (Salamo 2:8, 9; Faaaliga 16:14; 19:19-21) O se tasi o faamanuiaga o le a aumaia e le Malo o le Atua mo tagata, o le aveesea lea o faiga piʻopiʻo i malo. Seʻi iloilo vala e ono o le Malo o le Atua e faamaonia ai lenei manatu.

LE FAAFITAULI: O malo faaletagata e tele lava ina faatupe e o latou tagatānuu e ala mai i tiute ma lafoga. O le solo lelei mai o nei tupe, ua faaosoosoina ai nisi tagata maualuluga o le malo e gāoi, pe talia ni faiga faaalatua mai i ē e mananaʻo e faaitiitia a latou lafoga ma isi tupe e totogi i le malo. O le iʻuga, atonu e siitia e le malo le lafoga ina ia faapaleni ai na tupe ua gau, ma atili ai ona faatupulaʻia faiga piʻopiʻo. O na faiga, o le a sili atu ai ona mafatia tagata o loo faamaoni pea.

LE VAIFOFŌ: O le pule o le Malo o le Atua, e mai iā Ieova * le Atua e ona le malosi uma lava. (Faaaliga  11:15) E lē manaʻomia ona ao ni lafoga ina ia faagaoioia ai. Nai lo o lea, ona o le ʻmatuā tele o le mana’ o le Atua ma lana foaʻi lē manatu faapito, ua mautinoa ai o le a saunia mai e lona Malo, le anoanoaʻi o mea e tausia ai manaʻoga o ona tagatānuu uma.​—Isaia 40:26; Salamo 145:16.

LE FAAFITAULI: Na taʻua e Susan Rose-Ackerman lea na taʻua i le mataupu ua teʻa, ina ia aveesea faiga piʻopiʻo, ʻe tatau ona amata mai i tagata maualuluga o le malo.’ Ua lē maufaatuatuaina e tagata faigāmalo ona e taumafai e liaʻi ese faiga piʻopiʻo o loo faia e leoleo po o ofisa o tiute, a o le taimi e tasi e lē o amanaʻia faiga piʻopiʻo o loo faia e tagata maualuluga o le malo. E oo lava foʻi i se taʻitaʻi faaletagata e matuā lelei ona faanaunauga, e lē lelei atoatoa foʻi, auā ua taʻua i le Failauga 7:20: “E leai se tagata e amiotonu i le lalolagi e na te faia pea le mea lelei.”

LE VAIFOFŌ: Ua filifilia e le Atua Iesu Keriso e avea ma Taʻitaʻi o le Malo. I le lē pei o tagata lē lelei atoatoa, e lē mafai ona faaosoosoina Iesu e faia se mea sesē. Sa ia faamaonia lenei mea e ala i le teena o le faaosoosoga e sili ona faigatā, o le ofoina atu lea iai o “malo uma o le lalolagi ma o latou mamalu.” Sa folafola atu iā Iesu o le a ofo atu iā te ia nei mea uma, pe afai e ifo atu i le pule o le lalolagi, o le Tiapolo. (Mataio 4:8-10; Ioane 14:30) I le taimi foʻi na sauāina ai Iesu seʻia oo ina fasiotia, sa maumauaʻi o ia e tumau faamaoni e ala i le teena o se vailaau e ono faateʻa ai le tigā, pe e matuā lē lagona ai se mea. (Mataio 27:34) Ua toe faatūina nei o ia e le Atua e ola i le lagi, ma ua faamaonia e Iesu ua matuā agavaa ona avea o ia ma taʻitaʻi o le Malo o le Atua.​—Filipi 2:8-11.

LE FAAFITAULI: O le tele o atunuu e masani ona fai a latou palota, lea e mafai ai ona palota tagata e aveesea tagata maualuluga fai mea piʻopiʻo o le malo. Peitaʻi, o faatosinaga ma faigāpalota e iʻu atu ai i faiga piʻopiʻo, e tusa lava po o ni atunuu e faapea mai e tau atiaʻe. E ala i mea e foaʻi mo faatosinaga po o isi faiga, e mafai ai e tagata mauʻoa ona taaʻina ē o loo tulaʻi mai ma o le a tulaʻi mai i tofi o le malo.

Na tusi John Paul Stevens, o se faamasino o le Faamasinoga Maualuga i Amerika, o lenā taaʻiga e lē gata ua faaleagaina ai “le tulaga lelei ma faiga faaletulafono a Malo, ae ua lē toe maufaatuatuaina ai foʻi e tagata lautele.” E lētioa a manatu le toʻatele o tagata i le lalolagi atoa, o vaega faapolotiki o faalapotopotoga pito i sili ia ona piʻopiʻo.

LE VAIFOFŌ: E leai ni faatosinaga po o ni faigāpalota taufaasesē i le Malo o le Atua, auā e mausalī ma tumau lona pulega. (Tanielu 7:13, 14) Talu ai e filifilia e le Atua le Taʻitaʻi o lona Malo, o lea e lē faalagolago ai i ni palota a tagata, ma e lē mafai foʻi ona latou aveesea. O le tumau o lenei Malo, ua faamautinoa  mai ai o mea uma e faia e lenei Malo, e tumau ona aogā i ona tagatānuu.

LE FAAFITAULI: Atonu i le taimi muamua e te mafaufau e mafai ona faaleleia le faafitauli e ala i le faia o ni tulafono fou. Peitaʻi, ua iloa e tagata atamamai, o le faatuputupulaʻia o tulafono, e na ona atili faateteleina ai o faiga piʻopiʻo. O tulafono foʻi ua faia ma le faanaunauga ina ia faaitiitia ai faiga piʻopiʻo, e masani lava ona tele le taimi ma taumafaiga e alu ai ina ia faamautinoa o loo tausia, ae e itiiti ni iʻuga lelei e maua mai ai.

