I nisi taimi, e faasino atu le upu eunuka i se tane ua aveesea ona fuāmanava. I vaitaimi o le Tusi Paia, na aveesea fuāmanava o nisi tane ona o se faasalaga, ua puʻea faamalosi, pe avea ma pologa. O tane e faamaoni a ua aveesea o latou fuāmanava, sa latou vaavaaia fale e nonofo ai fafine i le lotoā o le fale o le tupu. O se faaaʻoaʻoga, na auauna eunuka o Hege ma Sasekesa, i le vaavaaia o avā ma ʻautaunonofo a le tupu o Peresia, o Asueru, o lē ua manatu i ai o Kesese I.​—Eseta 2:3, 14.

Peitaʻi, e lē o i latou uma ua taʻua i le Tusi Paia o eunuka, na aveesea o latou fuāmanava. Ua faapea mai nisi o le ʻaufaitofā, e faasino atu foʻi le upu i se tasi ua tofia e auauna i le maota o le tupu. E foliga mai o le uiga lenā o le upu ina ua faasino atu i le uō a Ieremia, o Epetemeleka, ma le tagata Aitiope lea na talaʻi i ai le faievagelia o Filipo. E manino mai o Epetemeleka o sē e maualuga lona tulaga i le maota o le tupu, ona sa mafai ona ia talanoa tuusaʻo atu i le tupu o Setekaia. (Ieremia 38:7, 8) A o le tagata Aitiope o lē ʻsa alu atu i Ierusalema e tapuaʻi,’ ua taʻua o ia o lē na vaaia oloa uma a le tupu tamaʻitaʻi.​—Galuega 8:27.

Ina ua faamatala e Iesu le faamasinoga i le lumana‘i, na ia faapea mai: “Pe a taunuu le Atalii o le tagata i lona mamalu, . . . ona tuueseeseina lea e ia o tagata, e pei ona tuueseeseina e se leoleo mamoe o mamoe ma ‘oti.” (Mataio 25:31, 32) Aiseā e tuueseese ai e leoleo mamoe nei manu?

E masani ona tataa ma aai faatasi mamoe ma ‘oti i le ao. Ae a oo i le pō, e ave i totonu o fale o manu ina ia puipuia ai mai i manufe‘ai, tagata gāoi, ma le mālūlū. (Kenese 30:32, 33; 31:38-40) E eseese fale e tuu ai nei manu, ona e mana‘omia ona puipuia mamoe filemu, aemaise mamoe fafine ma tama‘i mamoe, mai i ‘oti ulavavale. Ua faapea mai le tusi All Things in the Bible, e tuueseese fo‘i mamoe mai i ‘oti pe a oo i le vaitau e “fananau ai, tatau ai susu, ma sele fulufulu.” O le talafaatusa a Iesu, na faaua‘i atu ai lana ‘aufaalogologo i mea na masani ona faia ma vāai i ai tagata Isaraelu anamua, auā sa tele mamoe ma leoleo mamoe i na taimi.