Elika: E te iloa, ou te lē fiafia tele i lotu. Ailoga la e iai se mataupu e ta te ono talanoa ai.

Pati: Faafetai lava mo le faailoa mai o lou manatu. Ae o loʻu igoa o Pati, o ai foʻi lou suafa?

Elika: O Elika.

Pati: Mālō le soifua.

Elika: Mālō foʻi.

Pati: Seʻi oʻu fesili atu lava faamolemole, na e ola aʻe i se aiga e lolotu?

Elika: Ioe. Ae ina ua tuua loʻu aiga ma ou alu i aʻoga maualuluga, ou te leʻi toe alu i se lotu.

Pati: Oi e ā? O ā au mataupu o loo ave i le aʻoga?

Elika: O le talafaasolopito ma le mataupu tau i le vafealoaʻi. Ae ou te fiafia lava la i le talafaasolopito, le talaaga o olaga o tagata.

Pati: E ese le manaia o le mataupu lenā. Ae pe sa aofia ai le Tusi Paia i au saʻiliʻiliga, auā o se tasi na o tusi o loo faamauina ai talafaasolopito?

Elika: Leai. Ou te iloa e tāua le Tusi Paia, ae ou te leʻi mafaufau o loo iai ni talafaasolopito.

Pati: E foliga mai e te naunau e aʻoaʻoina nisi mea. Pe a talafeagai ma oe, ou te fia faailoa atu ni faaaʻoaʻoga o ni talafaasolopito e saʻo aʻiaʻi o loo i le Tusi Paia.

Elika: E lē afāina, ae o si ona pona e leai saʻu Tusi Paia.

Pati: Aua e te popole, a lea e iai laʻu Tusi Paia. O le faaaʻoaʻoga muamua, o loo i le 1 Nofoaiga a Tupu 29:26, 27. Fai mai le mau: “A o Tavita le atalii o Iese, na fai o ia ma tupu o Isaraelu uma; o aso foʻi na pule ai o ia i Isaraelu, e fā sefulu tausaga. Na pule o ia i Heperona i tausaga e fitu, ae e tolu sefulu tolu tausaga na ia pule ai i Ierusalema.”

Elika: Aiseā ua e fai mai ai o se faaaʻoaʻoga lea o se talafaasolopito e saʻo aʻiaʻi?

Pati: Auā e iai le taimi na faapea mai ai le ʻaufaitio e leʻi iai se tupu e igoa iā Tavita.

Elika: E ā ea, aiseā?

Pati: Talu ai sa itiiti ni faamaoniga e ese mai i le Tusi Paia, e iloa ai sa soifua moni lava Tavita. Peitaʻi, i le 1993, na maua ai e se vaega o tagata e suʻesuʻeina toega o mea i le eleele, se maa sa iai i aso anamua, o loo iai se faaupuga e faasino uma atu i le “Aiga o Tavita” ma le “Tupu o Isaraelu.”

Elika: Manaia la si na manatu.

Pati: O se isi tagata o loo taʻua i le Tusi Paia ae na fesiligia pe na soifua moni lava, o Ponotio Pilato, o se kovana i aso o Iesu. O loo taʻua lona igoa i inei i le Luka 3:1, faatasi ma le toʻatele o isi tagata maualuluga o le malo i lenā vaitaimi.

Elika: Ae saʻo. O lea e faapea mai “ina o avea Ponotio Pilato ma kovana i Iutaia, ma ua pule foʻi Herota i le itumalo o Kalilaia.”

Pati: Ioe. E tele tausaga e lē o mautonu tagata  atamamai pe faamata na soifua moni lava Ponotio Pilato. Ae i le pe ā ma le 50 tausaga ua mavae, na maua ai se maa i Sasaʻe Tutotonu, o loo manino lelei ai le vaneina o le igoa o Ponotio Pilato.

Elika: Ou te leʻi faalogo muamua lava i na faamatalaga.

Pati: Ae ua ou fiafia e faailoa atu iā te oe.

Elika: E te iloa, ou te faatāua le Tusi Paia ona o se tusi e manaia i le faitau. Atonu foʻi o loo iai talafaasolopito e saʻo aʻiaʻi, ae ailoga e aogā mo i tatou i aso nei.

Pati: O le toʻatele o tagata e ioe i lenā faamatalaga. Peitaʻi, e lē o loʻu manatu lenā. O le māfuaaga, ona e lē o suia o tatou manaʻoga autū faaletagata mai lava i le amataga. O se faaaʻoaʻoga, e tatou te manaʻomia i taimi uma meaʻai, lavalava ma fale. E tatou te mananaʻo i taimi uma e talanoa ma isi ma ia fiafia o tatou aiga. Pe e lē moni e tāua iā i tatou uma nei mea?

Elika: Ioe, e saʻo.

Pati: E mafai ona fesoasoani mai le Tusi Paia iā i tatou i nei vala uma. E ui o se tusi ua leva, ae o loo aogā pea i aso nei.

Elika: O le ā le uiga o lau tala?

Pati: I se isi faaupuga, o loo iai i le Tusi Paia mataupu silisili autū e aogā i aso nei, e pei lava foʻi ona aogā ina ua tusia i senituri ua mavae.

Elika: I ā itu e aogā ai?

Pati: E aogā taʻiala a le Tusi Paia iā i tatou i mataupu e pei o le mauaina o se vaaiga paleni i tupe, se aiga fiafia, po o le avea ma uō lelei. Ua faasino mai foʻi i le Tusi Paia iā i tatou le auala e taulau manuia ai. O se faaaʻoaʻoga, pe e te lē ioe o se luʻi i aso nei le taumafai e avea ma ulu o se aiga po o se tane e taulau manuia?

