1 Samuelu 2:1-36
2 Ona tatalo+ lea o Hana ua faapea atu:
“Ua olioli loʻu loto iā Ieova,+
Ua faamaualugaina foʻi loʻu nifo e Ieova.+
Ua matala loʻu gutu e faasaga i oʻu fili,
Auā ua ou olioli i le faaolataga mai iā te oe.+
2 E leai se tasi e paia e pei o Ieova le Atua, auā e leai se tasi ua na o oe;+
E leai foʻi se papa e pei o lo tatou Atua.+
3 Soia tou te tautatala faamaualuga naʻuā,
Aua foʻi tou te tautatala lē mafaufau mai i o outou gutu,+
Auā o Ieova o le Atua poto,+
E na te fuatia foʻi ma le tonu galuega uma.+
4 Ua matataʻu tagata tomai i ʻaufana,+
A ua faamalosia i latou e tautevateva.+
5 O ē ua maoona, e auauna atu i latou mo ni meaʻai,+
A o ē ua fia aai e lē toe fia aai.+
E oo lava i lē na pā, ua ia fanaua le toʻafitu,+
A o lē na toʻatele lana fanau tama, ua vaivai o ia.+
6 O Ieova o Lē e fasioti ma o Lē e faasaoina le ola,+
O Lē e na te aveina ifo i le Tuugamau,*+ o Lē foʻi e na te toe faatūina mai.+
7 O Ieova o Lē e na te faamativaina+ ma o Lē e na te faatamaoaigaina,+
O Lē e na te faamaulaloina ma o Lē e na te faaeaina foʻi,+
8 O Lē e na te faatulaʻiina lē e faatauvaa mai i le efuefu;+
E na te faaeaina foʻi le tagata mativa mai i le lefulefu,+
Ina ia faanonofo faatasi ma tamālii; e na te avatu foʻi iā i latou le nofoālii mamalu+ e fai ma o latou tofi.+
Auā o Ieova e ona faavae o le lalolagi,+
Ma ua ia faaee ai i ona luga le laueleele.
9 E leoleo e ia vae o ona tagata faamaoni;+
A o ē e amioleaga e faalologo i le pōuliuli,+
Auā e lē mālō se tagata i lona malosi.+
10 A o Ieova, e matataʻu i latou e finau atu iā te ia;+
E na te faapā iā i latou faititili mai i le lagi.+
E faamasino e Ieova tuluʻiga o le lalolagi,+
Ina ia foaʻi atu ai le malosi i lana tupu,+
Ma ia faaeaina ai le nifo o lē ua ia faauuina.”+
11 Ona alu lea o Elekana i lona fale i Rama; a ua auauna+ le tama iā Ieova i luma o Eli le ositaulaga.
12 A o atalii o Eli o ni tagata e lē aogā+ i laʻua; auā e la te leʻi amanaʻia Ieova.+
13 A o mea e tatau ona maua e ositaulaga mai i le nuu,+ pe afai e ofoina atu e se tagata se taulaga, ona sau ai lea o le auauna a le ositaulaga ma le tui mata tolu i lona lima, a o amata ona tunu le aano o le manu,+
14 ma tutui i le tanoa, po o le ulo ʻau lua, po o se tasi mea e tunu ai mea, po o se ulo ʻau tasi. O so o se mea e sau i le tui, e ave e le ositaulaga mo ia. E latou te faia faapea i Sailo i tagata Isaraelu uma e ō ane ai i inā.+
15 A o leʻi susunuina+ e i latou le gaʻo, e alu le auauna a le ositaulaga ma fai atu i le tagata e ana le taulaga: “Ia aumai se aano o le manu e tao mo le ositaulaga, e na te talia mai iā te oe o le aano mata o le manu, ae e lē o le aano ua tunu.”+
16 Ona fai mai lea o le tagata iā te ia: “Seʻi faamautinoa ua susunu muamua le gaʻo.+ Ona e ave ai lea mo oe o mea uma e te manaʻo i ai,”+ a ua fai atu o ia: “E leai, ia aumai nei lava; afai e leai, o le a ou faoa le mea mai iā te oe!”+
17 Ona matuā tele ai lea o le agasala a auauna i luma o Ieova;+ auā ua lē faaaloalo na tagata i taulaga iā Ieova.+
18 Ua auauna+ Samuelu i luma o Ieova a o tamaitiiti o ia, ua ofu foʻi i le efota e fai i le ʻie lino.+
19 Ua faia foʻi e lona tinā se ofu laʻitiiti lima pupuu mo ia, ua ia avatua iā te ia i lea tausaga ma lea tausaga, pe a ō aʻe o ia faatasi ma lana tane e fai le taulaga i tausaga taʻitasi.+
20 Ua faamanuia+ foʻi Elekana ma lana avā e Eli, ua faapea atu: “Ia foaʻi atu e Ieova iā te oe se fanau mai i lenei avā, e sui ai le tama ua ia foaʻiina atu iā Ieova.”+ Ona la ō ai lea i lo la nuu.
