Na ou ola aʻe i Puerto Limón, o se taulaga e tuta ai vaa i le itu i sasaʻe o le talafatai o Costa Rica. O aʻu e lona fitu i la matou fanauga e toʻavalu. E valu oʻu tausaga ae maliu loa loʻu tamā. Mulimuli ane, na tausia toʻatasi i matou e lo matou tinā.

Sa avea le taaloga pesipolo ma vaega o loʻu olaga. Na ou fiafia i le taaloga a o oʻu laʻitiiti. A o faasolo ina ou talavou, na ou auai i se tasi o ʻau pesipolo e taaalo i se tulaga e maualalo ifo i lo o le tulaga faapolofesa. I le 20 o oʻu tausaga, na filifilia ai aʻu ou te taalo i se ʻau pesipolo faapolofesa i Nicaragua. Peitaʻi, i lenā taimi e leʻi lelei le soifua mālōlōina o loʻu tinā ma sa ou tausia o ia, ou te leʻi manaʻo la ou te nofo i Nicaragua. O lea, ou te leʻi taliaina ai le ofo na tuuina mai. Mulimuli ane, na valaaulia aʻu ou te taalo mo le ʻau pesipolo faavaomalo i Costa Rica, lea na aofia ai isi tama taaalo e leʻi taaalo muamua i se tulaga faapolofesa. Sa ou talia loa le ofo. Mai i le 1949 i le 1952 na ou iai i le ʻau faavaomalo ma e tele taaloga sa ou taalo ai i Cuba, Mekisikō ma Nicaragua. Na ou taalo i le tulaga o le baseman, ma ona o le lelei o laʻu taalo, e 17 taaloga sosoʻo na ou taalo ai e aunoa ma loʻu faia o se mea sesē. Sa ou fiafia tele e faalogo atu o tauvalaau mai tagata matamata i loʻu igoa!

E faanoanoa, ona sa ou ola foʻi i se olaga lē mamā. E ui lava e na o le tasi laʻu uō teine sa iai, ae sa iai foʻi isi teine na masani ona ou faifai amio i ai. Sa ou inu tele foʻi. I se tasi aso, ona o loʻu onā tele, na ou lē manatua ai pe na faapefea ona ou oo i le fale ina ua ou ala aʻe i le taeao na sosoʻo ai! Sa ou taalo foʻi i taaloga faitupe e pei o le lotto ma le tominō.

A o oʻu ola ai i lenā olaga, na avea loʻu tinā ma Molimau a Ieova. Na ia taumafai e faaaofia aʻu i ona talitonuga, ae e leʻi taulau i lenā taimi ona sa alu uma loʻu taimi ma loʻu malosi i le taaloga pesipolo. Afai ae fai ni aʻu toleniga i taimi o taumafataga, e matuā lē lagona lava soʻu fiaʻai. Na alu uma loʻu mafaufau i le taaloga. Sa sili atu ona ou fiafia i le taaloga pesipolo nai lo o se isi lava mea!

Peitaʻi, ina ua 29 oʻu tausaga, na ou aafia ai i ni manuʻaga tugā a o oʻu taumafai e sapo le polo i se taaloga na  fai. Ina ua ou malosi, na ou faamavae loa mai i taaloga faapolofesa. E ui i lea, sa ou auai pea i le taaloga pesipolo e ala i le toleniina o isi tama taaalo a se ʻau e lata ane i loʻu fale.

I le 1957, na ou talia ai le valaaulia ina ia ou auai i se tauaofiaga a Molimau a Ieova sa faia i le malae taalo lea sa ou taalo ai i taaloga pesipolo. A o oʻu nofo faatasi ma le aofia, sa ou mātauina le eseesega o amioga faaaloalo a Molimau a Ieova mai i amioga paʻaʻā na ou vaaia i tagata matamata i taaloga pesipolo. O mea na ou vaai ai i le tauaofiaga, na uunaʻia ai aʻu e amata ona suʻesuʻe le Tusi Paia ma Molimau a Ieova, ma auai i a latou sauniga.

