Na vaaia e se teineitiiti le alu aʻe i le lagi o asu mai i alaasu o se falegaosimea ma pei ai o ni ao. Na ia manatu ai loa o le fuafuaga o falegaosimea, o le faia lea o ao. Atonu e mālie lenā manatu sesē itiiti. Peitaʻi, o se manatu e matuā sesē e mafai ona aafia ai o tatou ola. O se faaaʻoaʻoga, o le sesē ona faitau o faamatalaga o ni fualaau e oo ai i ni āuga ogaoga.

E sili atu ona tugā aafiaga o le lē malamalama e faatatau i mataupu faaleagaga. O se faaaʻoaʻoga, na faauigasesē e nisi tagata aʻoaʻoga a Iesu. (Ioane 6:48-68) Nai lo o le aʻoaʻoina atili o nisi mea, na latou teena mea uma na aʻoaʻoina e Iesu. Pagā le leaga o lenā mea!

Pe e te faitau i le Tusi Paia ina ia maua ai le taʻitaʻiga? E faamālō atu pe afai o loo e faia faapea. Ae pe e iai se lamatiaga o le sesē o lou malamalamaga i se mea na e faitau i ai? O le mea lenā o loo tupu i le toʻatele. Seʻi o tatou iloiloina nisi o manatu taatele e tolu e masani ona sesē ai le malamalamaga o tagata.

• E sesē le malamalamaga o nisi tagata e faatatau i le faatonuga a le Tusi Paia ina ia “mataʻu i le Atua moni.” E latou te manatu e tatau ona tatou matuā fefefe i le Atua. (Failauga 12:13) Peitaʻi, e lē finagalo le Atua e faapena faalogona o tagata e tapuaʻi atu iā te ia. Ua ia fetalai: “Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe.” (Isaia 41:10) O le mataʻu i le Atua, o lona uiga e tatau ona tatou āva ma faaaloalo loloto iā te ia.

• E faauigasesē e nisi tagata upu faagaeeina nei: “E iai le taimi e atofaina mo mea uma, . . . o le taimi e fanau mai ai ma le taimi e oti ai.” E latou te manatu ua filifilia e le Atua le taimi tonu e feoti ai tagata taʻitoʻatasi. (Failauga 3:1, 2) Peitaʻi, o loo faasino atu lenā mau i le faagasologa o le olaga o le tagata, ma ua faailoa mai ai o le oti o le iʻuga lea o tagata uma. Ua faailoa mai e le Afioga a le Atua, o a tatou filifiliga e mafai ona aafia ai le umi e tatou te ola ai. O se faaaʻoaʻoga o lenā manatu: “O le mataʻu iā Ieova e faaopoopoina ai aso.” (Faataoto 10:27; Salamo 90:10; Isaia 55:3) E faapefea ona tupu lenā mea? O se faaaʻoaʻoga, o lo tatou faaaloalo i le Afioga a le Atua, o le a uunaʻia ai i tatou e ʻalofia masaniga lē lelei e pei o le onā ma amioga lē mamā.—1 Korinito 6:9, 10.

• E faauigasesē e nisi tagata le manatu o le Tusi Paia ua ʻtuu mo le afi’ le lagi ma le lalolagi, ma ua latou manatu ai o le a faaumatia e le Atua lenei paneta. (2 Peteru 3:7) Peitaʻi ua folafola mai e le Atua, e lē mafai ona ia faaumatia le lalolagi paneta. Ua ʻfaavaeina e le Atua le lalolagi i luga o ona faavae malolosi; e lē maluelue e faavavau, faavavau lava.’ (Salamo 104:5; Isaia 45:18) E lē faaumatiaina lenei lalolagi paneta, ae o le a faaumatia le faiga o mea piʻopiʻo a le lalolagi, e tai pei ua susunuina i se afi. Peitaʻi o le lagi, e faasino atu i le vanimonimo po o le afioaga o le Atua. E lē faaumatiaina na mea.

E pei ona e mātauina mai i na faaaʻoaʻoga, e masani ona faauigasesē e tagata mea e latou te faitau ai i le Tusi Paia. Ae aiseā ua faataga ai e le Atua lenā mea e tupu? E ono manatu nisi: ʻPe afai e sili ona atamai le Atua ma e na te silafia mea uma, e mafai la ona ia saunia mai se tusi ua tusia manino ina ia faigofie ona malamalama i ai tagata uma. Ae aiseā ua ia lē faia ai faapea?’ Seʻi o tatou iloiloina ni māfuaaga se tolu e māfua ai ona sesē le malamalamaga o tagata i le Tusi Paia.