21 Ua liuliualo mai Ieova iā Hana,+ ua tō ai o ia ma ua fanauina ai ni tama tama se toʻatolu, ma ni tama teine se toʻalua.+ Ua faaauau foʻi ona tuputupu aʻe Samuelu i luma o Ieova.+
22 Ua toeaina Eli, ua ia faalogo+ i mea uma na faaauau ona faia+ e ona atalii i Isaraelu uma, ma ua la momoe foʻi ma fafine+ na auauna i le faitotoʻa o le faleʻie o le feiloaʻiga.+
23 E masani ona ia fai atu iā i laʻua:+ “Aiseā ua lua saga faia ai nei mea?+ Auā ua ou faalogo i tala i mea leaga e uiga iā te oulua mai i le nuu uma.+
24 Soia+ ia, oʻu atalii e, e lē lelei le tala ua ou faalogo ai, lea ua feaveaʻi e le nuu o Ieova.+
25 Afai e agasala le tagata i se isi tagata,+ e faamasino le Atua iā te ia;+ ae afai e agasala+ le tagata iā Ieova, o ai ea e tatalo mo ia?”+ Peitaʻi, ua la lē faalogo i le leo o lo la tamā,+ auā ua finagalo Ieova e faaoo le oti iā i laʻua.+
26 Ua tupu pea le tama o Samuelu, ma ua sili atu ona alofagia o ia e Ieova atoa ma tagata.+
27 Ua alu atu le tasi tagata o le Atua+ iā Eli ma faapea atu iā te ia: “O le mea lenei ua fetalai mai ai Ieova, ‘Po ou te leʻi faailoa atu ea aʻu i le aiga o lou augātamā, a o iai i latou i Aikupito o ni pologa i le aiga o Farao?+
28 Na ou filifilia o ia mai i ituaiga uma o Isaraelu mo aʻu,+ e avea o se ositaulaga e alu aʻe i loʻu fata faitaulaga+ e faia taulaga mū ina ia alu aʻe ai le asu ma le manogi, ma ofu i le efota i oʻu luma, ina ia ou foaʻi atu ai i le aiga o lou augātamā, o taulaga uma na faia i le afi e le fanauga a Isaraelu.+
29 Aiseā ua outou lē migao ai i laʻu taulaga+ ma le taulaga na ou poloaʻi atu ai e faia i loʻu fale,+ ma ua e faamamaluina ou atalii i lo o aʻu, i le faapuputaina o outou+ i mea e sili ona lelei o taulaga uma ua faia e loʻu nuu o Isaraelu?+
30 “‘O le mea lea ua fetalai mai ai Ieova le Atua o Isaraelu: “Na ou fai atu lava, O lou aiga ma le aiga o lou augātamā, e latou te savavali i oʻu luma i aso uma lava.”+ A o lenei ua toe fetalai mai Ieova: “E mamao mai iā te aʻu lenei mea, auā ou te faamamaluina+ o ē e faamamaluina aʻu,+ ma taʻufaatauvaaina o ē e ʻinoʻino mai iā te aʻu.”+
31 Faauta! E oo mai aso ou te tipiesea ai lou lima ma le lima o le aiga o lou augātamā, ina ia lē toe iai se toeaina i lou aiga.+
32 E te iloa atu lava le fili i loʻu fale i mea lelei uma ua faia iā Isaraelu;+ ma e lē toe iai se toeaina i lou aiga.
33 Peitaʻi, e iai se tagata o lou aiga ou te lē aveesea mai i loʻu fata faitaulaga, e faatauasoina ai ou mata ma faavaivaia ai lou loto; ae o le toʻatele o lou aiga, e fasiotia e tagata i le pelu.+
34 O le faailoga lenei iā te oe e oo i ou atalii e toʻalua, o Hofeni ma Fineaso:+ E feoti i laʻua uma i le aso e tasi.+
35 Ou te faatūina mo aʻu o se ositaulaga faamaoni.+ E na te faia mea e tusa ma loʻu loto ma oʻu manatu; ou te faia mo ia o se fale e tumau, e savali foʻi o ia i luma o lē ua ou faauuina+ i aso uma lava.
36 O sē e totoe+ o lou aiga, e sau ma ifo mai iā te ia mo se tupe e totogi ai ma se falaoa, ma e faapea ane: “Faamolemole, ia e tofia mai iā te aʻu se faiva o le ositaulaga, ina ia ou ʻai ai i sina meaʻai.”’”+
Faamatalaga Pito i Lalo
^ Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