Elika: Ioe, e saʻo. Ua toeitiiti atoa le tausaga talu ona ma faaipoipo ma loʻu toʻalua, ae e lē o taimi uma e tutusa ai o ma manatu i se mea.

Pati: Saʻo lelei. Peitaʻi, o loo iai i le Tusi Paia ni taʻiala faigofie e mafai ona fesoasoani iā i tatou. O se faaaʻoaʻoga, o le Efeso 5:22, 23, 28. E te fia faitau mai le ta mau lenā faamolemole?

Elika: OK. Fai mai: “O avā, ia gauaʻi atu i a latou lava tane e pei ona gauaʻi atu i le Alii, auā o le tane o le ulu lea o le avā, e pei foʻi o Keriso o le ulu ia o le faapotopotoga, o ia foʻi o le faaola o lenei tino.” Fuaiupu e 28: “O le mea lea, e tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava.”

Pati: Faafetai mo le faitauina o le mau. O le ā sou manatu, pe e te ioe afai e faatatau e paaga uma e toʻalua nei taʻiala faigofie, o le a faaleleia lo la aiga?

Elika: Ioe, e saʻo. Ae e faigofie lava ona fai lenā tala, ae e faigatā ona faatino.

Pati: E moni, auā e leai se isi e lelei atoatoa. Ae o loo fautuaina foʻi i tatou i le Tusi Paia ia faaalia le magafagafa. * O so o se mafutaga lava, e manaʻomia i paaga uma ona paleni ma lotomalilie e gauaʻi atu. Ua ma iloa ma laʻu avā e mafai ona fesoasoani le Tusi Paia iā i maʻua ina ia maua le paleni.

Elika: Manaia la.

Pati: E iai le Upega tafaʻilagi a Molimau a Ieova, ma o loo iai ni faamatalaga e aogā mo faaipoipoga ma aiga. Pe a fetaui ma oe, e mafai ona ou faaali atu se faataʻitaʻiga.

Elika: OK.

Pati: O le tuatusi o le www.pr418.com/sm. Ia, o le itulau autū lea.

Elika: Manaia ata.

Pati: O vaaiga na i le matou galuega talaʻi o loo faia i le lalolagi aoao. Ia, lea. I le vaega lea ua taʻua “Lomiga,” o loo iai i lalo le vaega o “Mekasini.” E masani ona lomia i le Ala Mai! mataupu e aogā mo ulugalii. O se faataʻitaʻiga, seʻi tagaʻi i le Ala Mai! lea o Oketopa-Tesema 2014. I le lisi o mataupu, e  iai le mataupu lea, “Fesoasoani mo Aiga, le Auala e Foʻia ai le Ita Faamoemoe.”

Elika: Manaia foʻi si na mataupu.

Pati: E fā mea o loo faamatilatila mai i lenei mataupu, e mafai ona e faia ina ia foʻia ai le faafitauli. Tagaʻi foʻi i le palakalafa lea. E mafai ona e faitauina mai faamolemole?

Elika: OK. “O le ita faamoemoe e faaleagaina ai se faaipoipoga. Aiseā? Talu ai e aveesea ai uiga lelei e faavae aʻe ai se faaipoipoga fiafia, e pei o le alofa, maufaatuatuaina, ma le faamaoni.” Ae saʻo lelei lenei manatu.

Pati: Mālō mo le faitau. O loo sii mai i le palakalafa le Efeso 4:31. E mafai ona e faitauina mai faamolemole?

Elika: Fai mai: “Ia tuu lo outou ita umi, ma le itaitagofie, ma le lotoa, ma le soona ʻeʻē, ma upu masoā, atoa foʻi ma mea leaga uma.”

Pati: Mātau le mau, o ā uiga ua fautuaina i tatou ia tuu?

Elika: E aofia ai uiga ia e pei o le ita umi ma le itaitagofie.

Pati: E moni o i tatou uma lava e iai taimi e feita ai. Ae o le ā sou manatu, faamata e fiafia se faaipoipoga pe afai e ita umi ma ita faamoemoe se tasi o le paaga?

Elika: E mautinoa a e leai.

Pati: O lea la, pe afai e ʻalofia e se tane ma se avā le ita umi po o le ita faamoemoe, pe e lē moni o le a ʻalofia ai faafitauli ma faamalosia ai le fusi o le faaipoipoga?

Elika: Saʻo lelei.

Pati: Ua taʻu mai ai i lenei mau ni fautuaga aogā ma mea e ao ona fai e paaga uma e toʻalua i se faaipoipoga. E ui lava la sa tusia lenei mau i le toetoe 2,000 tausaga ua mavae, ae afai e faatatauina, o le a maua ai le tele o aogā.

Elika: Ou te mautinoa e tele nisi faamatalaga aogā o loo i le Tusi Paia nai lo o mea na ou mafaufau i ai.

Pati: Ioe, e saʻo oe. Ou te fiafia e ta te toe feiloaʻi i inei ona ta talanoa lea i le tamaʻi ulutala “Mea e Mafai Ona E Faia,” lea o loo iai i le mataupu lava lenei i la matou Upega tafaʻilagi. *

Elika: Manaia tele lenā tonu. Seʻi o ma faitau la ma suʻesuʻe i ai ma loʻu toʻalua.