1 Korinito 12:1-31
12 O lenei le ʻauuso e, ou te manaʻo ina ia outou iloa e faatatau i meaalofa faaleagaga.+
2 Ua outou iloa a o avea outou ma tagata o nuu ese,+ na outou tosina atu e tapuaʻi i tupua+ e lē tautatala,+ e pei ona outou tosina atu i ai.
3 O lea la, ou te faailoa atu iā te outou, e leai se tasi e mafai ona faapea atu e ala i le agaga o le Atua: “Ua faamalaiaina Iesu!”+ ma e leai foʻi se tasi e mafai ona faapea atu: “O Iesu o le Alii!” seʻi vaganā ai e ala i le agaga paia.+
4 O lenei, e eseese meaalofa,+ a o le agaga lava e tasi;+
5 ma e eseese foʻi auaunaga,+ a o le Alii lava e tasi;+
6 e eseese foʻi galuega e fai,+ ae peitaʻi o le Atua lava e tasi,+ o lē o loo faatinoina galuega uma i tagata uma.+
7 Ae o le faaaliga o le agaga, ua foaʻiina atu i tagata taʻitoʻatasi mo se fuafuaga aogā.+
8 O se faaaʻoaʻoga, ua foaʻiina atu i le tasi le agaga e tautala ai ma le atamai,+ a o le isi o le tautala ma le poto+ e tusa ai ma lea lava agaga,
9 a ua foaʻiina atu i le tasi le faatuatua+ e lea lava agaga, a o le isi o le meaalofa e faamālōlō ai maʻi,+ e ala i le agaga lava lea e tasi,
10 ua foaʻiina atu foʻi i le tasi e faia galuega mamana,+ a o le isi e faia valoaga,+ o le isi ia iloa+ ai afioga+ mai i le Atua, a o le tasi e tautala ai i gagana eseese,+ ma le isi o le faamatalaina+ o gagana eseese.
11 A o nei galuega uma, e faia+ e lea lava agaga, e na te tufatufaina+ atu i tagata taʻitoʻatasi e pei ona loto i ai.+
12 E pei ona tasi le tino ae tele ona itutino, ma o itutino uma o lenā tino, e ui ina tele, ae tasi lava le tino,+ e faapena foʻi le Keriso.+
13 Auā e moni na papatisoina+ uma lava i tatou i le tino e tasi e le agaga e tasi, e tusa lava po o ni Iutaia po o ni Eleni, po o ni pologa po o ni ē e saʻoloto, ma na faainuina+ foʻi i tatou i le agaga e tasi.
14 Auā e lē tasi le itutino o le tino, ae e tele.+
15 Afai e faapea mai le vae: “Ona e lē o aʻu o le lima, e lē o aʻu la o se vaega o le tino,” e lē faapea ai la ua lē o se vaega moni o le tino.+
16 Afai foʻi e faapea mai le taliga: “Ona e lē o aʻu o se mata, e lē o aʻu la o se vaega o le tino,” e lē faapea ai la ua lē o se vaega moni o le tino.+
17 Afai o le tino atoa o le mata lea, e faapefea la ona faalogo? Afai o le tino atoa e faalogo ai, e faapefea la ona sogisogi?
18 A ua faatulaga e le Atua itutino taʻitasi uma o le tino, e pei ona ia finagalo i ai.+
19 Ana faapea e tutusa uma itutino o le tino,+ e faapefea la le tino?
20 E ui lava ina tele itutino,+ ae e tasi lava le tino.
21 E lē mafai e le mata ona faapea ane i le lima: “E leai sou aogā iā te aʻu”; ma e lē mafai foʻi ona faapea ane le ulu i vae: “E leai so oulua aogā iā te aʻu.”
22 Ae o le mea moni, e aogā foʻi i le tino itutino e foliga mai e vaivai,+
23 ma o o tatou itutino ua manatu i ai e faalētāua, ua tatou faatāuaina,+ ma ua matagofie ai o tatou itutino faatauvaa,
24 peitaʻi e lē manaʻomia e o tatou itutino matagofie se mea. Ae e ui i lea, ua tuufaatasia e le Atua itutino o le tino, ma atili faatāuaina ai itutino ua faalētāua,
25 ina ia lē fevaevaeaʻi le tino, ae ia faapea ona fetausiaʻi ona itutino.+
26 Afai e tigā se itutino e tasi, e tigā+ ai foʻi itutino uma; afai e faamamaluina+ se itutino e tasi, e olioli ai foʻi itutino uma.+
27 O lenei, o outou o tagata taʻitoʻatasi+ o le tino o Keriso.
28 Ua faatūina foʻi e le Atua i le faapotopotoga+ tagata eseese, muamua o aposetolo;+ lona lua o perofeta;+ lona tolu o faiaʻoga;+ ona sosoo ai lea ma galuega mamana;+ o meaalofa o le faamālōlōina o maʻi;+ o le tufatufaina o fesoasoani;+ o agavaa e faatonutonu ai,+ ma gagana eseese.+
29 E lē o i latou uma ea o ni aposetolo? E lē o i latou uma ea o ni perofeta? E lē o i latou uma ea o ni faiaʻoga? E leʻi faia uma ea e i latou ni galuega mamana?
30 E maua ea e i latou uma le meaalofa e faamālōlōina ai maʻi? E tautatala ea i latou uma i gagana eseese?+ Po o i latou uma ea o ni faaliliu upu?+
31 A ia outou saʻili pea ma le maelega i meaalofa aupito sili.+ Ae ou te faailoa atu iā te outou le auala silisili.+