LE VAIFOFŌ: E sili mamao atu tulafono o le Malo o le Atua nai lo o tulafono o malo faaletagata. O se faaaʻoaʻoga, nai lo o le faia o se lisi umī o tulafono, na taʻua e Iesu le tulafono lea e masani ona taʻua o le Tulafono Faaauro. Na fetalai o ia: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mataio 7:12) Atonu o le mea e sili ona tāua, e taulaʻi atu tulafono a le Malo o le Atua i uunaʻiga ma gaoioiga. Na fetalai Iesu i le Mataio 22:39: “Ia e alofa atu i lou tuaoi e pei o oe lava iā te oe.” Ioe, o le Atua o lē e silasila i loto o tagata, e na te faamautinoa ua faataunuu na tulafono.​—1 Samuelu 16:7.

LE FAAFITAULI: O le uunaʻiga sili e faia ai e tagata faiga piʻopiʻo, ona o le matapeʻapeʻa ma le manatu faapito. E masani ona faaalia e tagata maualuluga o malo ma tagatānuu nei uiga lē lelei. I le faleoloa telē i Seoul lea na taʻua i le mataupu ua teʻa na malepe i lalo, sa talia e tagata maualuluga o le malo faiga faaalatua mai i le ʻau konekarate. Sa iloa e le ʻau konekarate, e itiiti tupe e totogi pe a faia faiga faaalatua, nai lo o le faaaogā o meafaufale lelei ma auala saʻo e tatau ona fau ai fale.

O lea, ina ia aveesea faiga piʻopiʻo, e tatau ona aʻoaʻoina tagata ia liaʻi ese ni faanaunauga ua mauaa, e pei o le matapeʻapeʻa ma le manatu faapito. Peitaʻi, e lē o naunau ma e lē mafai e malo faaletagata ona faia lenei ituaiga o polokalame tauaʻoaʻoga.

LE VAIFOFŌ: Ina ia foʻia e le Malo o le Atua māfuaaga autū o faiga piʻopiʻo, o lea ua aʻoaʻoina ai tagata i auala  e liaʻi ese ai faanaunauga sesē ia e māfua ai na faiga. * O lenei auala ua fesoasoani i tagata ina ia ʻfaafouina le malosi e pulea ai o latou mafaufau.’ (Efeso 4:23) Ua latou aveesea faanaunauga matapeʻapeʻa ma manatu faapito, ae suia i le lotomalie ma le naunau i mea e lelei ai isi.​—Filipi 2:4; 1 Timoteo 6:6.

LE FAAFITAULI: E oo lava i se siʻomaga e sili ona lelei ma aʻoaʻoina lelei tagata i tulaga tau amio, o le a filifili lava nisi e lē faamaoni ma fai mea piʻopiʻo. Ua taʻutino mai e tagata atamamai, o le pogai lea e lē mafai ai e malo faaletagata ona aveesea faiga piʻopiʻo. O loo faamoemoe malo ia mafai ona latou faaitiitia faiga piʻopiʻo ma ona aafiaga leaga.

LE VAIFOFŌ: I le Fono a Malo Aufaatasi Faasaga i Faiga Piʻopiʻo, ua taʻua ai e faapea, ina ia foʻia faiga piʻopiʻo, e tatau i malo ona faamalosia le ʻfaamaoni ma le faatino o tiute tauave.’ E ui o se sini e lelei tele lenei, ae i le Malo o le Atua, e lē gata e faamalosia ai nei uiga, ae e manaʻomia foʻi ona iai i ona tagatānuu. Ua taʻua i le Tusi Paia “o ē e matapeʻapeʻa” ma “tala pepelo,” e lē fai ma o latou tofi le Malo o le Atua.​—1 Korinito 6:9-11; Faaaliga 21:8.

E mafai ona aʻoaʻoina tagata ina ia mulimuli i nei tapulaa maualuluga tau amio, e pei ona faamaonia e uluaʻi Kerisiano. O se faataʻitaʻiga, ina ua taumafai se soo e igoa iā Simona e ofo atu ni tupe ina ia maua ai le agaga paia mai i aposetolo, sa latou teena lenā faiga faaalatua ma faapea atu iā te ia: “Inā salamō ia i lou leaga.” Ina ua iloa e Simona le leaga o lona faanaunauga sesē, sa talosaga atu i aposetolo ia tatalo mo ia, ina ia manumalo i lenā faanaunauga.​—Galuega 8:18-24.

E tusa lava po o le ā lou atunuu, ae e mafai ona avea oe ma tagatānuu o le Malo o le Atua. (Galuega 10:34, 35) O le a e iloa le auala e mafai ai, e ala i le polokalame tauaʻoaʻoga ua saunia e le Malo o le Atua, lea o loo faia i le lalolagi aoao. E fiafia Molimau a Ieova e faataʻitaʻi atu iā te oe le auala e fai ai se talanoaga faale-Tusi Paia e aunoa ma se totogi, lea a itiiti mai e sefulu minute e fai ai i le vaiaso. O le a mafai foʻi ona e aʻoaʻoina isi mea e faatatau i le “tala lelei o le malo o le Atua,” e aofia ai le auala o le a aveesea ai e lea malo faiga piʻopiʻo i malo. (Luka 4:43) E matou te valaaulia oe e faafesootaʻi Molimau a Ieova i lou vaipanoa, pe tagaʻi i la matou upega tafaʻilagi o le jw.org/sm.