1. Ua fuafuaina le Tusi Paia ina ia malamalama ai i latou e lotomaulalo ma lotomalilie e aʻoaʻoina. Na faapea atu Iesu i lona Tamā: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e matuā natia nei mea mai i tagata popoto ma ē e atamamai, a ua faaalia i tamaiti.” (Luka 10:21) O le auala ua tusia ai  le Tusi Paia, e na o i latou e iai le vaaiga saʻo e mafai ona malamalama ai i le feʻau o loo iai. O le faamaualuga o se uiga lea e taatele i “tagata popoto ma ē e atamamai,” ma e masani ona sesē lo latou malamalamaga i le Tusi Paia. Ae o tagata e faaalia uiga o “tamaiti” o le lotomaulalo ma le naunau e aʻoaʻoina se mea, e tauia i latou i le mauaina o le malamalamaga saʻo e faatatau i le feʻau a le Atua. Maʻeu le atamai o le auala na tusia ai e le Atua le Tusi Paia!

2. E aogā le Tusi Paia i tagata e manaʻomia moni le fesoasoani a le Atua ina ia malamalama ai. Na faailoa mai e Iesu e manaʻomia e tagata le fesoasoani ina ia malamalama ai i ana aʻoaʻoga. E faapefea ona latou maua le fesoasoani? Na faamatala e Iesu: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma.” (Ioane 14:26) O lea, e foaʻi mai e le Atua le agaga paia po o lona malosi galue, e fesoasoani i tagata ina ia malamalama i mea o loo faitau ai i le Tusi Paia. Peitaʻi, e lē foaʻi mai e le Atua lona agaga i tagata e lē faalagolago iā te ia mo le fesoasoani. O lea, e foliga mai ai e faigatā ona latou malamalama i le Tusi Paia. O le agaga paia foʻi e uunaʻia ai Kerisiano ua lava lo latou poto, ina ia fesoasoani i ē o loo fia malamalama.—Galuega 8:26-35.

3. O nisi mau o le Tusi Paia e faatoʻā malamalama i ai tagata i se taimi talafeagai i le talafaasolopito. O se faaaʻoaʻoga, na faatonuina le perofeta o Tanielu e tusia se feʻau e faatatau i le lumanaʻi. Na faapea atu se agelu iā te ia: “Tanielu e, ia e punitia ia upu ma faamauina le tusi seʻia oo i le taimi o le iʻuga.” A o faagasolo senituri, sa faitau le toʻatele o tagata i le tusi o Tanielu, peitaʻi e latou te leʻi malamalama lelei i ai. O le mea moni, e oo lava iā Tanielu e leʻi malamalama i nisi o mea na ia tusia. Na ia taʻutino mai ma le lotomaulalo: “Na ou faalogo ae ou te leʻi malamalama.” Peitaʻi na faatoʻā malamalama lelei tagata i le valoaga na tusia e Tanielu, ina ua oo i le taimi tonu o le talafaasolopito na filifilia e le Atua. Na faamatala e le agelu: ʻTanielu e, inā alu ia auā ua punitia upu ma faamauina seʻia oo i le taimi o le iʻuga.’ O ai e mafai ona malamalama i le feʻau a le Atua? “E leai se tasi o ē e amioleaga e malamalama; ae e malamalama o ē ua iai le tofā mamao.” (Tanielu 12:4, 8-10) O lea, e lē faailoa mai e le Atua le uiga o nisi mau o le Tusi Paia, seʻiloga ua oo i le taimi talafeagai.

Pe e iai se taimi na sesē ai malamalamaga o Molimau a Ieova i le Tusi Paia ona e leʻi oo i le taimi talafeagai? O le mea moni lenā. Peitaʻi ina ua oo i le taimi a le Atua e faamanino atili ai ni mataupu, na nofosauni Molimau a Ieova e fetuunaʻi o latou malamalamaga. E latou te manatu o le faia faapea ua latou mulimuli ai i le faaaʻoaʻoga a aposetolo o Keriso, o le lotomaulalo lea e fetuunaʻi o latou mafaufau i taimi uma na faasaʻo ai e Iesu.—Galuega 1:6, 7.

O le manatu o le teineitiiti e faatatau i ao o le lagi, atonu e māfua mai i se manatu sesē laʻitiiti. Peitaʻi, o aʻoaʻoga a le Tusi Paia e matuā aogā iā te oe. E tāua le feʻau o loo i le Tusi Paia, ae e lē faigofie ona e malamalama ai i au lava faitauga Tusi Paia. O lea ia saʻili le fesoasoani ina ia malamalama ai i mea o loo e faitauina. Ia saʻili atu iā i latou o loo suʻesuʻeina le Tusi Paia ma le uiga lotomaulalo. Ia saʻili atu iā i latou o loo faalagolago i le agaga paia o le Atua ina ia malamalama ai i le Tusi Paia. Ia saʻili atu foʻi iā i latou ua mautinoa ua tatou ola i le taimi o le talafaasolopito, lea ua finagalo le Atua e tatou te malamalama ai i le Tusi Paia nai lo o se isi lava taimi. Aua e te faatalatū e talanoa atu i se Molimau a Ieova, pe faitau foʻi i a latou lomiga ua suʻesuʻeina ma le faaeteete lea e maua i le Upega tafaʻilagi o le jw.org. Ua folafola mai i le Tusi Paia “afai foʻi e te valaau atu mo le malamalama,” ona e maua ai lea o “le poto i le Atua.”—Faataoto 2:3-5.