Na ou maofa i le tele o aʻoaʻoga a le Tusi Paia na ou aʻoaʻoina. O se faaaʻoaʻoga, na valoia e Iesu o aso e gata ai, e talaʻiina atu ai e ona soo le tala lelei o le Malo o le Atua i le lalolagi atoa. (Mataio 24:14) Na ou aʻoaʻoina ai foʻi o Kerisiano moni e lē faia la latou faiva ina ia maua ai se totogi. Na taʻua e Iesu: “Ia outou avatu fua, auā ua outou maua fua.”—Mataio 10:8.

A o oʻu suʻesuʻeina le Tusi Paia, na ou faatusatusa mea o loo taʻua ai ma mea na ou vaai i ai i Molimau a Ieova. Na ou maofa i lo latou galulue malosi e faaoo atu le tala lelei o le Malo o le Atua i le lalolagi atoa. Na ou mātauina iā i latou le iai o le agaga foaʻi lea na faatonuina e Iesu ia Kerisiano e faaalia. O lea ina ua ou faitau i le Mareko 10:21 ma iloa ai le valaaulia a Iesu ina ia “Mulimuli mai iā te aʻu,” na ou manaʻo ai loa e avea ma Molimau a Ieova.

Peitaʻi, na umi se taimi faatoʻā ou maumauaʻi e mulimuli i laʻu filifiliga. O se faaaʻoaʻoga, i le tele o tausaga na ou taalo ai i laʻu numera “laki” i vaiaso taʻitasi i le taaloga o le lotto a le atunuu. Peitaʻi, na ou aʻoaʻoina mai i le Tusi Paia e taʻusalaina e le Atua i latou e tapuaʻi i le “atua o le Laki,” faapea le tagata manaʻo tele. (Isaia 65:11; Kolose 3:5) O lea na ou filifili ai ou te lē toe taalo i taaloga faitupe. O le Aso Sa muamua lava talu ona ou lē toe taalo i le lotto, na mālō ai laʻu numera “laki!” Na ula mai tagata iā te aʻu ona ou te leʻi taalo i lenā vaiaso, ma na latou matuā uunaʻia aʻu e toe taalo, ae ou te leʻi faia faapea. Ou te leʻi toe taalo lava i ni taaloga faitupe.

Na ou fesagaʻia se isi luʻi i le avea ai o se “tagata fou” i le aso lava lea na ou papatiso ai i se tauaofiaga a Molimau a Ieova. (Efeso 4:24) Ina ua oo i le afiafi, na ou toe foʻi ai i le fale talimālō na ou nofo ai, ma iloa ai o loo faatali mai laʻu uō teine sa iai muamua i fafo o le faitotoʻa o loʻu potu. Na ia faatauanau aʻu “Se Sammy, ta ō ta eva!” Ae na ou vave tali atu i ai, “E leai!” Na ou faamanatu atu iā te ia o lea ua ou ola nei i tapulaa tau amio a le Tusi Paia. (1 Korinito 6:18) Na ia tali mai “E ā?” Ona ia taʻufaatauvaa lea o le manatu o le Tusi Paia e faatatau i faiga lē mamā taufeusuaʻiga, ma maumauaʻi e toe faaauau le ma faigāuō. Peitaʻi, na ou alu i loʻu potu ma loka mai le faitotoʻa. I le taimi lenei, ou te fiafia e faapea atu talu ona avea aʻu ma Molimau a Ieova i le 1958, o loo tumau pea ona ou faamaoni i suiga na ou faia i loʻu olaga.

E matuā tele aogā ua ou maua mai i le mulimuli i taʻiala mai i le Tusi Paia. O nisi o nei aogā o le mauaina lea o ni uō moni, iai se fuafuaga o le olaga, ma le fiafia moni.

O loo oʻu fiafia pea i le taaloga pesipolo, ae e lē o toe tutusa mea o loo oʻu faatāuaina. Na ou maua i le taaloga pesipolo le tulaga taʻutaʻua ma tupe, ae o na mea e leʻi tumau. Peitaʻi, e faavavau le ma faiā ma le Atua faapea le ʻauuso o loo oʻu aufaatasi atu i ai. O loo taʻua i le Tusi Paia: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” (1 Ioane 2:17) O lea, ua sili atu ona ou alofa iā Ieova le Atua ma ona tagata nai lo o se isi lava mea!