1 Korinito 3:1-23
3 O le mea lea le ʻauuso e, e leʻi mafai ona ou tautala atu iā te outou e faapei o ni tagata faaleagaga,+ ae e faapei o tagata faaletino, e pei foʻi o tamameamea+ i mataupu a Keriso.
2 Na ou fafagaina outou i le suāsusu ae e lē o meaʻai aano,+ auā e tou te leʻi malolosi i lenā taimi. Ae o le mea moni, e tou te lē o malolosi lava e oo mai i aso nei,+
3 auā o loo faaletino+ pea outou. Talu ai o loo iā te outou le lotoleaga ma le femisaaʻi, po ua lē faaletino ea outou,+ ma po ua outou lē savavali ea e pei o isi tagata?+
4 Auā pe afai e faapea mai le tasi: “O aʻu o le soo o Paulo,” ae fai mai le isi, “O aʻu o le soo o Apolo,”+ po ua lē pei ai ea outou o isi tagata?
5 O ai ea Apolo?+ A o ai foʻi Paulo? O ni auauna+ o ē ua ala ai ona outou talitonu, e pei ona tuuina mai e le Alii le galuega i tagata taʻitoʻatasi.
6 O aʻu na totō,+ o Apolo na faasūsū,+ a o le Atua na faatupuina;+
7 o lea, e lē o lē e totō, po o lē e faasūsū,+ a o le Atua o lē e na te faatupuina.+
8 E autasi lē e totō ma lē e faasūsū,+ ae e maua e tagata taʻitoʻatasi lona lava taui e tusa ma ana galuega.+
9 Auā o i matou o le ʻaufaigaluega faatasi ma le Atua.+ O outou o le faatoʻaga a le Atua o loo galueaʻiina,+ o le fale o loo fai a le Atua.+
10 E tusa ai ma le agalelei faifua+ ua tuuina mai e le Atua iā te aʻu, ua ou faataatia ai le faavae+ e pei o se faatonu atamai o galuega, ae o loo iai se tasi o loo atiaʻe i luga o lenā faavae. Ae ia taʻitoʻatasi ma faaauau ona mataala pe faapefea ona ia atiaʻe i luga o lenā faavae.+
11 E leai se tasi na te mafai ona faataatia se isi faavae+ nai lo o lea ua uma ona faavaeina, o Iesu Keriso lea.+
12 Afai e iai se tasi e atiaʻe i luga o le faavae i auro, siliva, maa tāua, laau, vao mamago, tagutugutu o laau,
13 e oo mai le aso e faaalia ai galuega a tagata taʻitoʻatasi, e faaalia lava i le afi;+ ma e faamaonia foʻi i le afi ituaiga o galuega e faia e tagata taʻitoʻatasi.
14 Afai e tumau+ se galuega na atiaʻe e se tasi, e maua e ia le taui;+
15 afai e mū galuega a se tasi, e faaumatia ai ana mea, ae e sao o ia;+ peitaʻi e pei o sē na ui mai i le afi.+
16 Pe e tou te lē iloa ea o outou o le malumalu o le Atua,+ ma o loo nofo i totonu iā te outou le agaga o le Atua?+
17 Afai e faaumatia e se tasi le malumalu o le Atua, e faaumatia o ia e le Atua;+ auā e paia le malumalu o le Atua,+ o outou+ o le malumalu.+
18 Aua neʻi faasesēina e se tagata o ia lava: Afai e iai se tasi o outou e manatu ua atamai+ o ia i lenei faiga o mea a le lalolagi, ia fai o ia ma vale, ina ia atamai ai o ia.+
19 Auā o le atamai o lenei lalolagi o le valea lea i le Atua;+ auā ua tusia: “Ua maua e ia tagata atamamai i a latou lava togafiti.”+
20 Ua toe faapea mai foʻi: “E silafia e Ieova e iʻuvale manatunatuga o tagata atamamai.”+
21 O le mea lea, aua neʻi mitamita ai se tasi i tagata; auā o outou e ana mea uma lava,+
22 po o Paulo, po o Apolo,+ po o Kefa, po o le lalolagi, po o le ola, po o le oti, po o mea o aso nei, po o mea i le lumanaʻi,+ o outou e ana mea uma lava;
23 o Keriso foʻi e ana outou;+ o le Atua foʻi e ana Keriso.+
