I le avea o se tasi ma tagatānuu o Roma, sa iai aiā ma faamanuiaga na ia maua i so o se vaipanoa na iai i lenā emepaea, ma sa ola i lalo o le tulafono a Roma, ae lē o tulafono a aai o itumalo. Pe a molia o ia i se vaipanoa, e mafai ona malie e faia lona faamasinoga e tusa ai ma tulafono a lenā vaipanoa, ae e iai pea lana aiā e faamasino ai o ia i le faamasinoga a Roma. Pe afai e faasala o ia i le oti, e iai lana aiā e toe apili ai lana mataupu i le emeperoa.

E tusa ai ma na aiā, ua faapea mai Cicero, o se alii tāua o Roma i le uluaʻi senituri T.L.M.: “O se solitulafono le saisai o se tagatānuu o Roma; o se amiolētonu le sasa o ia; a o le fasiotia o ia, ua pei ua fasiotia e se tasi ona lava mātua po o sona tauaiga vavalalata.”

Na soo le emepaea o Roma i le talaʻiga a le aposetolo o Paulo. E tolu taimi na ia faaaogā tatau ai lana aiā o se tagatānuu o Roma: (1) Na ia faailoa atu i alii faamasino i Filipi, ua latou lē amanaʻia lana aiā tatau e ala i le sasaina o ia. (2) Na ia faailoa atu lona tulaga o se tagatānuu o Roma ina ia ʻalofia ai le sauāina o ia i Ierusalema. (3) Sa ia talosaga e tuu atu lona faamasinoga e faia e le emeperoa o Roma, o Kaisara.—Galuega 16:37-39; 22:25-28; 25:10-12.

E 20 tausaga o leoleo e Iakopo lafumanu a Lapana le tuagane o lona tinā. Sa galue Iakopo mo le uluaʻi 14 tausaga ina ia faaipoipo i afafine e toʻalua o Lapana, a o le isi 6 tausaga sa totogi o ia i manu. (Kenese 30:25-33) Ua faapea mai le mekasini Biblical Archaeology Review, “O tusitala ma le ʻaufaitau anamua i faamatalaga a le Tusi Paia, sa masani lelei i maliega e faatatau i le leoleoina o lafu, e pei o le maliega i le va o Lapana ma Iakopo.”

Ua faailoa mai na ituaiga maliega, i ni maliega tusitusia na maua i le eleele i Nuzi, Larsa, ma isi nofoaga i Iraq. E masani e tausaga le umi o se maliega, e amata mai i le taimi e sele ai fulufulu seʻia oo i le isi taimi e toe sele ai. Na talia e leoleo mamoe la latou matafaioi e vaavaaia se aofaʻiga patino o manu, e fua i le matutua o manu ma lo latou ituaiga. Pe a mavae le tausaga, o le a maua e lē e ana le lafu se aofaʻiga patino o tamaʻi mamoe, fulufulu mamoe, susu ma isi oloa e fai mai i le susu, ma isi mea faapena. Ae o ni faasiliga e iai, e ave mo le leoleo mamoe.

Sa faalagolago le faatelega o le lafu i le tele o mamoe fafine na tuu atu e vaavaaia e le leoleo. Afai e selau mamoe fafine, sa faatalitalia e 80 tamaʻi mamoe e maua mai ai. E faaatoa e le leoleo mamoe lenā aofaʻiga pe a lē atoa. O le pogai lea sa uunaʻia ai o ia e tausia faalelei le lafu.