1 Samuelu 21:1-15
21 Mulimuli ane, ua alu atu Tavita i Nove+ iā Aimeleka le ositaulaga; ona fefe ai lea o Aimeleka+ ina ua feiloaʻi ma Tavita, ma ua faapea mai: “Aiseā ua e maliu toʻatasi mai ai, ae e leai se tasi lua te toʻalua?”+
2 Ona fai atu lea o Tavita iā Aimeleka le ositaulaga: “Na poloaʻia aʻu e le tupu,+ ua ia faapea mai iā te aʻu, ‘Aua neʻi iloa e se tasi le mea ua ou auina atu i ai oe, ma le mea ua ou poloaʻia ai oe.’ Ua ou aauina atu tauleleʻa i o ma o.
3 O lenei, afai e iai ni au falaoa se lima, ia aumai iā te aʻu, po o so o se mea lava ua e maua.”+
4 A ua tali mai le ositaulaga iā Tavita e faapea: “E leai se falaoa masani o iā te au, ae o loo iai le falaoa paia;+ e mafai ona avatu pe afai e lē o toe faatasi tauleleʻa ma ni fafine.”+
5 Ona tali atu lea o Tavita i le ositaulaga, ua faapea atu iā te ia: “E pei o le taimi muamua, ina ua ou alu i le taua ua lē o toe faatasi fafine ma i matou,+ ua paia foʻi itutino o tauleleʻa e ui lava o la matou malaga masani e ō e tau. Pe e lē sili ea la ona paia itutino o se tasi i le asō, aemaise o la matou malaga faapitoa?”
6 Ona avatu ai lea e le ositaulaga iā te ia o le falaoa paia,+ auā ua leai se falaoa e na o le falaoa e laulauina lea na aveese mai i luma o Ieova,+ ina ia sui i falaoa fou i le aso na aveese ai.
7 Sa iai i lenā aso se tasi o auauna a Saulo, ua taofia+ i luma o Ieova, o lona igoa o Toeka+ le tagata Etoma,+ o le leoleo mamoe sili a Saulo.+
8 Ua fai atu Tavita iā Aimeleka: “Pe e iai ea se mea o iā te oe, po o se tao po o se pelu? Ou te leʻi aumaia laʻu pelu po o aʻu auupega, auā na faanatinati le feʻau a le tupu.”
9 Ona fai mai lea o le ositaulaga: “O le pelu lenei a Koliata+ le Filisitia o lē na e fasiotia i le fanua laugatasi o Ele,+ o loo afīfī i le ofu i tua o le efota.+ Afai e te manaʻo e ave mo oe, inā ave ia auā e leai se isi mea ua iai, ua na o lea.” Ona fai atu lea o Tavita: “E leai se isi mea e tusa ma lenā. Ia aumai iā te aʻu.”
10 Ona tulaʻi lea o Tavita ma faaauau ona sola ese+ mai iā Saulo i lenā aso, ua oo atu iā Akisa le tupu o Kata.+
11 Ua fai atu auauna a Akisa iā te ia: “Pe e lē o Tavita ea lenei o le tupu+ o le nuu? Pe e lē o ia lea na latou pepese fetaliaʻi ai i siva,+ ma faapea atu:
‘Ua fasia e Saulo le faitau afe,
A o Tavita e faitau sefulu afe’?”+
12 Ua tuu e Tavita nei upu i lona loto, ua matuā fefe+ ai o ia ona o Akisa le tupu o Kata.
13 Ua ia faafoliga+ atu ua faalētonu lona mafaufau i o latou luma+ ma faatagā valea ai, ua ia tusitusi faaekisi foʻi i faitotoʻa o le pā, ma faatafe ifo lona fāua i lana ʻava.
14 Ona fai mai lea o Akisa i ana auauna: “Seʻi tou vaai atu i le tagata ua valea. O le ā le mea ua outou aumai ai o ia iā te aʻu?
15 Po ua ou oge vale ea, ua outou aumaia ai lenei tagata valea iā te aʻu? Pe sau ea o ia i loʻu fale?”
