1 Ioane 3:1-24
3 Seʻi manatu i le silisili o le alofa+ o le Tamā ua faaalia mai iā i tatou, ina ia taʻua i tatou o fanau a le Atua;+ ma ua faapena lava i tatou. O le mea lea, e lē iloa ai i tatou e le lalolagi,+ auā latou te lē iloa o ia.+
2 Le ʻaupele e, o i tatou o le fanau a le Atua,+ ae e leʻi faailoa maia pe e faapeʻī i tatou.+ E tatou te iloa pe a faaali+ mai o ia, o le a pei i tatou o ia,+ auā o le a tatou vāaitino ai lava iā te ia.+
3 O lē e iai lenei faamoemoe lea e faavae iā te ia, e na te faamamāina+ o ia lava e pei ona mamā o ia.+
4 O i latou uma e faaauau ona agasala+ ua faaauau foʻi ona latou solitulafono,+ o lea la, o le agasala+ o le solitulafono lea.
5 Ua outou iloa foʻi e faapea, ua faaalia mai o ia ina ia aveesea ai a tatou agasala,+ ma e leai se agasala+ o iā te ia.
6 O se tasi e lē faaauau ona agasala,+ e tumau ona autasi+ ma ia; a o se tasi e faaauau ona agasala, e leʻi vaai o ia iā te ia ma e na te lē iloa foʻi o ia.+
7 Le fanau e, aua neʻi faasesēina outou e se tasi; o lē e faaauau ona amiotonu e amiotonu o ia, e pei foʻi ona amiotonu o ia.+
8 O lē e faaauau ona agasala e mai i le Tiapolo lava ia, auā na agasala le Tiapolo mai i le amataga.+ O le mea lea ua faaali+ mai ai le Alo o le Atua, ina ia faalēaogāina ai galuega a le Tiapolo.+
9 O lē ua fanau mai i le Atua e lē faaauau ona ia faia le agasala,+ auā ua tumau pea iā te ia Lona fua, ma e lē mafai ona agasala pea o ia, auā ua fanau mai o ia i le Atua.+
10 E iloa le fanau a le Atua ma le fanau a le Tiapolo i le mea moni lenei: O lē ua lē faaauau ona faia le amiotonu+ e lē mai i le Atua o ia, e faapena foʻi le tagata ua lē alofa i lona uso.+
11 Auā o le feʻau lenei na outou faalogo ai mai i le amataga,+ e tatau ona tatou alolofa o le tasi i le isi;+
12 e lē pei o Kaino o lē e mai i lē o loo leaga, lea na ia fasiotia+ lona uso. O le ā le māfuaaga na ia fasiotia ai o ia? Auā na leaga ana galuega,+ ae na tonu galuega a lona uso.+
13 Le ʻauuso e, aua tou te ofo i lenei mea, ina ua ʻinoʻino mai le lalolagi iā te outou.+
14 Ua tatou iloa na oti i tatou, a o lenei ua tatou ola+ auā ua tatou alolofa i o tatou uso.+ O lē e lē alofa i lona uso ua tumau o ia i le oti.+
15 O lē e ʻinoʻino+ i lona uso o le fasioti tagata+ o ia, ma ua outou iloa e leai se fasioti tagata+ e tumau iā te ia le ola e faavavau.+
16 O le mea lea ua tatou iloa ai le alofa,+ auā na foaʻi mai e Iesu lona ola mo i tatou;+ e tatau foʻi la ona foaʻi atu o tatou ola mo o tatou uso.+
17 A o sē ua tele ana meafaitino i lenei lalolagi+ ma ua vaai atu i lona uso ua lē tagolima o ia,+ a ua lē faaalia e ia le alofa faapelepele iā te ia,+ pe faapefea la ona tumau iā te ia le alofa o le Atua?+
18 Le fanau e, aua neʻi o tatou alolofa+ tau o le upu ma le gutu,+ ae e ala foʻi i gaoioiga+ ma le faamaoni.+
19 O le mea lenei tatou te iloa ai e mai i upu moni i tatou,+ ma ua tatou mautinoa i o tatou loto e alofa o ia iā i tatou
20 e tusa lava po o ā mea e faasala ai i tatou e o tatou loto,+ auā e sili atu le Atua i o tatou loto, e na te silafia foʻi mea uma lava.+
21 Le ʻaupele e, afai e lē faasala i tatou e o tatou loto, ua iā i tatou le saʻolotoga e tautatala atu ai i le Atua;+
22 tatou te maua mai foʻi iā te ia so o se mea tatou te ōle atu ai,+ auā o loo tatou tausi i ana poloaʻiga, ma faia mea e lelei i lana silafaga.+
23 E moni, o lana poloaʻiga lenei, ia tatou faatuatua i le suafa o lona Alo o Iesu Keriso,+ ma ia alofa le tasi i le isi+ e pei ona ia poloaʻi mai iā i tatou.
24 E lē gata i lea, o lē e tausi i ana poloaʻiga e autasi pea o ia ma ia, ma e autasi o ia ma lenā tagata;+ o le mea lea ua tatou iloa ai o loo autasi pea o ia ma i tatou,+ ona na ia foaʻi mai lona agaga+ iā i tatou.
