O le matuā matitiva ua maliliu ai le faitau miliona o tagata i tausaga uma ona o faamaʻi ma le lē lava o meataumafa. E ui lava e iai vaega o le lalolagi o loo tamaoaiga, ae o loo iai pea le toʻatele o tagata o loo ola i ni olaga e matuā matitiva. Ua taʻua i le Tusi Paia, o le mativa o se faafitauli ua faaauau pea ona iai i tagata.—Faitau le Ioane 12:8.

Ina ia faaiʻuina le mativa, e manaʻomia se malo e mafai ona pulea le lalolagi atoa. O lenei malo o le a iai le pule e faasoasoaina atu alāmanuia o le lalolagi i se tulaga tutusa, ma faaiʻuina taua ia o loo avea ma māfuaaga autū o le mativa. Ua folafola mai e le Atua se ituaiga malo faapena.—Faitau le Tanielu 2:44.

Ua tofia e le Atua lona Alo o Iesu ina ia pulea tagata uma lava. (Salamo 2:4-8) O le a laveaʻia e Iesu tagata matitiva, ma faaiʻuina tulaga mafatia ma faiga sauā.—Faitau le Salamo 72:8, 12-14.

I le avea ai o Iesu ma “Perenise o le Filemu” lea na valoia mai, o le a ia aumaia le filemu ma le saogalemu i le lalolagi. O le iʻuga, o le a nonofo tagata uma o le lalolagi i o latou lava fale, olioli i galuega faamalieloto, ma maua le anoanoaʻi o meataumafa.—Faitau le Isaia 9:6, 7; 65:21-23.