O le ā sou manatu, pe e lagolagoina e le Atua taua? Pe afai o lea, o lē fea itu taua e na te lagolagoina? O le iloaina o tali o nei fesili e mafai ona aafia ai lau vaaiga e faatatau i taua. O se faaaʻoaʻoga, pe afai e te iloa e lagolagoina e le Atua taua ma le itu taua e te fiafia i ai, e lē taumatea la o le a e fiafia i le itu o loo e lagolagoina, ma e mautinoa o le a manumalo lau itu taua. I le isi itu, o ā ni ou faalogona pe afai e te iloa ane o loo lagolagoina e le Atua le itu taua o loo faasagatau mai? E mautinoa o le a e toe iloilo po o saʻo le itu o loo e lagolagoina.

A o le itu e sili ona tāua, o le iloaina o le silafaga a le Atua i taua e ono aafia ai lou manatu e faatatau i le Atua. Pe afai o oe o se tasi o le faitau miliona o tagata ua matuā mafatia i taua, e mautinoa la e te fia iloa le tali o le fesili, Po o le Atua o sē e faatupuina taua, e pei ona manatu i ai nisi, ma lē taofia mafatiaga ia e māfua ona o taua, pe atonu e lē o manatu mamafa mai i le lelei o ē o loo mafatia i taua?

Atonu e faateʻia oe i le iloaina e ese mamao le tali o loo i le Tusi Paia mai i nei manatu uma. E le gata i lea, mai i aso ua mavae seʻia oo mai i aso nei, o loo tumau pea le silafaga a le Atua i taua. Seʻi o tatou iloiloina po o le ā ua taʻua i le Tusi Paia e faatatau i le silafaga a le Atua i taua i aso anamua, ma le uluaʻi senituri ina ua afio mai Iesu i le lalolagi. O le a fesoasoani lea e tatou te iloa ai le silafaga a le Atua i taua i aso nei, ma pe faamata o le a avea taua ma se vaega o le olaga o tagata i le lumanaʻi.